News Desk

ബീഹാർ:ബീഹാറിൽ ബസ് നദിയിലേക്ക് മറിഞ്ഞ് 14 പേർ മരിച്ചു.ബീഹാർ നേപ്പാൾ അതിർത്തിയിൽ നിന്നും കാഠ്‌മണ്ഡുവിലേക്ക് പോവുകയായിരുന്ന ബസ് ത്രിശൂൽ നദിയിലേക്ക് മറിഞ്ഞാണ് അപകടം.ബസിൽ 50 യാത്രക്കാർ ഉണ്ടായിരുന്നു.മരണ സംഖ്യ ഇനിയും ഉയരാനാണ്‌ സാധ്യത.യാത്രക്കാരിൽ 14 പേർ നീന്തി രക്ഷപ്പെട്ടിട്ടുണ്ട്.മറ്റുള്ളവർക്കായി തിരച്ചിൽ തുടരുകയാണ്.രക്ഷപ്പെട്ടവരെ സമീപത്തുള്ള ആശുപത്രിയിൽ പ്രവേശിപ്പിച്ചു.

കൊച്ചി:കൊച്ചിയിൽ നടി ആക്രമിക്കപ്പെട്ട കേസിൽ ജാമ്യത്തിലിറങ്ങിയ ദിലീപ് അന്വേഷണ സംഘത്തിനെതിരെ ആഭ്യന്തര സെക്രെട്ടറിക്ക് പരാതി നൽകി.കേസിൽ തന്നെ ഒന്നാം പ്രതിയാക്കാൻ ഗൂഢാലോചന നടക്കുന്നു എന്ന് കാണിച്ചാണ് പരാതി നൽകിയിരിക്കുന്നത്.ഒരു സാക്ഷിമൊഴിയടക്കം മൂന്നു തെളിവുകൾ അന്വേഷണ സംഘത്തിന് ലഭിച്ചതിനെ തുടർന്ന് കേസിൽ ദിലീപിനെ ഒന്നാം പ്രതിയാക്കാൻ അന്വേഷണ സംഘം തീരുമാനിച്ചിരുന്നു.ഇതിനു പിന്നാലെയാണ് ദിലീപ് പരാതിയുമായി രംഗത്തെത്തിയിരിക്കുന്നത്.അതേസമയം നടി ആക്രമിക്കപ്പെട്ട കേസ് പ്രത്യേക കോടതിയിലേക്ക് മാറ്റണമെന്ന് അന്വേഷണ സംഘം കോടതിയിൽ ആവശ്യപ്പെടും.കുറ്റപത്രം സമർപ്പിച്ചാലുടൻ അന്വേഷണ സംഘം കോടതിയിൽ ഇക്കാര്യം വ്യക്തമാക്കും.അടുത്ത മാസത്തോടെ കുറ്റപത്രം സമർപ്പിക്കാനാണ് അന്വേഷണ സംഘം തീരുമാനിച്ചിരിക്കുന്നത്.

കാഞ്ഞങ്ങാട്:രാത്രിയിൽ മദ്യപിച്ച് ലേഡീസ് ഹോസ്റ്റലിലെത്തിയ എ.ആർ ക്യാമ്പിലെ പോലീസുകാരനെ സസ്‌പെൻഡ് ചെയ്തു.കയ്യൂരിലെ ശ്രീജിത്തിനെയാണ്(40)സസ്‌പെൻഡ് ചെയ്തത്.കാഞ്ഞങ്ങാട് ഡിവൈഎസ്പിയുടെ ഡ്രൈവറാണ് ഇയാൾ.കഴിഞ്ഞ ദിവസം കണ്ണൂർ സർവകലാശാല നീലേശ്വരം പാലാടത്തടത്തെ ക്യാമ്പസിലെ വനിതാ ഹോസ്റ്റലിൽ കയറിയ ഇയാൾ കാന്റീൻ ജനാലയിലൂടെ കൈയ്യിടുകയായിരുന്നു.കാന്റീനിലുള്ള പെൺകുട്ടികൾ ഒച്ചവെച്ചതോടെ ആളുകൾ ഓടിക്കൂടി.പിന്നീട് ഇയാളെ ചോദ്യം ചെയ്തപ്പോഴാണ് പോലീസുകാരനാണെന്നു മനസ്സിലായത്.നീലേശ്വരം പോലിസെത്തി കസ്റ്റഡിയിലെടുത്ത ശേഷം ആശുപത്രിയിലെത്തിച്ചു പരിശോധിച്ചപ്പോൾ ഇയാൾ മദ്യപിച്ചിട്ടുണ്ടെന്ന് മനസ്സിലായി.എന്നാൽ വീട്ടിലേക്ക് പോകുന്ന വഴി നാട്ടുകാർ തടഞ്ഞു നിർത്തി മർദിച്ചുവെന്നാണ് ഇയാൾ പൊലീസിന് നൽകിയ മൊഴി.പോലീസ് നടത്തിയ അന്വേഷണത്തിൽ ഇയാൾ പറഞ്ഞത് കളവാണെന്ന് ബോധ്യപ്പെട്ടതിനെ തുടർന്ന് ഇയാളെ അന്വേഷണ വിധേയമായി സസ്‌പെൻഡ് ചെയ്യുകയായിരുന്നു.

