കൊച്ചി:മുന്‍ മിസ് കേരളയും റണ്ണറപ്പും മരിച്ച പാലാരിവട്ടത്തെ കാറപകടത്തില്‍ മരണം മൂന്നായി. മുന്‍ മിസ് കേരള അന്‍സി കബീർ(25), റണര്‍ അപ് അഞ്ജന ഷാജന്‍(24) എന്നിവര്‍ക്ക് പിന്നാലെ കാറിലുണ്ടായിരുന്ന കെ എ മുഹമ്മദ് ആശിഖ്(25) ആണ് മരിച്ചത്. അപകടത്തിൽ തലയ്ക്ക് ഗുരുതരമായി പരിക്കേറ്റ് ചികിത്സയിലായിരുന്ന ആശിഖ് ഞായറാഴ്ച രാത്രിയാണ് മരണത്തിന് കീഴടങ്ങിയത്. അന്‍സിയും അഞ്ജനയും സംഭവസ്ഥലത്ത് വച്ച് തന്നെ മരിച്ചിരുന്നു. കാറോടിച്ച അബ്ദുര്‍ റഹ്മാന്‍ ഇപ്പോഴും ഗുരുതരാവസ്ഥയില്‍ ഐ സി യുവില്‍ ചികിത്സയിലാണ്.ഈ മാസം ഒന്നാം തീയതി പുലർച്ചെ എറണാകുളം ബൈപാസില്‍ വൈറ്റിലയിലാണ് അപകടമുണ്ടായത്. അപകടത്തില്‍പെട്ടവര്‍ സഞ്ചരിച്ച കാര്‍ മുന്നില്‍ പോകുകയായിരുന്ന ബൈകില്‍ ഇടിക്കാതിരിക്കാന്‍ വെട്ടിച്ചപ്പോള്‍ വാഹനം നിയന്ത്രണം വിട്ട് തലകീഴായി മറിഞ്ഞ് മരത്തില്‍ ഇടിച്ച്‌ തകരുകയായിരുന്നു.2019-ല്‍ നടന്ന മിസ് കേരള മത്സരത്തിലെ വിജയി ആയിരുന്നു തിരുവനന്തപുരം ആലങ്കോട് സ്വദേശി അന്‍സി കബീര്‍. ഇതേ മത്സരത്തിലെ റണര്‍ അപ് ആയിരുന്നു ആയുര്‍വേദ ഡോക്ടര്‍ ആയ തൃശ്ശൂര്‍ ആളൂര്‍ സ്വദേശി അഞ്ജന ഷാജന്‍.
