പാപ്പിനിശ്ശേരി:പാപ്പിനിശ്ശേരിയിൽ ചൈന ക്ലേ ആൻഡ് സിറാമിക്സ് തൊഴിലാളികൾ കഴിഞ്ഞ ഒരുമാസമായി പാപ്പിനിശ്ശേരി കേന്ദ്ര ഓഫീസിന് മുൻപിൽ നടത്തിവന്ന സമരം പിൻവലിച്ചു. വ്യാഴാഴ്ച വൈകുന്നേരം വ്യവസായ മന്ത്രി എ.സി മൊയ്ദീനുമായി സംയുക്ത സമര സമിതി നേതാക്കൾ നടത്തിയ ചർച്ചയെ തുടർന്നാണ് സമരം പിൻവലിച്ചത്.തൊഴിലാളികൾക്ക് 2018 മാർച്ച് വരെ ആഴ്ചയിൽ നാല് ദിവസം തൊഴിൽ നൽകാനും തുടർന്ന് വൈവിധ്യവൽക്കരണം പൂർത്തിയാക്കിയ ശേഷം മുഴുവൻ ദിവസവും തൊഴിൽ നൽകാനും ചർച്ചയിൽ തീരുമാനമായി. ഇതേ തുടർന്ന് സമരം പിൻവലിക്കുകയായിരുന്നു.
പാനൂർ:പുത്തൂരിൽ സിപിഎം പ്രവർത്തകന് വെട്ടേറ്റു.ഇന്നലെ രാത്രി പത്തുമണിയോടെ മടപ്പുര ബസ്‌സ്റ്റോപ്പിന് സമീപമാണ് അക്രമം നടന്നത്.കുണ്ടുംകരവയൽ തച്ചാറമ്പത്ത് റിയ മൻസിലിൽ അശ്രഫിനാണ് വെട്ടേറ്റത്.അക്രമത്തിൽ രണ്ടു കാലുകൾക്കും ഇടതു കൈക്കും വയറിനും പരിക്കേറ്റ അഷ്‌റഫിനെ പാനൂർ പോലീസ് എത്തിയാണ് തലശ്ശേരി സഹകരണ ആശുപത്രിയിൽ പ്രവേശിപ്പിച്ചത്.ഇയാളെ അടിയന്തിര ശസ്ത്രക്രിയയ്ക്ക് വിധേയനാക്കി.അക്രമം നടന്ന സ്ഥലത്ത് രണ്ടു തവണ ബോംബ് സ്ഫോടനവുമുണ്ടായി.അക്രമത്തിനു പിന്നിൽ ആർഎസ്എസ് പ്രവർത്തകരാണെന്ന് സിപിഎം നേതൃത്വം ആരോപിച്ചു.
ഡാളസ്:അമേരിക്കയിലെ ടെക്സസിൽ മൂന്നു വയസുകാരി ഷെറിൻ മാത്യൂസ് ദുരൂഹ സാഹചര്യത്തിൽ മരിച്ച സംഭവത്തിൽ വളർത്തമ്മ മലയാളി സിനി മാത്യൂസ് അറസ്റ്റിൽ. മൂന്നു വയസുകാരിയെ വീട്ടിൽ തനിച്ചാക്കിയത് അപകടത്തിന് ഇടയാക്കിയെന്ന കുറ്റത്തിനാണ് അറസ്റ്റ്. കേസിൽ ഭർത്താവ് വെസ്‌ലി മാത്യൂവിനെ പോലീസ് നേരത്തെ അറസ്റ്റ് ചെയ്തിരുന്നു.എറണാകുളം സ്വദേശികളായ വെസ്‌ലി മാത്യുവും ഭാര്യ സിനിയും ചേർന്ന് ബിഹാറിലെ മദർ തെരേസ അനാഥ് സേവാ ആശ്രമത്തിൽ നിന്നാണ് ഷെറിനെ ദത്തെടുത്ത്.ഇക്കഴിഞ്ഞ ഒക്ടോബർ ഏഴിനാണ് ഷെറിനെ കാണാതാവുന്നത്.