News Desk

കോഴിക്കോട്:കോഴിക്കോട് വിമാനത്താവളത്തിൽ നിന്നും ബാറ്ററി ചാർജറിൽ ഒളിപ്പിച്ചു കടത്താൻ ശ്രമിച്ച സ്വർണം എയർ കസ്റ്റംസ് ഇന്റലിജൻസ് പിടികൂടി.ഒരുകോടിയിലേറെ രൂപ വിലമതിക്കുന്നതാണ് സ്വർണം.സംഭവത്തിൽ ഷാർജയിൽ നിന്നും കരിപ്പൂരിലെത്തിയ എയർ അറേബ്യാ വിമാനത്തിലെ യാത്രക്കാരനായ കണ്ണൂർ തലശ്ശേരി പൊന്ന്യം വെസ്റ്റ് കണ്ണോത്ത് മുഹമ്മദ് നകാശിനെ(24) പോലീസ് അറസ്റ്റ് ചെയ്തു.പവർ സിസ്റ്റത്തിന്റെയും ബാറ്ററി ചാർജറിന്റെയും യഥാർത്ഥ പാനൽ മാറ്റിയ ശേഷം സ്വർണ്ണം കൊണ്ടുള്ള പാനൽ സ്ഥാപിച്ചാണ് സ്വർണം ഒളിപ്പിച്ചു കടത്താൻ ശ്രമിച്ചത്.

കൊച്ചി:നടിയെ ആക്രമിച്ച കേസുമായി ബന്ധപ്പെട്ട ഗായിക റിമി ടോമിയുടെ രഹസ്യമൊഴി അന്വേഷണസംഘം രേഖപ്പെടുത്തും.പോലീസ് അന്വേഷണം അവസാനഘട്ടത്തിലെത്തിയിരിക്കെയാണ് റിമിയെ ചോദ്യം ചെയ്യാൻ പോലീസ് കോടതിയുടെ അനുവാദം ചോദിച്ചിരിക്കുന്നത്. ഇതിനായുള്ള അപേക്ഷ അങ്കമാലി മജിസ്ട്രേറ്റ് കോടതിയിൽ പോലീസ് സമർപ്പിച്ചു. റിമി ടോമിയെക്കൂടാതെ മറ്റ് നാലുപേരുടെ മൊഴികൂടി രേഖപ്പെടുത്താൻ അന്വേഷണസംഘം തീരുമാനിച്ചിട്ടുണ്ട്.ഇതിനുമുൻപ് റിമിയെ ഫോണിൽ വിളിച്ച് അന്വേഷണസംഘം വിവരങ്ങൾ ചോദിച്ചിരുന്നു.ഇതിൽ നിന്നും ലഭിച്ച വിവരങ്ങൾ കേസിന് സഹായകരമാകും എന്ന് ബോധ്യപ്പെട്ടതോടെയാണ് അന്വേഷണ സംഘം റിമി ടോമിയുടെ മൊഴി രേഖപ്പെടുത്താൻ തീരുമാനിച്ചത്.

പരിയാരം:പരിയാരം ചുടലയിലെ ഖാദി സെന്ററിൽ നിന്നും ഒരുലക്ഷം രൂപയുടെ തുണി മോഷ്ടിച്ചു.തിങ്കളാഴ്ച രാത്രിയാണ് മോഷണം നടന്നത്.മുണ്ടുകളും സാരികളും ബെഡ്ഷീറ്റുകളുമടക്കം ഒരുലക്ഷം രൂപയുടെ തുണികൾ മോഷണം പോയി.കെട്ടിടത്തിന്റെ പിൻഭാഗത്തെ പൂട്ട് പൊളിച്ചാണ് കള്ളൻ അകത്തു കയറിയത്.പരിയാരം മെഡിക്കൽ കോളേജ് പോലീസ് പരിശോധന നടത്തി.കൂടുതൽ അന്വേഷണത്തിനായി വിരലടയാള വിദഗ്ദ്ധർ സ്ഥലത്തെത്തി തെളിവെടുത്തു.ഇത് മൂന്നാം തവണയാണ് ഇവിടെ കവർച്ച നടക്കുന്നത്.

മലപ്പുറം:വേങ്ങര ഉപതിരഞ്ഞെടുപ്പിൽ രണ്ടുപേർ കൂടി പത്രിക പിൻവലിച്ചു.ഇതോടെ മത്സരരംഗത്തുള്ളവരുടെ എണ്ണം ആറായി.സ്വതന്ത്ര സ്ഥാനാർഥികളായി അബ്ദുൽ മജീദ്,ഇബ്രാഹിം എം.വി എന്നിവരാണ് പത്രിക പിൻവലിച്ചത്.അടുത്ത മാസം 11 നാണ് തിരഞ്ഞെടുപ്പ്.