News Desk

മാഹി:മാഹി സെന്റ് തെരേസ ദേവാലയത്തിലെ വിശുദ്ധ ‘അമ്മ ത്രേസ്യയുടെ തിരുനാളിന് ഇന്നലെ കൊടിയിറങ്ങി.പതിനായിരക്കണക്കിന് ആളുകളാണ് തിരുനാളിനായി എത്തിയത്. സമാപന ദിവസമായ ഇന്നലെ ഉച്ചയോടെ വിശുദ്ധ ‘അമ്മ ത്രേസ്യയുടെ തിരുസ്വരൂപവും വഹിച്ചു കൊണ്ടുള്ള പ്രദക്ഷിണം നടന്നു.ഇതിനു ശേഷം പൊതു വണക്കത്തിനായി പ്രതിഷ്ഠിച്ച രൂപം ഇടവക വികാരി ഡോ.ജെറോം ചിങ്ങത്തറയുടെ കാർമികത്വത്തിൽ രഹസ്യ അറയിലേക്ക് മാറ്റി.

കണ്ണൂർ:സിപിഎം സംസ്ഥാന സെക്രെട്ടറി കോടിയേരി ബാലകൃഷ്‌ണൻ നയിക്കുന്ന ജനജാഗ്രതയാത്രയ്ക്ക് ഇന്ന് കണ്ണൂരിൽ സ്വീകരണം.ശനിയാഴ്ച്ച കാസർകോടുനിന്നാരംഭിച്ച ജനജാഗ്രത യാത്ര ഞായറാഴ്ച ചട്ടഞ്ചാലിൽ നിന്നാണ് പര്യടനം തുടങ്ങിയത്.കണ്ണൂർ ജില്ലയിലെ ആദ്യ സ്വീകരണ കേന്ദ്രമായ പയ്യന്നൂരിൽ എൽഡിഎഫ് നേതാക്കളായ പി.ജയരാജൻ,പി.സന്തോഷ് കുമാർ,വി.രാജേഷ് പ്രേം,കെ.കെ.ജയപ്രകാശ്,വി.വി. കുഞ്ഞികൃഷ്ണൻ,സി.വി ശശീന്ദ്രൻ തുടങ്ങിയവർ കോടിയേരിയെ സ്വീകരിച്ചു.യാത്ര തിങ്കളാഴ്ച്ച രാവിലെ പത്തുമണിക്ക് ശ്രീകണ്ഠപുരത്ത് നിന്നാരംഭിച്ച് മട്ടന്നൂർ,പിണറായി,പാനൂർ,തലശ്ശേരി എന്നിവിടങ്ങളിലെ സ്വീകരണത്തിന് ശേഷം വൈകുന്നേരം ആറുമണിക്ക് കണ്ണൂരിൽ എത്തിച്ചേരും.ചൊവ്വാഴ്ച പേരാവൂർ മണ്ഡലത്തിൽ ഇരിട്ടിയിലെ പരിപാടിക്ക് ശേഷം ജാഥ വയനാട് ജില്ലയിലേക്ക് പ്രവേശിക്കും.