വളർച്ചാപ്രശ്നം നേരിടുന്ന കുട്ടി പാലു കുടിക്കാൻ വിസമ്മതിച്ചപ്പോൾ വീടിനു പുറത്തുനിർത്തി ശിക്ഷിക്കുകയായിരുന്നുവെന്നും തുടര്‍ന്ന് കാണാതാകുകയുമായിരുന്നെന്നാണ് വെസ്‌ലി പോലീസിന് നല്‍കിയ മൊഴി.എന്നാൽ രണ്ടാഴ്ചയ്ക്കു ശേഷം തിങ്കളാഴ്ച കുഞ്ഞിന്‍റേതെന്നു കരുതുന്ന മൃതദേഹം വീട്ടിൽനിന്ന് മുക്കാൽ കിലോമീറ്റർ അകലെ കലുങ്കിനടിയിൽ കണ്ടെത്തി.എന്നാൽ പിനീടുള്ള ചോദ്യം ചെയ്യലിൽ നിർബന്ധിച്ചു പാലു കുടിപ്പിച്ചപ്പോൾ ശ്വാസംമുട്ടിയാണ് കുഞ്ഞ് മരിച്ചതെന്നും പരിഭ്രാന്തി മൂലം മൃതദേഹം ഉപേക്ഷിക്കുകയായിരുന്നുവെന്നും ഇയാള്‍ കുറ്റം സമ്മതിക്കുകയായിരുന്നു.
കാസർകോഡ്:കാഞ്ഞങ്ങാട് വീട്ടമ്മയെ കുളിമുറിയിൽ കൊല്ലപ്പെട്ട നിലയിൽ കണ്ടെത്തിയ കേസിൽ പ്രതി പോലീസ് പിടിയിലായി.ലീലയുടെ വീട്ടിൽ തേപ്പുപണിക്കെത്തിയ പശ്ചിമ ബംഗാൾ സ്വദേശി അപുൽഷെയ്ക്കാണ്(20) അറസ്റ്റിലായത്.സംഭവവുമായി ബന്ധപ്പെട്ട് ഇന്നലെ നാല് ഇതരസംസ്ഥാന തൊഴിലാളികളെ പോലീസ് കസ്റ്റഡിയിലെടുത്തിരുന്നു.മൂന്നു ദിവസം മുൻപാണ് ഇയാൾ മറ്റു തൊഴിലാളികൾക്കൊപ്പം ഇവിടെ ജോലിക്കെത്തിയത്. അപുൽഷെയ്ക്ക് പണിയെടുക്കുന്നില്ലെന്നും ഇയാളെ പണിക്ക് വേണ്ടെന്നും ലീല കരാറുകാരനോട് പറഞ്ഞിരുന്നത്രെ. മറ്റുള്ളവർ പണിയെടുക്കുമ്പോൾ ഇയാൾ വെറുതെ നടക്കുന്നതിനു ലീല ഇയാളെ വഴക്കുപറയാറുണ്ടായിരുന്നു.സംഭവദിവസമായ ബുധനാഴ്ചയും പണിയെടുക്കാത്തതിന് ലീല ഇയാളെ വഴക്കു പറഞ്ഞിരുന്നു.പിന്നീട് ലീല കുളിമുറിയിലെത്തിയപ്പോൾ ഇയാളും അവിടെയെത്തി.എന്തിനാണ് കുളിമുറിയിൽ വന്നതെന്ന് ചോദിച്ചു ലീല ഇയാളെ വഴക്കുപറയുന്നതിനിടയിൽ ഇയാൾ ലീലയുടെ കഴുത്തിൽ ശക്തമായി കുത്തിപ്പിടിക്കുകയായിരുന്നു. ഇതിനെ തുടർന്ന് ലീലയുടെ കഴുത്തിലെ എല്ലു നുറുങ്ങുകയും കുഴഞ്ഞു വീഴുകയും ചെയ്തു.