News Desk

തിരുവനന്തപുരം:നവംബർ ഒന്നിന് വ്യാപാരി വ്യവസായി ഏകോപന സമിതി പണിമുടക്ക്.ജി എസ് ടി അപാകതകൾ പരിഹരിക്കുക,വാടക കുടിയാൻ നിയമം പരിഷ്‌ക്കരിക്കുക തുടങ്ങിയ ആവശ്യങ്ങൾ ഉന്നയിച്ചാണ് പണിമുടക്ക്.അന്നേ ദിവസം സെക്രട്ടേറിയറ്റിനു മുൻപിൽ 24 മണിക്കൂർ ധർണയും സംഘടിപ്പിക്കുമെന്ന് ഭാരവാഹികൾ അറിയിച്ചു.

തിരുവനന്തപുരം:ഇടതു സർക്കാരിന്റെ സ്വപ്ന പദ്ധതിയായ കേരളാ ബാങ്ക് അടുത്ത വർഷം ചിങ്ങം ഒന്നിന് നിലവിൽ വരും.മുഖ്യമന്ത്രിയുടെ ഭരണ അവലോകന യോഗത്തിലാണ് ഈ സുപ്രധാന തീരുമാനം അറിയിച്ചത്.ബാങ്ക് തുടങ്ങുന്നതിന് ആർ ബി ഐക്ക് അപേക്ഷ നൽകിയിട്ടുണ്ട്.ജില്ലാ സഹകരണ ബാങ്കും സംസ്ഥാന സഹകരണ ബാങ്കും ചേർന്നാണ് കേരളാ ബാങ്ക് രൂപീകരിക്കുക.ജീവനക്കാരുടെ പുനർവിന്ന്യാസം,നിക്ഷേപ-വായ്‌പ്പാ പദ്ധതികളുടെ ഏകോപനം തുടങ്ങിയ ബാങ്കിന്റെ അടുത്ത അഞ്ചു വർഷത്തേക്കുള്ള ബിസിനസ് പോളിസി ആർ ബി ഐക്ക് നൽകിയതായും മുഖ്യമന്ത്രിയുടെ ഓഫീസ് വിശദീകരിച്ചു.

കൂത്തുപറമ്പ്:പത്തായക്കുന്നിൽ ബിജെപി പഞ്ചായത്ത് കമ്മിറ്റി ഓഫീസിനു നേരെ ബോംബേറ്.ഇന്ന് പുലർച്ചെയാണ് ബോംബേറുണ്ടായത്.മൂന്നു പ്രാവശ്യം സ്ഫോടന ശബ്ദം കേട്ടു എന്ന് പരിസരവാസികൾ പറഞ്ഞു.കെട്ടിടത്തിന് കാര്യമായ കേടുപാടുകൾ സംഭവിച്ചിട്ടില്ല.നാടൻ ബോംബുകൾ ഉപയോഗിച്ചാണ് കെട്ടിടത്തിന് നേരെ അക്രമം നടത്തിയതെന്ന് കതിരൂർ പോലീസ് പറഞ്ഞു.രണ്ടു ബോംബുകൾ മുകൾ നിലയിൽ പ്രവർത്തിക്കുന്ന കെട്ടിടത്തിന്റെ ചുമരിൽ തട്ടിയും ഒന്ന് റോഡിൽ വീണുമാണ് പൊട്ടിയതെന്നു പരിശോധനയിൽ വ്യക്തമായി. ആക്രമിക്കപ്പെട്ട ബിജെപി ഓഫീസ് ബിജെപി ജില്ലാ പ്രസിഡന്റ് സത്യപ്രകാശ് സന്ദർശിച്ചു.

കണ്ണൂർ:പശുവിനെ മോഷ്ടിച്ച് അറുത്തു വിറ്റയാൾ പോലീസ് പിടിയിലായി.മടക്കര സ്വദേശിയായ കൊവ്വമ്മൽ ആഷിക്കിനെയാണ് പോലീസ് അറസ്റ്റ് ചെയ്തത്.കഴിഞ്ഞ വ്യാഴാഴ്ചയാണ് ഇടക്കേപ്പുറം പടിഞ്ഞാറേ മുണ്ടവളപ്പിൽ വത്സലന്റെ നാലുവയസ്സുള്ള കറുത്ത  പശുവിനെ കാണാതായത്. പശുവിനെ കെട്ടിയിരുന്ന കയറിന്റെ ഒരുകഷ്ണം സ്ഥലത്തു ഉപേക്ഷിക്കപ്പെട്ട നിലയിൽ കണ്ടെത്തി.തുടർന്നാണ് പശുവിനെ ആരോ മോഷ്ടിച്ചതാണെന്ന് മനസ്സിലായത്.തുടർന്ന് വത്സലൻ പോലീസിൽ പരാതി നൽകി.പരാതി ലഭിച്ചതിനെ തുടർന്ന് സ്ഥലത്തെത്തിയ പോലീസ് പശുവിന്റെ കാൽപ്പാടുകൾ പിന്തുടർന്നു.വത്സലന്റെ വീട് മുതൽ മാട്ടൂൽ വയൽക്കരവരെ കാലടിയുണ്ടായിരുന്നു.പിന്നീട് ഒന്നും കണ്ടില്ല.ഇതോടെ പശുവിനെ അറുത്തിട്ടുണ്ടാകുമെന്ന് സംശയമായി.വളപട്ടണത്തെ ഒരു തുകൽ ഫാക്റ്ററിയിൽ നിന്നും പശുവിന്റെ കറുത്ത തുകലും ലഭിച്ചു.തുകൽ എവിടെ നിന്നും കൊണ്ടുവന്നതാണെന്നറിയാൻ സമീപത്തുള്ള അറവുശാലകളിൽ അന്വേഷിച്ചു.അവിടെയൊന്നും പശുവിനെ അറുത്തിട്ടില്ലെന്നു ബോധ്യമാവുകയും പശുവിനെ വേണമെന്ന് അന്വേഷിച്ചിറങ്ങിയ ഒരു സംഘത്തെ കുറിച്ച് അവിടെ നിന്നും സൂചന ലഭിക്കുകയും ചെയ്തു.തുടർന്ന് നടത്തിയ അന്വേഷണത്തിൽ പുഴയുടെ കരയിൽ കൂട്ടിയിട്ടിരുന്ന മണൽ വാരാൻ ഉപയോഗിക്കുന്ന ചീനകളുടെ മറവിൽ പശുവിനെ അറുത്തതിന്റെ ലക്ഷണങ്ങൾ കണ്ടെത്തി.അവിടെ നിന്നും ലഭിച്ച കയറിന്റെ കഷ്ണങ്ങൾ വത്സലനെ കാണിച്ചപ്പോൾ അത് തന്റെ പശുവിനെ കെട്ടിയതായിരുന്നെന്നു ബോധ്യമായി.തുടർന്ന് ഇവിടെ അറവ് നടത്തുന്നവരെ ചോദ്യം ചെയ്തപ്പോൾ പശുവിനെ വിറ്റയാളെയും മനസിലായി.പിന്നീട് പോലീസ് ആഷിക്കിനെ കസ്റ്റഡിയിലെടുക്കുകയായിരുന്നു.ചോദ്യം ചെയ്യലിൽ കുറ്റം സമ്മതിച്ച ഇയാളെ പോലീസ് അറസ്റ്റ് ചെയ്തു.