കണ്ണൂർ:മോഹൻലാലിൻറെ ഏറ്റവും പുതിയ ചിത്രമായ വില്ലൻ മൊബൈൽ ഉപയോഗിച്ച് പകർത്താൻ ശ്രമിച്ച യുവാവിനെ പിടികൂടി.ചെമ്പന്തൊട്ടി സ്വദേശിയായ യുവാവാണ് പിടിയിലായത്.മോഹൻലാലിൻറെ കടുത്ത ആരാധകനായ ഇയാൾ അതിരാവിലെ തന്നെ ഷോ കാണാനായി തീയേറ്ററിലെത്തിയിരുന്നു.വെള്ളിയാഴ്ച രാവിലെ കണ്ണൂർ സവിത ഫിലിം സിറ്റിയിൽ നടന്ന ചിത്രത്തിന്റെ ആദ്യ ഷോയ്ക്കിടെ ആയിരുന്നു സംഭവം.യുവാവ് മൊബൈലിൽ സിനിമ പകർത്തുന്നത് കണ്ടവർ വിതരണക്കാരുടെ പ്രതിനിധിയെ വിവരമറിയിക്കുകയായിരുന്നു.പിന്നീട് പോലീസെത്തി പരിശോധിച്ചപ്പോൾ പടത്തിന്റെ ടൈറ്റിൽ ഉൾപ്പെടെ ഒന്നരമിനിറ്റ് ദൃശ്യങ്ങൾ മാത്രമാണ് ഇയാൾ പകർത്തിയതെന്ന് തെളിഞ്ഞു.ചോദ്യം ചെയ്യലിൽ മോഹൻലാലിൻറെ കടുത്ത ആരാധകനാണ് ഇയാൾ എന്ന് മനസ്സിലായി.തുടർന്ന് പോലീസ് സിനിമയുടെ സംവിധായകൻ ബി.ഉണ്ണികൃഷ്‌ണയുമായി ബന്ധപ്പെട്ടു.പിന്നീട് മോഹൻലാലിനോടും നിർമാതാവിനോടും ആലോചിച്ച ശേഷം പരാതിയില്ലെന്നും കേസെടുക്കേണ്ടെന്നും അറിയിക്കുകയായിരുന്നു.

ഇരിട്ടി:പഴശ്ശി പദ്ധതിപ്രദേശത്ത് ആരംഭിക്കുന്ന രണ്ടാമത്തെ ജലവൈദ്യുത പദ്ധതിയായ പഴശ്ശിസാഗർ ജലവൈദ്യുത പദ്ധതി നിർമാണത്തിന് മുന്നോടിയായി പദ്ധതി പ്രദേശത്ത് ഭൂമി പൂജ നടത്തി.കരാർ കമ്പനിയായ തമിഴ്‌നാട് ഈറോഡിലെ ആർ എസ് ഡെവലപ്പേഴ്‌സാണ് ഭൂമിപൂജ നടത്തിയത്.നിർമാണ കമ്പനിക്കായി പഴശ്ശി പദ്ധതി പ്രദേശത്ത് നൽകിയ 3.5 ഹെക്റ്റർ ഭൂമിയിലാണ് പൂജ നടന്നത്. ഒരുമാസത്തിനുള്ളിൽ പ്രവൃത്തി ഉൽഘാടനം നടക്കും.ഈ സ്ഥലത്തെ മരങ്ങൾ മുറിച്ചു മാറ്റുന്നതിനായി കഴിഞ്ഞ ദിവസം ലേലം നടന്നുവെങ്കിലും ഉറപ്പിക്കാനായില്ല.7.5 മെഗാവാട്ടിന്റെ പദ്ധതിയാണ് പഴശ്ശി സാഗർ ലക്ഷ്യമിടുന്നത്.79.85 കോടിയാണ് പദ്ധതിയുടെ ചിലവ് പ്രതീക്ഷിക്കുന്നത്.50 കോടിയുടെ സിവിൽ പ്രവൃത്തി ടെണ്ടറായിട്ടുണ്ട്.ട്രാൻസ്മിഷൻ പ്രവൃത്തിയും യന്ത്രങ്ങളുടെ വാങ്ങലും രണ്ടാം ഘട്ടത്തിൽ ടെൻഡർ ചെയ്യാനാണ് തീരുമാനം.സംഭരണിയിൽ 19.50 മീറ്റർ വെള്ളം ഉണ്ടെങ്കിൽ പോലും വൈദ്യുതി ഉൽപ്പാദിപ്പിക്കാൻ കഴിയുന്ന വിധത്തിലാണ് കെഎസ്ഇബി ഈ പദ്ധതി തയ്യാറാക്കിയിരിക്കുന്നത്.സംഭരണിയിൽ നിന്നും 80 മീറ്റർ നീളത്തിൽ വലിയ തുരങ്കം നിർമിച്ചു അവിടെ നിന്നും മൂന്നു ചെറിയ തുരങ്കം വഴി പവർ ഹൗസിലേക്ക് വെള്ളം എത്തിച്ചാണ് ജനറേറ്റർ പ്രവർത്തിപ്പിക്കുക.ജൂൺ മുതൽ നവംബർ  വരെയുള്ള ആറുമാസക്കാലത്ത് വളപട്ടണം പുഴയിലേക്ക് ഒഴുക്കിവിടുന്ന വെള്ളം ഉപയോഗിച്ച് പ്രതിവർഷം 25.16 മില്യൺ യുണിറ്റ് വൈദ്യുതി നിർമിക്കാനാണ് പദ്ധതി ലക്ഷ്യമിടുന്നത്.