News Desk

ശ്രീകണ്ഠാപുരം:ഓൺലൈനിലൂടെ ചുരിദാർ ബുക്ക് ചെയ്ത യുവതിക്ക് ബാങ്ക് അക്കൗണ്ടിൽ നിന്ന് ഒരു ലക്ഷത്തിലേറെ രൂപ നഷ്ടപ്പെട്ടതായി പരാതി. കൂട്ടുംമുഖം എള്ളരിഞ്ഞിയിലെ പ്രാട്ടൂൽ പ്രിയേഷിന്റെ ഭാര്യ ചെല്ലേട്ടൻ വീട്ടിൽ രജനയാണ് തട്ടിപ്പിനിരയായത്. 100,299 രൂപയാണ് യുവതിക്ക് നഷ്ടമായത്.സിലൂറി ഫാഷൻ എന്ന സ്ഥാപനത്തിന്റെ ഫേസ്ബുക്കിലെ പരസ്യം കണ്ടാണ് രജന 299 രൂപ വിലയുള്ള ചുരിദാർ ഓൺലൈൻ വഴി ബുക്ക് ചെയ്തത്. 299 രൂപ ഗൂഗിൾ പേ വഴി മുൻകൂറായി അടയ്‌ക്കുകയും ചെയ്തു. ഒരാഴ്ച കഴിഞ്ഞിട്ടും ചുരിദാർ ലഭിക്കാത്തതിനെ തുടർന്ന് സ്ഥാപനത്തിന്റെ ഫോണിലേക്ക് വിളിച്ചു.തുടർന്ന് വിലാസം പരിശോധിക്കുന്നതിനായി രജിസ്‌ട്രേഡ് മൊബൈൽ നമ്പറിൽ നിന്ന കമ്പനിയുടെ നമ്പറിലേക്ക് സന്ദേശമയക്കണമെന്ന് ആവശ്യപ്പെട്ടു. സന്ദേശം അയച്ചതിന് പിന്നാലെ രജനയുടെ എസ്ബിഐ അക്കൗണ്ടിൽ നിന്ന് പണം നഷ്ടപ്പെടുകയായിരുന്നു. ആറുതവണയായാണ് പണം നഷ്ടപ്പെട്ടത്. ആദ്യം ചുരിദാർ ബുക്ക് ചെയ്ത 299 രൂപയടക്കം 1,00,299 രൂപ രജനയ്‌ക്ക് നഷ്ടമായി. യുവതിയുടെ പരാതിയിൽ ശ്രീകണഠാപുരം പോലീസ് കേസെടുത്ത് അന്വേഷണം ആരംഭിച്ചു.

കോഴിക്കോട്: കരിപ്പൂർ വിമാനത്താവളത്തിൽ വീണ്ടും സ്വർണ്ണവേട്ട. അടി വസ്ത്രത്തിനുള്ളിൽ ഒളിപ്പിച്ചു കടത്താൻ ശ്രമിച്ച 99 ലക്ഷം രൂപ വില വരുന്ന സ്വർണ്ണം പിടികൂടി.സംഭവത്തിൽ ഷാർജ്ജയിൽ നിന്നും കോഴിക്കോടെത്തിയ ഐഎക്‌സ് 354 വിമാനത്തിലെ എയർഹോസ്റ്റസ് മലപ്പുറം ചുങ്കത്തറ സ്വദേശി പി. ഷഹാന (30) പിടിയിലായി. ഇവരെ അറസ്റ്റ് ചെയ്തു. 2.4 കിലോഗ്രാം സ്വർണ്ണ മിശിത്രത്തിൽ നിന്നും 2.054 കിലോഗ്രാം സ്വർണ്ണം വേർതിരിച്ചെടുത്തുവെന്ന് കസ്റ്റംസ് അറിയിച്ചു.കോഴിക്കോട് ഡിആർഐ ഉദ്യോഗസ്ഥർക്ക് ലഭിച്ച രഹസ്യ വിവരത്തെ തുടർന്ന് എയർ കസ്റ്റംസ് ഇന്റലിജൻസുമായി ചേർന്ന് നടത്തിയ പരിശോധനയിലാണ് സ്വർണ്ണ മിശ്രിതം പിടികൂടുന്നത്. ഷഹാനയെ ചോദ്യം ചെയ്ത് വരികയാണെന്ന് കസ്റ്റംസ് ഉദ്യോഗസ്ഥർ അറിയിച്ചു.

