പാനൂർ:ചമ്പാട് റോഡിൽ കുന്നോത്ത്‌പീടികയിൽ സിപിഎം ഓഫീസായി പ്രവർത്തിക്കുന്ന ഷെഡ്ഡ് തകർത്തു.കാരംസ് ബോർഡ്,കൊടികൾ,കസേരയടക്കമുള്ള ഫർണിച്ചറുകൾ എന്നിവയും തകർത്തു.ഷെഡിന്റെ മുകൾ ഭാഗത്തെ ഷീറ്റുകളും നശിപ്പിച്ചു.ആക്രമണത്തിന് പിന്നിൽ ആർ എസ് എസ് ആണെന്ന് സിപിഎം ആരോപിച്ചു.
മയ്യഴി:ചാലക്കര മുക്കുവൻപറമ്പ് കോളനിയിൽ സിപിഎം-ബിജെപി സംഘർഷം.അക്രമത്തിൽ അഞ്ചുപേർക്ക് പരിക്കേറ്റു.ഇന്നലെ രാത്രി എട്ടുമണിയോടെയാണ് സംഭവം.പരിക്കേറ്റ ബിജെപി പ്രവർത്തകർ ഈസ്റ്റ് പള്ളൂരിലെ അമൽ രാജ്,ചെമ്പ്രയിലെ രാജൻ എന്നിവരെ പള്ളൂർ ആശുപത്രിയിലും ഡിവൈഎഫ്ഐ,സിപിഎം പ്രവർത്തകരായ മുക്കുവൻ പറമ്പിലെ സി.എം നിവിൻ,സി.എം നിതിൻ,ഷിനാഫ് എന്നിവരെ തലശ്ശേരി കോ.ഓപ്പറേറ്റീവ് ആശുപത്രിയിലും പ്രവേശിപ്പിച്ചു.സിപിഎം മുക്കുവൻപറമ്പ് ബ്രാഞ്ച് സമ്മേളനത്തിന് ശേഷം കൊടിതോരണങ്ങൾ അഴിച്ചുമാറ്റുന്നതിനിടെ സംഘടിച്ചെത്തിയ ആർ എസ് എസ് പ്രവർത്തകർ ആക്രമിക്കുകയായിരുന്നു എന്ന് സിപിഎം ആരോപിച്ചു.ചെമ്പ്രയിൽ ബിജെപി യോഗം കഴിഞ്ഞ് ബൈക്കിൽ പോവുകയായിരുന്നവരെ തടഞ്ഞു നിർത്തി സിപിഎം പ്രവർത്തകർ അക്രമിക്കുകയായിരുന്നുവെന്ന് ബിജെപി ആരോപിച്ചു.
കണ്ണൂർ:ബിജെപി സംസ്ഥാന അധ്യക്ഷൻ കുമ്മനം രാജശേഖരൻ നയിക്കുന്ന ജനരക്ഷാ യാത്രയ്ക്ക് ഇന്ന് പയ്യന്നൂരിൽ തുടക്കമാകും.ബിജെപി ദേശീയ അധ്യക്ഷൻ അമിത് ഷാ യാത്ര ഉൽഘാടനം ചെയ്യും.അഹമ്മദാബാദിൽ നിന്നും പ്രത്യേക വിമാനത്തിൽ ഇന്ന് പുലർച്ചെ മംഗളൂരുവിലെത്തിയ അദ്ദേഹം റോഡ് മാർഗം ബേക്കൽ താജ് ഹോട്ടലിലെത്തി.തളിപ്പറമ്പ് രാജരാജേശ്വരി ക്ഷേത്രത്തിൽ ദർശനം നടത്തിയ ശേഷം പയ്യന്നൂരിലെ ഉൽഘാടന വേദിയിലെത്തും.രാവിലെ പത്തുമണിയോടെയാണ് ഉൽഘാടന ചടങ്ങ് ആരംഭിക്കുക.ഇതിനു ശേഷം ഉച്ചയ്ക്ക് മൂന്നു മണിയോടെയാണ് അമിത ഷാ പങ്കെടുക്കുന്ന പദയാത്ര ആരംഭിക്കുന്നത്.