കണ്ണൂർ: അഞ്ചരക്കണ്ടി കണ്ണാടിവെളിച്ചത്ത് വ്യാജമണൽ നിർമാണ കേന്ദ്രം കണ്ടെത്തി.ആയിക്കര ഹാർബറിന്‍റെ ആഴംകൂട്ടൽ പ്രവൃത്തിക്കായി ഡ്രഡ്ജ് ചെയ്തു നീക്കുന്ന ചെളി ശേഖരിച്ച് കടൽമണലും പേരിനു പുഴമണലും ചേർത്ത് വിൽക്കുന്ന തട്ടിപ്പുസംഘത്തിന്‍റെ മിക്സിംഗ് യൂണിറ്റാണ് ചക്കരക്കൽ പോലീസ് അഞ്ചരക്കണ്ടിയിൽ കണ്ടെത്തിയത്.ഇവിടെ നിന്നും അനധികൃതമായി  സൂക്ഷിച്ച 40 ലോഡോളം മണലും പോലീസ് പിടികൂടി.ചക്കരക്കൽ പ്രിൻസിപ്പൽ എസ്ഐ പി. ബിജുവിന്‍റെ നേതൃത്വത്തിൽ നടത്തിയ അന്വേഷണത്തിലാണ് വ്യാജ മണൽ നിർമാണകേന്ദ്രം കണ്ടെത്തിയത്.ഡ്രഡ്ജ് ചെയ്തു നീക്കുന്ന ചെളിയും മണലും 100 അടിക്ക് 2000 രൂപ നിരക്കിലാണ് തുറമുഖ അധികൃതർ വിൽക്കുന്നത്. പ്രധാനമായും സ്ഥലം നികത്തുന്നതിനും മറ്റുമാണ് ഇത് ഉപയോഗിക്കാറുള്ളത്. ഡ്രഡ്ജിംഗ് മണൽ വാങ്ങി സംഭരിക്കുന്ന മണൽമാഫിയ കർണാടകയിൽനിന്നുള്ള പുഴമണലും അനധികൃതമായി ശേഖരിക്കുന്ന കടൽമണലും ചേർത്ത് വൻ വിലയ്ക്ക് വിറ്റുവരികയാണ്. ഇത്തരം മണലിന് ഒരു ലോഡിന് 15,000 രൂപ വരെയാണ് ഈടാക്കുന്നത്.ഈ മണൽ ഉപയോഗിച്ച് വീടു നിർമിച്ചാൽ രണ്ടുവർഷത്തിനകംതന്നെ ചോർച്ച സംഭവിക്കുമെന്ന് എൻജിനിയർമാർ പറയുന്നു.കഴിഞ്ഞ ദിവസം മണൽ മാഫിയാ സംഘത്തിലെ ഒരു യുവാവ് അനധികൃതമായി മണൽ കടത്തുന്ന മറ്റൊരു ലോറി തടയുകയും ചക്കരക്കൽ എസ്ഐയാണെന്നു പരിചയപ്പെടുത്തി പണം ആവശ്യപ്പെടുകയും ചെയ്തിരുന്നു.എസ്ഐ ചമഞ്ഞ് ചിലർ പണപ്പിരിവു നടത്തുന്ന വിവരം അറിഞ്ഞതിനെ തുടർന്ന് ചക്കരക്കൽ പോലീസ് നടത്തിയ അന്വേഷണത്തിലാണ് വ്യാജ മണൽ വില്പന സംഘത്തെക്കുറിച്ച് വിവരം ലഭിച്ചത്.

കൊല്ലം:കൊല്ലത്ത് പത്താംക്‌ളാസ്സ് വിദ്യാർത്ഥിനി കെട്ടിടത്തിന് മുകളിൽ നിന്നും ചാടി ആത്മഹത്യക്ക് ശ്രമിച്ചു.ഇന്നലെ ഉച്ചയ്ക്ക് ഒന്നരമണിയോടെയാണ് സ്വകാര്യ സ്കൂൾ കെട്ടിടത്തിന്റെ മൂന്നാം നിലയിൽ നിന്നും ചാടി വിദ്യാർത്ഥിനി ആത്മഹത്യക്ക് ശ്രമിച്ചത്. സംഭവത്തിൽ രണ്ട് അദ്ധ്യാപകർക്കെതിരെ പോലീസ് കേസെടുത്തു.ആത്മഹത്യ ചെയ്യാൻ പ്രേരിപ്പിക്കുന്ന വിധത്തിൽ അദ്ധ്യാപകർ കുട്ടിയെ മാനസികമായി പീഡിപ്പിച്ചുവെന്നാണ്‌ പോലീസ് വ്യക്തമാക്കുന്നത്. മറ്റൊരു കുട്ടിയുമായുള്ള തർക്കത്തിൽ ഈ കുട്ടിയെ അദ്ധ്യാപകർ സ്റ്റാഫ് റൂമിലേക്ക് വിളിപ്പിച്ച് വഴക്കുപറഞ്ഞിരുന്നു.ഇതിനു ശേഷമാണ് കുട്ടി കെട്ടിടത്തിന് മുകളിൽ നിന്നും ചാടിയത്.വീഴ്ചയിൽ തലയ്ക്ക് ഗുരുതരമായി പരിക്കേറ്റതിനെ തുടർന്ന് തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലാണ് വിദ്യാർഥിനി.സഹപാഠികളിൽ നിന്നും മറ്റ് അധ്യാപകരിൽ നിന്നും പോലീസ് വെള്ളിയാഴ്ച തന്നെ വിവരങ്ങൾ ശേഖരിച്ചിരുന്നു. ആശുപത്രിയിലെത്തി രക്ഷിതാക്കളിൽ നിന്ന് രാത്രിയിൽതന്നെ പോലീസ് മൊഴിയെടുക്കുകയും ചെയ്തു.