കണ്ണൂർ: കണ്ണൂരിലെ വിവിധ ഇടങ്ങളില്‍ വനം വകുപ്പ് നടത്തിയ പരിശോധനയില്‍ 20 ലക്ഷത്തോളം രൂപ വില വരുന്ന 133 കിലോ ചന്ദനവുമായി മൂന്നു പേര്‍ അറസ്റ്റില്‍.വെള്ളോറ സ്വദേശികളായ ഗോപാലകൃഷ്ണന്‍ ( 48 ), പ്രദീപ് (48 ), ബിനേഷ് കുമാര്‍ (43) എന്നിവരാണ് അറസ്റ്റിലായത്.ഇവരില്‍ നിന്ന് 17 കിലോ ചന്ദനമാണ് പിടിച്ചെടുത്തത്. ഇവരില്‍നിന്നു ലഭിച്ച വിവരത്തിന്റെ അടിസ്ഥാനത്തില്‍ മുഖ്യപ്രതിയായ മാതമംഗലം പെരുവമ്പ സ്വദേശി നസീറിന്റെ വീട്ടില്‍ നടത്തിയ പരിശോധനയില്‍ 116 കിലോ ചന്ദനവും പിടിച്ചെടുത്തു.പ്രധാന പ്രതിയടക്കം രണ്ട് പേര്‍ ഓടി രക്ഷപ്പെട്ടു. തലവില്‍ കേന്ദ്രീകരിച്ചു ചന്ദനമരം മുറിച്ചു കടത്തുന്ന സംഘം പ്രവര്‍ത്തിച്ചു വരുന്നുണ്ടെന്ന രഹസ്യ വിവരം ലഭിച്ചതിന്റെ അടിസ്ഥാനത്തിലായിരുന്നു പരിശോധന.മുറിക്കാന്‍ ഉപയോഗിച്ച ആയുധങ്ങളും ഇവരില്‍നിന്നു കണ്ടെടുത്തിട്ടുണ്ട്. തളിപ്പറമ്പ് ഫോറസ്റ്റ് റേഞ്ച് ഓഫീസര്‍ വി രതീശന്റെ നേതൃത്വത്തില്‍ നടത്തിയ ചോദ്യം ചെയ്യലിലാണ് നസീറിനെക്കുറിച്ചുള്ള വിവരം ലഭിച്ചത്. വനം വകുപ്പ് എത്തുന്നതിനു മുന്‍പ് തന്നെ നസീര്‍ ഓടി രക്ഷപ്പെട്ടിരുന്നു. പ്രതികളുടെ രണ്ട് ബൈക്കുകളും പിടികൂടിയിട്ടുണ്ട്.ഓടി രക്ഷപ്പെട്ട പ്രതികള്‍ക്കായുള്ള അന്വേഷണം വനം വകുപ്പ് ഊര്‍ജിതമാക്കി.

കോട്ടയം:കോട്ടയത്ത് നാലംഗ കുടുംബം ആസിഡ് കുടിച്ച്‌ ആത്മഹത്യയ്ക്ക് ശ്രമിച്ചു.രണ്ടുപേര്‍ മരിച്ചു. കോട്ടയം ബ്രഹ്മമംഗലത്ത് സുകുമാരന്റെ ഭാര്യ സീന(54), മൂത്തമകള്‍ സൂര്യ (27) എന്നിവരാണ് മരിച്ചത്. സുകുമാരനും ഇളയമകള്‍ സുവര്‍ണയും അതീവ ഗുരുതരാവസ്ഥയില്‍ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.ഇന്നലെ രാത്രി 10.55ഓടുകൂടിയാണ് ഇവര്‍ ആസിഡ് കുടിച്ച്‌ ആത്മഹത്യാശ്രമം നടത്തിയത്.തുടർന്ന് അവശനിലയിലായ ഇവരെ നാട്ടുകാർ ആശുപത്രിയിലേക്ക് കൊണ്ടുപോകുകയായിരുന്നു. മുട്ടുറിചിറയിലെ സ്വകാര്യ ആശുപത്രിയിലാണ് ആദ്യം എത്തിച്ചത്. എന്നാൽ നില അതീവ ഗുരുതരമായതിനാൽ കോട്ടയം മെഡിക്കൽ കോളേജിലേക്ക് കൊണ്ടുപോകുകയായിരുന്നു. സ്വകാര്യ ആശുപത്രിയിലേക്കുള്ള വഴിയിലാണ് സീന മരിച്ചത്. കോട്ടയത്തേക്ക് കൊണ്ടുപോകും വഴി സൂര്യയും മരണത്തിന് കീഴടങ്ങുകയായിരുന്നു. അടുത്തിടെ സുകുമാരന്റെ മൂത്തമകള്‍ സൂര്യയുടെ വിവാഹം മുടങ്ങിയിരുന്നു. അതിന്റെ മാനസിക പ്രയാസത്തിലാകും ആത്മഹത്യയെന്നാണ് പൊലീസ് പറയുന്നത്.അയല്‍വാസികളാണ് സംഭവം ആദ്യം അറിഞ്ഞത്. രണ്ട് പെണ്‍കുട്ടികളും അടുത്തിടെ മാനസിക ചികിത്സ നടത്തിയിരുന്നതായും ബന്ധുക്കള്‍ പറയുന്നു.