പയ്യന്നൂർ മുതൽ പിലാത്തറ വരെയുള്ള യാത്രയിൽ അമിത് ഷായും പങ്കെടുക്കും.ജനരക്ഷാ യാത്രയുടെ പശ്ചാത്തലത്തിൽ കണ്ണൂരിൽ കനത്ത സുരക്ഷയാണ് ഒരുക്കിയിരിക്കുന്നത്.കണ്ണൂരിൽ നിന്നുള്ള മുഴുവൻ സേനയ്ക്കും പ്രത്യേക സുരക്ഷാ വിഭാഗങ്ങൾക്കും പുറമെ സമീപ ജില്ലകളിലെ ഡിവൈഎസ്പിമാരെയും സിഐമാരെയും സുരക്ഷയ്ക്കായി നിയോഗിച്ചിട്ടുണ്ട്.11 ജില്ലകളിലായി നടക്കുന്ന യാത്ര സെപ്റ്റംബർ 23 ന് തിരുവനന്തപുരത്ത് സമാപിക്കും
ഹൈദരാബാദ്:ഹൈദരാബാദിൽ തിങ്കളാഴ്ച രാത്രിമുതൽ ഉണ്ടായ കനത്ത മഴയിലും വെള്ളപ്പൊക്കത്തിലും മൂന്നുപേർ മരിച്ചു.അഞ്ചുമണിക്കൂർ തുടർച്ചയായി പെയ്ത മഴയിൽ സംസ്ഥാനത്തെ വിവിധ നഗരങ്ങൾ വെള്ളത്തിനടിയിലായി.ഹൈദരാബാദിലെ ബഞ്ചാരി ഹിൽ മേഖലയിൽ മതിൽ ഇടിഞ്ഞ് വീടിനു മുകളിൽ വീണു 28 കാരനും അദ്ദേഹത്തിന്റെ ആറുമാസം പ്രായമുള്ള മകനും മരിച്ചു.ചാര്മിനാൽ മേഖലയിൽ ഒരാൾ വൈദ്യുതാഘാതമേറ്റും മരിച്ചു.ഏറെ നാളുകൾക്ക് ശേഷം ഏറ്റവും ഉയർന്ന തോതിലുള്ള മഴയാണ് തിങ്കളാഴ്ച രേഖപ്പെടുത്തിയത്.ഇവിടെ രക്ഷാപ്രവർത്തനങ്ങൾ പുരോഗമിക്കുകയാണ്.നഗരപ്രദേശത്ത് താമസിക്കുന്ന ജനങ്ങൾക്ക് ജാഗ്രത നിർദേശവും നൽകിയിട്ടുണ്ട്.
കണ്ണൂർ: സംസ്ഥാന ആരോഗ്യ വകുപ്പിന്‍റെ മീസിൽസ് -റുബെല്ല പ്രതിരോധ പരിപാടിക്ക് ഇന്ന് തുടക്കമാവും. മീസിൽസ് (അഞ്ചാംപനി), റുബെല്ല (ജർമൻ മീസിൽസ്) എന്നീ മാരക രോഗങ്ങളെ പ്രതിരോധിക്കുന്നതിനായി ഒൻപതു മാസം മുതൽ 15 വയസ് വരേയുള്ള എല്ലാ കുട്ടികൾക്കും ഒരു ഡോസ് മീസിൽസ് റുബെല്ല വാക്സിൻ നൽകും.നേരത്തെ കുത്തിവയ്പ് എടുത്ത കുട്ടികൾക്കും ഈ അധിക ഡോസ് നൽകണം.വാക്സിനേഷന്റെ ജില്ലാതല ഉദ്ഘാടനം ഇന്ന് രാവിലെ 9.30ന് സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കൻഡറി സ്കൂളിൽ മേയർ ഇ.പി.ലത നിർവഹിക്കും.ജില്ലാ പഞ്ചായത്ത് പ്രസിഡന്‍റ് കെ.വി. സുമേഷ് അധ്യക്ഷനാവും. ജില്ലാ കളക്ടർ മിർ മുഹമ്മദ് അലി മുഖ്യാതിഥിയാവും.