പിന്നീട് ഇയാൾ ലീലയുടെ കഴുത്തിൽ കിടന്ന മാല ഊരിയെടുത്തു ടൗവ്വലിൽ പൊതിഞ്ഞു.ആശുപത്രിയിൽ നിന്നും തിരികെയെത്തിയ ലീലയുടെ മകനും ബന്ധുക്കളും മാല തിരയുന്നതിനിടയിൽ ആരും കാണാതെ പ്രതി ടൗവ്വലിൽ പൊതിഞ്ഞ മാല പുറത്തേക്ക് വലിച്ചെറിയുകയായിരുന്നു. കഴിഞ്ഞ ബുധനാഴ്ചയാണ് ലീലയെ കുളിമുറിയിൽ മരിച്ച നിലയിൽ കണ്ടെത്തിയത്.ഹൃദയാഘാതം മൂലമാണ് മരിച്ചതെന്നാണ് ആദ്യം കരുതിയത്.എന്നാൽ കഴുത്തിൽ കണ്ട പാടുകളും മാല കാണാതായതും സംശയത്തിനിടയാക്കി.തുടർന്നാണ് കൊലപാതകമാണെന്ന് കണ്ടെത്തിയത്.
തിരുവനന്തപുരം:തിരുവനന്തപുരത്ത് ഇന്നലെ രാത്രി നടന്ന കാറപകടത്തിൽ യുവാവ് മരിച്ചു.നാലുപേർക്ക് പരിക്കേറ്റിട്ടുണ്ട്.ഇന്നലെ രാത്രി പതിനൊന്നു മണിയോടെ ആയിരുന്നു അപകടം.വള്ളക്കടവ് പെരുന്താന്നി സുഭാഷ് നഗറിൽ സുബ്രഹ്മണ്യന്റെ മകൻ ആദർശ് ആണ് മരിച്ചത്.കാറിലുണ്ടായിരുന്ന മൂന്നു പെൺകുട്ടികളിൽ രണ്ടുപേരുടെ നില ഗുരുതരമാണ്.പുതിയ കാറുമായി നടത്തിയ മത്സരയോട്ടമാണ് അപകടമുണ്ടാക്കിയതെന്ന് ദൃക്‌സാക്ഷികൾ പറഞ്ഞു. വെള്ളയമ്പലം ഭാഗത്തു നിന്നും കാവടിയാറിലേക്ക് ബെൻസ് കാറുമായി മത്സരയോട്ടം നടത്തിയ പുത്തൻ സ്കോഡ ഒക്റ്റാവിയ കാറാണ് അപകടത്തിൽപ്പെട്ടത്.കഴിഞ്ഞ ദിവസം എറണാകുളത്ത് താൽക്കാലിക രെജിസ്ട്രേഷൻ നടത്തി റോഡിലിറക്കിയതാണ് കാർ. കാർ ഓട്ടോറിക്ഷയിൽ ഇടിച്ച ശേഷം നിയന്ത്രണം വിട്ട് വൈദ്യുതിപോസ്റ്റിലിടിച്ച് തലകീഴായി മറിയുകയായിരുന്നു. തിരുവനന്തപുരം സ്വദേശികളായ അനന്യ,ഗൗരി,എറണാകുളളം സ്വദേശിനി ശില്പ, ഓട്ടോഡ്രൈവർ പാപ്പനംകോട് സ്വദേശി സജികുമാർ എന്നിവർക്കാണ് പരിക്കേറ്റത്. കാറിലുണ്ടായിരുന്ന പെൺകുട്ടികളെ പോലീസെത്തി പുറത്തെടുത്തെങ്കിലും ആദർശ് ഡ്രൈവിംഗ് സീറ്റിനുള്ളിൽ കുടുങ്ങി പോയി.പിന്നീട് ഫയർ ഫോഴ്‌സെത്തി കാർ വെട്ടിപ്പൊളിച്ചാണ് ആദർശിനെ പുറത്തെടുത്തത്.
