News Desk

കോഴിക്കോട്:ബേപ്പൂരിൽ മൽസ്യബന്ധന ബോട്ടിൽ ഇടിച്ച കപ്പൽ കണ്ടെത്തിയതായി സൂചന.ബോട്ട് അപകടത്തിൽപെട്ടപ്പോൾ സമീപത്തുണ്ടായിരുന്ന വിദേശകപ്പലാണിത്.ഇതേ തുടർന്ന് ഡയറക്റ്റർ ജനറൽ ഓഫ് ഷിപ്പിംഗ് ഉദ്യോഗസ്ഥർ കപ്പൽ പരിശോധിച്ച് വരികയാണ്. കഴിഞ്ഞ ബുധനാഴ്ചയാണ് ബേപ്പൂരിൽ നിന്ന് 50 നോട്ടിക്കൽ മൈൽ അകലെ അപകടം നടന്നത്. അപകടത്തിൽ തമിഴ്നാട് കുളച്ചൽ സ്വദേശികളായ ആന്‍റോ (39), റമ്യാസ് (50), തിരുവനന്തപുരം സ്വദേശികളായ ജോൺസൺ (19), പ്രിൻസ് (20) എന്നിവരെ കാണാതായിരുന്നു.തിരുവനന്തപുരം സ്വദേശികളായ കാർത്തിക് (27), സേവ്യർ (58) എന്നിവരെ കോസ്റ്റ് ഗാർഡ് രക്ഷപ്പെടുത്തിയിരുന്നു. കോസ്റ്റ് ഗാർഡ് നടത്തിയ തെരച്ചിലിൽ ബോട്ടുടമ  ആന്‍റോയു‌ടെയും പ്രിൻസിന്‍റെയും മൃതദേഹം ബോട്ടിനുള്ളില്‍ കുടുങ്ങിയ നിലയില്‍ കണ്ടെത്തിയിരുന്നു. മറ്റു രണ്ടുപേർക്കായുള്ള തെരച്ചിൽ തുടരുകയാണ്.

തിരുവനന്തപുരം:ബിജെപി സംസ്ഥാന അധ്യക്ഷൻ കുമ്മനം രാജശേഖരൻ നയിക്കുന്ന ജനരക്ഷായാത്ര ഇന്ന് സമാപിക്കും.ഇന്ന് നടക്കുന്ന യാത്രയിൽ ബിജെപി ദേശീയ അധ്യക്ഷൻ അമിത് ഷായും പങ്കെടുക്കുന്നുണ്ട്.തിരുവനതപുരം പാളയം മുതലാണ് അമിത് ഷാ യാത്രയിൽ പങ്കുകൊണ്ടത്.’ജിഹാദി ചുവപ്പ് ഭീകരതയ്ക്കെതിരെ’ എന്ന മുദ്രാവാക്യവുമായാണ് കണ്ണൂർ പയ്യന്നൂരിൽ നിന്നും ബിജെപി ജനരക്ഷായാത്ര ആരംഭിച്ചത്.പുത്തരിക്കണ്ടം മൈതാനത്താണ് യാത്രയുടെ സമാപന സമ്മേളനം നടക്കുക.അഞ്ചു മണിയോടെ യാത്ര പുത്തരിക്കണ്ടം മൈതാനത്ത് എത്തിച്ചേരും.