കണ്ണൂർ:ചൊവ്വ,ബുധൻ ദിവസങ്ങളിൽ റേഷൻ കടകൾ അടച്ചിട്ട് റേഷൻ വ്യാപാരികൾ പണിമുടക്കും.വേതന പാക്കേജ് ഉടൻ നടപ്പിലാക്കണമെന്നും റേഷൻ വിതരണത്തിലെ അഴിമതി അവസാനിപ്പിക്കാൻ റേഷൻ കടകളിൽ ഇ-പോസ് യന്ത്രം സ്ഥാപിച്ച് കംപ്യുട്ടർവൽക്കരണം നടപ്പിലാക്കണമെന്നും ആവശ്യപ്പെട്ടാണ് സമരം.ഓൾ കേരള റീറ്റെയ്ൽ റേഷൻ ഡീലേഴ്‌സ് അസോസിയേഷൻ,ഓൾ ഇന്ത്യ റേഷൻ ഡീലേഴ്‌സ് അസോസിയേഷൻ എന്നീ സംഘടനകളാണ് സമരത്തിന് ആഹ്വാനം നൽകിയിരിക്കുന്നത്.മുഖ്യമന്ത്രി വേതന പാക്കേജ് അംഗീകരിച്ചു എങ്കിലും ഭക്ഷ്യവകുപ്പ് നടപ്പിലാക്കാത്തതിൽ പ്രതിഷേധിച്ചാണ് സമരം.
ബെംഗളൂരു:പ്രമുഖ മാധ്യമ പ്രവർത്തക ഗൗരി ലങ്കേഷിന്റെ കൊലയാളികളെ സംബന്ധിച്ച് സൂചന ലഭിച്ചതായി കർണാടക ആഭ്യന്തര മന്ത്രി രാമലിംഗ റെഡ്ഢി പറഞ്ഞു.കൂടുതൽ വിവരങ്ങൾ വെളിപ്പെടുത്താൻ കഴിയില്ലെന്നും തെളിവുകൾ ശേഖരിച്ചു വരികയാണെന്നും അദ്ദേഹം പറഞ്ഞു.സെപ്റ്റംബർ ആറിനാണ് പ്രമുഖ മാധ്യമ പ്രവർത്തകയായ ഗൗരി ലങ്കേഷ് ബെംഗളൂരു രാജേശ്വരി നഗറിലെ വസതിയിൽ വെടിയേറ്റ് മരിച്ചത്.കേസുമായി ബന്ധപ്പെട്ട് ഗൗരിയുടെ സഹോദരൻ ഇന്ദ്രജിത് ലങ്കേഷിനെ പ്രത്യേക അന്വേഷണ സംഘം ചോദ്യം ചെയ്തിരുന്നു.ഗൗരിയും സഹോദരനും തമ്മിൽ സ്വത്തു തർക്കം നിലനിന്നിരുന്നുവെന്ന കണ്ടെത്തലിനെ തുടർന്നാണിത്.
മഞ്ചേശ്വരം:ഓടിക്കൊണ്ടിരുന്ന ട്രെയിനിന് നേരെയുണ്ടായ കല്ലേറിൽ യുവാവിന് പരിക്കേറ്റു. ഇന്നലെ വൈകുന്നേരം മംഗളൂരുവിൽ നിന്നും തിരുവനന്തപുരത്തേക്ക് പോവുകയായിരുന്ന മലബാർ എക്സ്പ്രസിന് നേരെയാണ് കല്ലേറുണ്ടായത്.കല്ലേറിൽ പരിക്കേറ്റ ട്രെയിൻ യാത്രക്കാരൻ കാസർകോഡ് കുഡ്‌ലു സ്വദേശി രാജേഷിനെ ആശുപത്രിയിൽ പ്രവേശിപ്പിച്ചു.രാജേഷിന്റെ പരാതിയിൽ കാസർകോഡ് റെയിൽവേ പോലീസ് കേസെടുത്തു.
