News Desk

കാഞ്ഞങ്ങാട്:അതിഞ്ഞാൽ പള്ളി കോമ്പൗണ്ടിലെ കെട്ടിടത്തിന് മുകളിൽ കയറിയ മൂന്നു മതപഠന വിദ്യാർത്ഥികൾക്ക് ഷോക്കേറ്റു.ഇന്നലെ ഉച്ചയോടെയാണ് സംഭവം.അപകടത്തിൽ പരിക്കേറ്റ തളിപ്പറമ്പ് സ്വദേശികളായ വാഹിദ്(23),റംഷീദ്(23),കണ്ണൂർ സ്വദേശി ജാസിർ(22) എന്നിവരെ മംഗലാപുരം യേനെപ്പോയ ആശുപത്രിയിൽ പ്രവേശിപ്പിച്ചു.ഇതിൽ വാഹിദിന്റെ നില ഗുരുതരമാണ്.വാഹിദിനാണ് ആദ്യം ഷോക്കേറ്റത്.വാഹിദിന്റെ നിലവിളി കേട്ടെത്തിയ ജാസിറിനും റംഷീദിനും കെട്ടിടത്തിന്റെ മുകളിൽ കെട്ടിക്കിടന്ന വെള്ളത്തിൽ നിന്നാണ് ഷോക്കേറ്റത്.പള്ളിവളപ്പിനകത്തുകൂടി  കടന്നുപോകുന്ന ഹൈടെൻഷൻ ലൈനിൽ നിന്നാണ് ഷോക്കേറ്റത്.ശൗചാലയകെട്ടിടത്തിന്റെ ടെറസ്സിൽ നിന്നും ഒരാൾപൊക്കം പോലും കടന്നു പോകുന്ന വൈദ്യുതി കമ്പികൾക്കില്ല.ഇവ മാറ്റണമെന്ന് അതിഞ്ഞാൽ ജമാഅത് കമ്മിറ്റി കെഎസ്ഇബിക്ക് നേരത്തെ പരാതി നൽകിയിരുന്നു.

കണ്ണൂർ:കണ്ണൂർ സെൻട്രൽ ജയിലിൽ നിന്നും ഇത്തവണ ഒൻപതുപേർ പത്താംതരം തുല്യത പരീക്ഷയെഴുതും.വ്യഴാഴ്‌ചയാണ്‌ പരീക്ഷ നടക്കുക.കണ്ണൂർ മുനിസിപ്പൽ സ്കൂളാണ് പരീക്ഷ കേന്ദ്രം .അയൂബ്,സിജോ,മണികണ്ഠൻ,ഗിരീഷ്,സുനിൽകുമാർ,രാജേഷ്,സന്തോഷ്,റിന്റോ,അമീർ എന്നിവരാണ് പരീക്ഷയെഴുതുന്നത്.ജയിലിൽ നിന്നും പരീക്ഷയെഴുതുന്നവർക്ക് സാക്ഷരതാ മിഷൻ പൂർണ്ണമായ ഫീസിളവ് അനുവദിക്കുന്നുണ്ട്.കൗസർ ചാരിറ്റബിൾ ട്രസ്റ്റ്,ജീസസ് ഫ്രറ്റെണിറ്റി എന്നീ സംഘടനകളാണ് ഇവർക്കാവശ്യമായ പഠനോപകരണങ്ങൾ നൽകുന്നത്.കഴിഞ്ഞ കുറെ വർഷങ്ങളായി പത്താംതരം തുല്യത പരീക്ഷയിൽ കണ്ണൂർ സെൻട്രൽ ജയിലിന് നൂറു ശതമാനം വിജയമാണ്.

ശ്രീകണ്ഠപുരം:വിളക്കന്നൂരിൽ മുസ്ലിം ലീഗ് ഓഫീസായ സി.എച് സൗധത്തിനും ചുഴലി മാവിലംപാറയിൽ സിപിഎം ഓഫീസായ ഇ.കെ നായനാർ സ്മാരക മന്ദിരത്തിനും നേരെ അക്രമം നടത്തിയ ഇരുപതുപേർക്കെതിരെ കേസെടുത്തു.കാറിലും ബൈക്കിലുമായെത്തിയ സിപിഎം സംഘമാണ് തിങ്കളാഴ്ച്ച രാത്രിയോടെ ലീഗ് ഓഫീസിനു നേരെ കരിഓയിൽ ഒഴിച്ച ശേഷം തീവെക്കാൻ ശ്രമിച്ചത്.തീപടരുന്നത് കണ്ട് ഓടിയെത്തിയപ്പോഴേക്കും അക്രമി സംഘം രക്ഷപ്പെടുകയായിരുന്നുവെന്ന് ലീഗ് പ്രവർത്തകർ പറഞ്ഞു.മാവിലാംപാറയിലെ സിപിഎം ഓഫീസിനു നേരെ ചൊവ്വാഴ്ച പുലർച്ചയോടെയാണ് അക്രമം നടന്നത്.ഓഫീസിന്റെ ജനൽച്ചില്ലുകളും കസേരകളും മുസ്‌ലീഗ് സംഘം നശിപ്പിച്ചതായി സിപിഎം നേതാക്കൾ പറഞ്ഞു.നേരത്തെ പലതവണ ഈ രണ്ട് ഓഫീസുകളും അക്രമിക്കപ്പെട്ടിരുന്നു.

കോഴിക്കോട്:മട്ടൻ ബിരിയാണി തീർന്നുപോയതിന് ഹോട്ടൽ ജീവനക്കാരനെ സീരിയൽ നടിയും സംഘവും ചേർന്ന് മർദിച്ചു.കഴിഞ്ഞ ദിവസം കോഴിക്കോട് റഹ്മത് ഹോട്ടലിലാണ് സംഭവം.തൃശൂർ കുന്നംകുളം സ്വദേശിനി അനു ജൂബി,ഇവരുടെ സുഹൃത്തുക്കളായ മംഗലാപുരം സ്വദേശിനി മുനീസ,എറണാകുളം പാലാരിവട്ടം സ്വദേശി നവാസ്,പൂവാട്ടുപറമ്പ് സ്വദേശി എന്നിവരെയാണ് ടൌൺ പോലീസ് അറസ്റ്റ് ചെയ്തത്.അനുവും സംഘവും ഹോട്ടലിലെത്തി ജീവനക്കാരോട് മട്ടൻ ബിരിയാണി ആവശ്യപ്പെട്ടുവെങ്കിലും തീർന്നുപോയെന്നു ഇയാൾ അറിയിച്ചതിനെ തുടർന്നാണ് സംഘർഷം ഉണ്ടായത്.ഹോട്ടൽ ജീവനക്കാരോട് ക്ഷോഭിച്ച അനുവും മുനീസയും ഇയാളെ മർദിക്കുകയും ചെയ്തു.ഹോട്ടലിൽ ഭക്ഷണം കഴിക്കാൻ എത്തിയവർ പ്രശ്‌നത്തിൽ ഇടപെട്ടുവെങ്കിലും നടിയും സംഘവും ഇവരോടും തട്ടിക്കയറുകയായിരുന്നു.ഹോട്ടൽ അധികൃതർ പരാതിപ്പെട്ടതിനെ തുടർന്ന്  പോലീസെത്തി ഇവരെ കസ്റ്റഡിയിലെടുക്കുകയായിരുന്നു. പിന്നീട് ഇവരെ ജാമ്യത്തിൽ വിട്ടയച്ചു.ഇവരിൽ ഒരാൾ മദ്യപിച്ചിരുന്നതായി പോലീസ് പറഞ്ഞു.