News Desk

തളിപ്പറമ്പ്:കീഴാറ്റൂർ ബൈപാസിനെതിരെ നടന്ന ഒന്നാം ഘട്ട സമരം അവസാനിച്ചുവെങ്കിലും പ്രശ്നനങ്ങൾ ഇനിയും ഒഴിവായിട്ടില്ല.സമരം മുമ്പത്തേതിനേക്കാൾ ശക്തമാക്കാനുള്ള ഒരുക്കമാണ് നടക്കുന്നത്.വയൽക്കിളികൾക്കൊപ്പം ഇപ്പോൾ പ്രദേശത്തെ നാട്ടുകാരും ബൈപ്പാസിനെതിരെ ശക്തമായി രംഗത്തു വന്നിരിക്കുകയാണ്.തങ്ങളുടെ പ്രദേശത്തെ തോടും വയലും റോഡിനായി വിട്ടുതരില്ല എന്നാണ് പ്രതിഷേധക്കാർ പറയുന്നത്.രണ്ട് ആരാധനാലയങ്ങളും ഇതിനായി തകർക്കപ്പെടുമെന്ന ഭീതിയും ഇവർക്കുണ്ട്.വയൽ നികത്തുന്നതിനെതിരെ ഈ മാസം 24 ന് വൈകിട്ട് നാലുമണിക്ക് കീഴാറ്റൂർ വയൽക്കരയിൽ പ്രതിഷേധജ്വാല തെളിയിക്കും.തുടർന്ന് ഭാവി പരിപാടികൾ ആസൂത്രണം ചെയ്യും.ഇതേ ദിവസം വൈകുന്നേരം അഞ്ചുമണിക്ക് സമരപ്പന്തലിനു സമീപം മനുഷ്യച്ചങ്ങല തീർത്ത് വയൽക്കിളികൾ രണ്ടാംഘട്ട സമരത്തിന് തുടക്കമിടും. നാട്ടുകാരുടെ ഈ പ്രതിഷേധങ്ങളെ എങ്ങനെ നേരിടുമെന്ന് അറിയാതെ വിഷമിക്കുകയാണ് ജനപ്രതിനിധികളും ഉദ്യോഗസ്ഥരും.

തിരുവനന്തപുരം: സഹപാഠികളോട് വഴക്കിട്ടെന്നാരോപിച്ച് രണ്ടാം ക്ലാസുകാരനെ സസ്പെൻഡ് ചെയ്തു. തിരുവനന്തപുരം  ബാലരാമപുരത്തെ സ്വകാര്യ സ്കൂളിലാണ് നടപടി.അഞ്ച് ദിവസത്തേക്കാണ് കുട്ടിയെ സസ്പെൻഡ് ചെയ്തത്. അതേസമയം, കുട്ടിയെ സസ്പെൻഡ് ചെയ്തിട്ടില്ലെന്നും സ്കൂളിലെ രക്ഷാകർതൃ സമിതി യോഗം ചേർന്നാണ് നടപ‌ടിയെടുത്തതെന്നും കുട്ടിയെ രണ്ടു ദിവസത്തേക്ക് സ്കൂളിലേക്ക് വിടണ്ട എന്ന് മാത്രമാണ് പറഞ്ഞതെന്നും സ്കൂൾ പ്രൻസിപ്പാൾ അറിയിച്ചു.ഇക്കാര്യം അറിയിച്ചപ്പോൾ കുട്ടിയെ സസ്പെൻഡ് ചെയ്തു എന്ന് കാണിച്ചുള്ള നോട്ടീസ് നൽകണമെന്ന് പിതാവ് ആവശ്യപ്പെട്ടുവെന്നും ഇത് തർക്കത്തിലേക്ക് നീങ്ങിയപ്പോഴാണ് സസ്‌പെൻഡ് ചെയ്തു എന്ന നോട്ടീസ് നൽകിയതെന്നും പ്രിൻസിപ്പാൾ വ്യക്തമാക്കി. അതേസമയം, തന്നോടുള്ള വ്യക്തിവൈരാഗ്യം തീർക്കുന്നതിന്‍റെ ഭാഗമായാണ് കുട്ടിയോട് അധ്യാപകർ ഈ നടപടി സ്വീകരിച്ചതെന്നും കുട്ടിയെ സ്വാതന്ത്ര്യദിനാഘോഷങ്ങളിൽ നിന്നുൾപ്പെടെ മാറ്റിനിർത്തിയിരുന്നുവെന്ന് പിതാവും ആരോപിച്ചു.

കല്യാശ്ശേരി:കോലത്തുവയലിൽ സഹകരണ കൺസ്യൂമർ സ്റ്റോറിനും വായനശാലയ്ക്കും നേരെ അക്രമം.സ്റ്റോറിന് പുറത്ത് സൂക്ഷിച്ചിരുന്ന ഉപ്പ് നിറച്ചിരുന്ന ചാക്കുകൾ നശിപ്പിക്കുകയും ഉപ്പുപൊടി സമീപത്താകെ വിതറുകയും ചെയ്തിരുന്നു.സ്റ്റോറിന്റെ വരാന്ത,മുറ്റം,വായനശാലയുടെ വരാന്ത,ഗോവണി,സിപിഎം കൊടിമര മണ്ഡപം എന്നിവയിലെല്ലാം ഉപ്പ് വാരിവിതറിയ നിലയിലാണ്.സാമൂഹ്യവിരുദ്ധരാണ് അക്രമത്തിനു പിന്നിലെന്ന് പോലീസ് പറഞ്ഞു.ഞായറാഴ്ച പുലർച്ചെയാണ് അക്രമം നടന്നത്.സംഭവത്തിൽ വായനശാല അധികൃതരും സഹകരണ സ്റ്റോർ ഭാരവാഹികളും പരാതി നൽകി.