മട്ടന്നൂർ:ഉരുവച്ചാൽ ശിവപുരത്ത് നാലുപേർക്ക് കുറുക്കന്റെ കടിയേറ്റു.ശിവപുരം സ്വദേശികളായ അബൂട്ടി,മകൾ തസ്‌ലീന,ജാവീദ്,ദിലീപ് എന്നിവർക്കാണ് കടിയേറ്റത്. അബൂട്ടിയെ കുറുക്കൻ കടിക്കുന്നത് കണ്ട് രക്ഷപ്പെടുത്താൻ എത്തിയതാണ് മകൾ തസ്‌ലീന. ഇവരുടെ ബഹളം കേട്ട് ഓടിയെത്തിയ അയൽക്കാരായ ജാവീദ്,ദിലീപ് എന്നിവരെയും കുറുക്കൻ ആക്രമിക്കുകയായിരുന്നു.
കോഴിക്കോട്:കരിപ്പൂർ വിമാനത്താവളത്തിൽ വൻ സ്വർണ്ണവേട്ട.അനധികൃതമായി കടത്താൻ ശ്രമിച്ച 6.5 കിലോഗ്രാം സ്വർണമാണ് ഡയറക്റ്ററേറ്റ് ഓഫ് റെവന്യൂ ഇന്റലിജൻസ് പിടികൂടിയത്. അന്താരാഷ്ട്ര വിപണിയിൽ രണ്ടു കോടി രൂപ വിലവരുന്നവയാണ് പിടിച്ചെടുത്ത സ്വർണ്ണം. രണ്ടുപേരിൽ നിന്നായാണ് സ്വർണ്ണം പിടികൂടിയത്. സംഭവത്തിൽ കോഴിക്കോട് മുക്കം സ്വദേശി ശിഹാബുദ്ധീൻ,മടവൂർ സ്വദേശി സജിൻ എന്നിവരെ ഡിആർഐ അറസ്റ്റ് ചെയ്തു.ശിഹാബുദ്ധീൻ ഷാർജയിൽ നിന്നും സജിൻ അബുദാബിയിൽ നിന്നുമാണ് വിമാനത്താവളത്തിലെത്തിയത്.
ശബരിമല:മണ്ഡല മകരവിളക്ക് മഹോത്സവത്തിനായി ശബരിമല നട തുറന്നു.ഇന്ന് പുലർച്ചെ മുതൽ ശബരിമലയിൽ വൻ ഭക്തജന തിരക്കാണ് അനുഭവപ്പെടുന്നത്.ഈ തീർത്ഥാടന കാലത്തെ പൂജകൾക്ക് ഗണപതിഹോമത്തോട് കൂടിയാണ് തുടക്കമായത്.പുതിയ മേല്ശാന്തിമാരുടെ സ്ഥാനാരോഹണ ചടങ്ങുകൾക്ക് ശേഷം രാത്രി പത്തുമണിക്ക് ഹരിവരാസനം പാടി നടയടച്ചു.പിന്നാലെ പഴയ മേല്ശാന്തിമാർ പടി ഇറങ്ങി.ഇന്ന് രാവിലെ മൂന്നു മണിക്ക് നിർമ്മാല്യ ദർശനത്തിനായി നട തുറന്നു. തിരക്ക് കണക്കിലെടുത്ത് വരും ദിവസങ്ങളിൽ രാവിലെ മൂന്നു മണിക്ക് നട തുറക്കും രാത്രി പതിനൊന്നു മണിക്ക് ഹരിവരാസനം പാടി നട അടയ്ക്കും. ശക്തമായ സുരക്ഷാ ക്രമീകരണങ്ങളാണ് സന്നിധാനത്ത് ഒരുക്കിയിരിക്കുന്നത്. ആയിരത്തിലധികം പൊലിസുകാരാണ് ശബരിമല സന്നിധാനത്ത് ഡ്യൂട്ടിയിലുള്ളത്.
