News Desk

സൗദി:സൗദി അൽ ഖസീം മേഖലയിലെ സർക്കാർ ആശുപത്രിയിൽ ജോലി ചെയ്തിരുന്ന മലയാളി നഴ്സിനെ ഹോസ്റ്റലിൽ മരിച്ച നിലയിൽ കണ്ടെത്തി.എറണാകുളം കൂത്താട്ടുകുളം കോലത്തേൽ കെ.വി മത്തായിയുടെ മകൾ ജിൻസിയെയാണ്(26) തിങ്കളാഴ്ച്ച രാവിലെ  ഹോസ്റ്റലിലെ കുളിമുറിയിൽ മരിച്ച നിലയിൽ കണ്ടെത്തിയത്.തിങ്കളാഴ്ച രാവിലെ പത്തുമണിവരെ ഹോസ്റ്റലിൽ കൂട്ടുകാരികളോടൊപ്പം സംസാരിച്ചിരുന്ന യുവതി പിന്നീട് കുളിമുറിയിൽ കയറി.കുറെ നേരം കഴിഞ്ഞിട്ടും കാണാത്തതിനെ തുടർന്ന് ഒപ്പമുള്ളവർ വാതിലിൽ മുട്ടി വിളിച്ചിട്ടും പ്രതികരണമുണ്ടായില്ല.തുടർന്ന് ആശുപത്രി അധികൃതരെ വിവരമറിയിച്ചു.പോലീസിന്റെ സഹായത്തോടെ വാതിൽ പൊളിച്ചു നോക്കിയപ്പോഴാണ് മുഖം കുത്തിയ നിലയിൽ മരിച്ചു കിടക്കുന്നതു കണ്ടത്.രാസ പരിശോധനയ്ക്കായി സാമ്പിൾ ശേഖരിച്ച മൃതദേഹം മോർച്ചറിയിലേക്ക് മാറ്റി.

കോഴിക്കോട്:ആറുലക്ഷം രൂപ ബാങ്ക് ഗ്യാരന്റി നൽകാത്തതിന്റെ പേരിൽ മലബാർ മെഡിക്കൽ കോളേജിൽ നിന്നും പുറത്താക്കിയ വിദ്യാർത്ഥികളെ തിരിച്ചെടുത്തു.വിദ്യാർത്ഥി സംഘടനകളുടെ ശക്തമായ പ്രതിഷേധത്തെ തുടർന്നാണ് നടപടി.കെഎസ് യു, എസ്എഫ്ഐ ,എം എസ് എഫ്,എ ബി വി പി എന്നീ സംഘടനകളാണ് പ്രതിഷേധവുമായെത്തിയത്. ആദ്യമെത്തിയ എബിവിപി പ്രവര്‍ത്തകര്‍ കോളജ് പ്രിന്‍സിപ്പാളിനെ ഉപരോധിച്ചു. മറ്റ് വിദ്യാര്‍ത്ഥി സംഘടനകള്‍ കോളേജ് ഗേറ്റിന് മുന്നില്‍ ശക്തമായി പ്രതിഷേധിച്ചു.വിദ്യാർഥിസംഘടനകളുമായി നടത്തിയ ചർച്ചയിൽ ബാങ്ക് ഗ്യാരന്റി ഇല്ലാത്തതിന്റെ പേരിൽ ആരെയും പുറത്താക്കിയിട്ടില്ലെന്ന നിലപാടാണ് കോളേജ് അധികൃതർ സ്വീകരിച്ചത്.നിയമനം നേടിയ എല്ലാ വിദ്യാർത്ഥികൾക്കും ക്ലാസില്‍ ഹാജരാവാമെന്നും പ്രിന്‍സിപ്പാള്‍ പറഞ്ഞു. ഇക്കാര്യം രേഖാമൂലം എഴുതി നൽകണമെന്ന് വിദ്യാര്‍ത്ഥി സംഘടനകള്‍ ആവശ്യപ്പെട്ടു.ഇതിനെ തുടര്‍ന്ന് ഇക്കാര്യം പ്രിന്‍സിപ്പാള്‍ എഴുതി നല്‍കി.ഇതോടെ സമരവും അവസാനിച്ചു.