ശബരിമല:വൃശ്ചികം ഒന്നു മുതല്‍ ഒരു വര്‍ഷത്തേക്കുള്ള ശബരിമല,മാളികപ്പുറം മേല്‍ശാന്തിമാരെ തെരഞ്ഞെടുത്തു.ശബരിമല മേൽശാന്തിയായി മംഗലത്ത് അഴകത്ത് മന എ.വി. ഉണ്ണിക്കൃഷ്ണൻ നമ്പൂതിരിയും മാളികപ്പുറം മേൽശാന്തിയായി വരിക്കം ഇല്ലത്ത് അനീഷ് നമ്പൂതിരിയും തെരഞ്ഞെടുക്കപ്പെട്ടു.ചൊവ്വാഴ്ച രാവിലെ ശബരിമല സന്നിധാനത്തും മാളികപ്പുറത്തുമായി നറുക്കെടുപ്പുകളിലൂടെയാണ് ഇരുവരെയും മേൽശാന്തിമാരായി തെരഞ്ഞെടുത്തത്.തൃശൂർ കൊടകര സ്വദേശിയാണ് എ.വി. ഉണ്ണികൃഷ്ണൻ നമ്പൂതിരി. തെരഞ്ഞെടുക്കപ്പെട്ട 12 പേരിൽ നിന്നാണ് കൊല്ലം മൈനാകപ്പ‍ള്ളി സ്വദേശി അനീഷ് നമ്പൂതിരിയ്ക്ക് മാളികപ്പുറം മേൽശാന്തിയാകാനുള്ള നറുക്ക് വീണത്.ചൊവ്വാഴ്ച രാവിലെ ഉഷപൂജയ്ക്കുശേഷം ദേവസ്വം കമ്മീഷണറുടെ സാന്നിധ്യത്തിലാണ് പുതിയ മേല്‍ശാന്തിമാരുടെ തെരഞ്ഞെടുപ്പ് നടന്നത്. പന്തളം കൊട്ടാരത്തിലെ ഇളമുറക്കാരായ സൂര്യവർമയും ഹൃദ്യ വർമയുമാണ് മേൽശാന്തിമാരുടെ നറുക്കെടുത്തത്.

പയ്യന്നൂർ:പയ്യന്നൂർ എടാട്ട് വാടക ക്വാർട്ടേഴ്‌സിൽ നിന്നും കഞ്ചാവ് പിടികൂടി.തിങ്കളാഴ്ച്ച രാവിലെയാണ് സംഭവം.രഹസ്യ വിവരം ലഭിച്ചതിനെ തുടർന്ന് പയ്യന്നൂർ എസ് ഐ കെ.പി ഷൈനിന്റെ നേതൃത്വത്തിലെത്തിയ സംഘമാണ് കഞ്ചാവ് പിടികൂടിയത്.എടാട്ട് തൃക്കൈ മഹാവിഷ്ണു ക്ഷേത്രത്തിനു സമീപത്തെ സി.എം രാമനുണ്ണി റോഡിലെ വാടക ക്വാർട്ടേഴ്‌സിൽ നിന്നുമാണ് അരക്കിലോയോളം കഞ്ചാവ് പിടികൂടിയത്. പോലീസ് ഇവിടെ പരിശോധനയ്ക്ക് എത്തുമ്പോൾ ഇവിടെ ആരും ഇല്ലായിരുന്നു.പയ്യന്നൂരിൽ സ്വകാര്യ കോളേജിൽ പഠിക്കുന്ന മൂന്നു യുവാക്കളാണ് ഇവിടെ താമസിക്കുന്നതെന്നാണ് സമീപവാസികളിൽ നിന്നും പൊലീസിന് കിട്ടിയ വിവരം.എന്നാൽ കെട്ടിടം ഉടമയിൽ നിന്നും ലഭിച്ച അഡ്രസ് തെറ്റാണെന്നു ബോധ്യപ്പെട്ടതോടെ അന്വേഷണം വഴിമുട്ടി.പിന്നീട് ഉച്ചയ്ക്ക് രണ്ടുമണിയോടെ ബൈക്കിലെത്തിയ രണ്ടംഗസംഘത്തെ നാട്ടുകാർ തടഞ്ഞു വെച്ച് പോലീസിൽ വിവരമറിയിക്കുകയായിരുന്നു. എന്നാൽ സ്ഥലത്തെത്തിയ പോലീസിനെയും നാട്ടുകാരെയും വെട്ടിച്ച് പുഴക്കരയിലേക്ക് ഓടിയ ഇവർ പുഴയിൽ ചാടി അക്കരേക്ക് നീന്തിക്കയറി രക്ഷപ്പെടുകയായിരുന്നു.ഇവർ സഞ്ചരിച്ച ബൈക്ക് പോലീസ് കസ്റ്റഡിയിലെടുത്തിട്ടുണ്ട്.വൈകുന്നേരം ക്വാർട്ടേഴ്‌സിലെത്തിയ വേറെ രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്.