കോഴിക്കോട്:മുക്കം കെഎംസിടി മെഡിക്കൽ കോളേജിലെ അവസാന വർഷ എംബിബിഎസ്‌ വിദ്യാർത്ഥിനി കോളേജ് കെട്ടിടത്തിന് മുകളിൽ നിന്നും ചാടി ആത്മഹത്യ ചെയ്തു.തൃശൂർ ഇടതുരുത്തി സ്വദേശിനി ഊഷ്മൾ ഉല്ലാസാണ്(22) കെഎംസിടി ഡെന്റൽ കോളേജിന്റെ ആറാംനിലയിൽ നിന്നും ചാടി ആത്മഹത്യ ചെയ്തത്.ബുധനാഴ്ച വൈകിട്ടാണ് സംഭവം. ഇരുകാലിനും നട്ടെല്ലിനും ഗുരുതരമായി പരിക്കേറ്റ ഊഷ്‌മലിനെ കെഎംസിടി മെഡിക്കൽ കോളേജിലെ തീവ്ര പരിചരണ വിഭാഗത്തിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ബുധനാഴ്ച വൈകുന്നേരം നാലുമണിയോടുകൂടി ക്ലാസ് കഴിഞ്ഞ് ഹോസ്റ്റലിലെത്തിയ ഊഷ്മൾ 4.30 ഓടെ ഔട്ട് പാസ് എടുത്തു പുറത്തു പോവുകയായിരുന്നു.ഈ സമയം ഊഷ്മൾ ഫോണിൽ ആരോടോ കയർത്തു സംസാരിക്കുന്നതു കണ്ടതായി ഹോസ്റ്റലിലെ സുരക്ഷാ ജീവനക്കാരൻ പറയുന്നു.കെട്ടിടത്തിന് മുകളിൽ നിന്നും ചാടുന്നതിനു മുൻപായി ഊഷ്മൾ മൊബൈൽ ഫോൺ എറിഞ്ഞു പൊട്ടിച്ചിരുന്നു.മരിക്കുന്നതിന് മുൻപ് ഊഷ്മൾ അച്ഛനും അമ്മയ്ക്കുമായി എഴുതിയ കത്ത് പൊലീസിന് ലഭിച്ചു.
തളിപ്പറമ്പ്: തളിപ്പറമ്പ് നഗരസഭയിലെ ഹോട്ടലുകളില്‍ ആരോഗ്യവിഭാഗം അധികൃതർ നടത്തിയ മിന്നല്‍ പരിശോധനയിൽ തളിപ്പറമ്പ് ബസ് സ്റ്റാന്‍ഡ് പരിസരത്തെ ഹോട്ടലില്‍നിന്നും പഴകിയ ഭക്ഷണ സാധനങ്ങൾ പിടികൂടി. നഗരസഭയുടെ ഹെല്‍ത്ത് സ്ക്വാഡ് ഇന്നലെ രാവിലെയാണ് പരിശോധന നടത്തിയത്. മെയിന്‍ റോഡിലെ തവക്കല്‍ റസ്റ്റോറന്‍റില്‍നിന്നും നാലു ദിവസം പഴക്കമുള്ള ചിക്കന്‍ഫ്രൈ, സാമ്പാര്‍, പൂപ്പല്‍ കയറിയ നാരങ്ങ അച്ചാര്‍, പഴകിയ ചോറ് തുടങ്ങിയവയാണ് പിടികൂടിയത്. കൂടാതെ മൂന്നോളം ഹോട്ടലുകളുടെ പരിസരം വൃത്തിഹീനമാണെന്നും കണ്ടെത്തി. തുടര്‍ന്ന് ഇവക്ക് നോട്ടീസ് നല്‍കി. ആര്‍.ശ്രീജിത്ത്, ശൈലേഷ്, എസ്.അബ്ദുറഹ്മാന്‍, മനോജ് കുമാര്‍ എന്നിവരുടെ നേതൃത്വത്തിലായിരുന്നു പരിശോധന.