കൊച്ചി:നടി ആക്രമിക്കപ്പെട്ട കേസിൽ ദിലീപിന്റെ ജാമ്യാപേക്ഷയിൽ കോടതി നാളെ വിധി പറയും.ജാമ്യാപേക്ഷയിൽ ഇന്ന് പ്രതിഭാഗത്തിന്റെ വാദം പൂർത്തിയായി.ദിലീപിന് വേണ്ടി അഭിഭാഷകൻ ബി.രാമൻപിള്ളയാണ് ഹാജരായത്.കേസുമായി ബന്ധപ്പെട്ട വിവരങ്ങളൊന്നും പോലീസ് പ്രതിഭാഗത്തെ അറിയിക്കുന്നില്ല എന്നതായിരുന്നു പ്രതിഭാഗത്തിന്റെ പ്രധാന പരാതി.റിമാൻഡ് റിപ്പോർട്ടിൽ ഒരു വിവരവും ഉൾപ്പെട്ടുത്തുന്നില്ലെന്നും പ്രതിയുടെമേൽ ചുമത്തിയിരിക്കുന്ന കുറ്റങ്ങൾ എന്തൊക്കെയാണെന്ന് അറിയിക്കുന്നില്ലെന്നും പ്രതിഭാഗം ആരോപിച്ചു.തന്റെമേൽ ചുമത്തിയിരിക്കുന്ന കുറ്റങ്ങൾ എന്തൊക്കെയാണെന്ന് അറിയേണ്ടത് പ്രതിയുടെ അവകാശമാണെന്നും രാമൻപിള്ള കോടതിയിൽ പറഞ്ഞു.പൾസർ സുനി അന്വേഷണസംഘത്തിന് ദൈവമായി മാറിയിരിക്കുകയാണെന്നും ബി രാമൻ പിള്ള വിമർശിച്ചു.നാളെ പ്രോസിക്യൂഷൻ വാദമായിരിക്കും കോടതി കേൾക്കുക.ഇതിനു ശേഷമാണ് ഹർജിയിൽ വിധി പറയുക.

തലശേരി: ദിനേശ് ബീഡി മൂഴിക്കര ശാഖ അടച്ചുപൂട്ടാനൊരുങ്ങുന്നു.. ഈ മാസം 30ന് ശാഖ അടച്ചുപൂട്ടാനാണ് തീരുമാനം.ഇവിടുത്തെ തൊഴിലാളികളോട് ഈങ്ങയിൽപീടിക ശാഖയിലേക്ക് മാറാൻ നിർദേശം നൽകിയിട്ടുണ്ട്.എന്നാൽ വിരമിക്കൽ പ്രായമായവരെ ഒരു വർഷത്തേക്കെങ്കിലും സ്ഥലം മാറ്റരുതെന്ന ആവശ്യം തൊഴിലാളികൾ ഉന്നയിച്ചിരുന്നു.ഈ ആവശ്യം പരിഗണിക്കാത്തതിനെ തുടർന്ന് തൊഴിലാളികൾ പ്രതിഷേധ സമരം നടത്തുകയാണ്. ഇന്നലെ തൊഴിലാളികൾ തലശേരി ദിനേശ് ഭവന് മുന്നിൽ പ്രതിഷേധ സമരം നടത്തി.

മലപ്പുറം:വേങ്ങര ഉപതിരഞ്ഞെടുപ്പിലെ നാമനിർദേശ പത്രികകളുടെ സൂക്ഷ്മ പരിശോധന കഴിഞ്ഞു.ഇന്നലെ നടന്ന സൂക്ഷ്മ പരിശോധനയിൽ ആറു പത്രികകൾ തള്ളി.നിലവിൽ ഇപ്പോൾ എട്ട് സ്ഥാനാർത്ഥികളാണ് മത്സരരംഗത്തുള്ളത്.യു.ഡി.എഫ് സ്ഥാനാർഥി കെ.എൻ.എ ഖാദർ,എൽ.ഡി.എഫ് സ്ഥാനാർഥി പി.പി ബഷീർ,എൻ.ഡി.എ സ്ഥാനാർഥി കെ.ജനചന്ദ്രൻ എന്നിവരാണ് പ്രധാന സ്ഥാനാർത്ഥികൾ.