കൊച്ചി:നടി ആക്രമിക്കപ്പെട്ട കേസിൽ നടൻ ദിലീപിനെതിരായ കുറ്റപത്രം വെള്ളിയാഴ്ച സമർപ്പിക്കും.ഈ മാസം എട്ടിന് ദിലീപ് അറസ്റ്റിലായി 90 ദിവസം പൂർത്തിയാകാനിരിക്കെ സ്വാഭാവിക ജാമ്യം കിട്ടുന്നത് തടയാനാണ് പോലീസ് വെള്ളിയാഴ്ച തന്നെ കുറ്റപത്രം സമർപ്പിക്കാൻ ഒരുങ്ങുന്നത്.ദിലീപിനെതിരെ നിർണായകമായ തെളിവുകൾ ഉണ്ടെന്നാണ് പോലീസ് നൽകുന്ന സൂചന.കേസിൽ ഇതുവരെ 21 പേരുടെ രഹസ്യമൊഴി പോലീസ് രേഖപ്പെടുത്തി കഴിഞ്ഞു.കുറ്റപത്രം സമർപ്പിക്കുന്നതിന് മുൻപായി നാലുപേരുടെ രഹസ്യമൊഴി കൂടി അന്വേഷണ സംഘം രേഖപ്പെടുത്തും.നടിയെ ആക്രമിക്കുന്ന ദൃശ്യങ്ങൾ അടങ്ങിയ രണ്ട് മെമ്മറി കാർഡ് പോലീസിന്റെ പക്കലുണ്ട്.ഇതിനോടൊപ്പം ചില നിർണായക മൊഴികളും കുറ്റപത്രത്തോടൊപ്പം ഉണ്ടാകുമെന്നു പോലീസ് പറയുന്നു.അതിനിടെ കേസിൽ ദിലീപ് സമർപ്പിച്ചിരിക്കുന്ന ജാമ്യാപേക്ഷയും ഹൈക്കോടതി ഈയാഴ്ച പരിഗണിക്കും.
മഥുര:മഥുരയിൽ മലയാളി നഴ്സിനെ മരിച്ച നിലയിൽ കണ്ടെത്തി.തിരുവനന്തപുരം കുന്നത്തുകാൽ സ്വദേശിനി എസ്.സൂര്യയാണ് മരിച്ചത്.താമസ സ്ഥലത്ത് അബോധാവസ്ഥയിൽ കണ്ടെത്തി എന്നാണ് ബന്ധുക്കൾക്ക് ലഭിച്ച വിവരം.എന്നാൽ ഞായറാഴ്ച രാവിലെ മരിച്ചു എന്ന് അറിയിക്കുകയായിരുന്നു.സൂര്യ ആത്മഹത്യ ചെയ്തു എന്നാണ് അറിയിച്ചത്.എന്നാൽ സൂര്യയുടെ മരണത്തിൽ ദുരൂഹതയുണ്ടെന്നാണ് ബന്ധുക്കളുടെ ആരോപണം.കൂടെ ജോലി ചെയ്യുന്ന കൊട്ടാരക്കര സ്വദേശിയായ ഒരു നഴ്‌സുമായി സൂര്യക്ക് ചില പ്രശ്നങ്ങൾ ഉണ്ടായിരുന്നു.ഇതാകാം മരണകാരണമെന്നാണ് ബന്ധുക്കളുടെ ആരോപണം.ഇതിനെ കുറിച്ച് അന്വേഷണം നടത്തണമെന്നും ബന്ധുക്കൾ ആവശ്യപ്പെട്ടു.