News Desk

കണ്ണൂർ:മാവോയിസ്റ്റ് ഭീഷണിയെ തുടർന്ന് കണ്ണൂർ കളക്റ്ററേറ്റിൽ സുരക്ഷ ശക്തമാക്കി. നിലമ്പൂരിൽ പോലീസുമായുണ്ടായ ഏറ്റുമുട്ടലിൽ മാവോവാദികൾ കൊല്ലപ്പെട്ടതിന്റെ വാർഷിക ദിനമായതിനാൽ ആക്രമണം നടന്നേക്കാനിടയുണ്ടെന്ന രഹസ്യാന്വേഷണ വിഭാഗത്തിന്റെ റിപ്പോർട്ടിന്റെ അടിസ്ഥാനത്തിലാണ് കനത്ത സുരക്ഷ ഏർപ്പെടുത്തിയത്. സുരക്ഷാ ക്രമീകരണത്തിന്റെ ഭാഗമായി ശനിയാഴ്ച കളക്റ്ററേറ്റിൽ ബോംബ് സ്ക്വാർഡും പരിശോധന നടത്തി.കളക്റ്ററേറ്റ് ഓഫീസിലെ അലമാരകൾ,ഫയലുകൾ, ശുചിമുറി, കളക്റ്ററേറ്റ് വളപ്പിൽ നിർത്തിയിട്ടതും ഉപയോഗശൂന്യമായതുമായ വാഹനങ്ങൾ പൂന്തോട്ടം, കാന്റീൻ  എന്നിവിടങ്ങളിലും പരിശോധന നടത്തി.ജില്ലയുടെ മലയോര മേഖലകളിൽ പോലീസ് റെഡ് അലെർട് പ്രഖ്യാപിച്ചിരുന്നു.ഇവിടെ തണ്ടർബോൾട്ട് ഉൾപ്പെടെയുള്ള സായുധ പോലീസിനെ കഴിഞ്ഞ ഒരാഴ്ചയായി വിന്യസിച്ചിട്ടുണ്ട്.

കണ്ണൂർ:കണ്ണൂർ ജില്ലാ ആശുപത്രിയുടെ നവീകരിച്ച മോർച്ചറിയിൽ ഈ മാസം 25 മുതൽ മൃതദേഹ പരിശോധന തുടങ്ങും.പുതിയ കെട്ടിടത്തിന്റെ ഉൽഘാടനം ഈ മാസം 21 ന് ആരോഗ്യമന്ത്രി കെ.കെ ശൈലജ നിർവഹിക്കും.ആശുപത്രിയിൽ താൽകാലിക ഒഴിവിലേക്ക് നേരിട്ട് നിയമനം നടത്താനും ജില്ലാ പഞ്ചായത്ത് പ്രസിഡന്റ് കെ.വി സുമേഷിന്റെ നേതൃത്വത്തിൽ ചേർന്ന ആശുപത്രി മാനേജ്‌മന്റ് യോഗം തീരുമാനിച്ചു.ആശുപത്രിയിൽ രാത്രികാലങ്ങളിൽ മോഷണ ശ്രമവും സാമൂഹ്യവിരുദ്ധ പ്രവർത്തനങ്ങളും ഉണ്ടാകുന്നതായുള്ള പരാതിയുടെ അടിസ്ഥാനത്തിൽ ആശുപത്രിയിൽ സെക്യൂരിറ്റി ജീവനക്കാരായി രണ്ടു വനിതകളെ അടക്കം അഞ്ചുപേരെ നിയമിക്കാനും തീരുമാനമായി.ആശുപത്രിയിലെ ഡയാലിസിസ് സെന്ററിൽ തീപിടുത്തമുണ്ടായ സംഭവത്തിൽ ഇലെക്ട്രിക്കൽ,പ്ലംബിംഗ് ജീവനക്കാരോട് വിശദീകരണം തേടാനും യോഗം തീരുമാനിച്ചു.ഇവിടെ ഷോർട് സർക്യൂട്ട് ഉള്ളതായി നേരത്തെ അറിയിച്ചിട്ടും ജീവനക്കാർ യഥാസമയം പരിശോധന നടത്തിയില്ലെന്നു പരാതിയുണ്ടായിരുന്നു.മന്ത്രി രാമചന്ദ്രൻ കടന്നപ്പള്ളിയുടെ എംഎൽഎ ഫണ്ടിൽ നിന്നും അനുവദിച്ച രണ്ടു ഡയാലിസിസ് യന്ത്രങ്ങളും ഉടൻ പ്രവർത്തനക്ഷമമാക്കുമെന്നും യോഗം തീരുമാനിച്ചു.

കോഴിക്കോട്:ലക്ഷങ്ങൾ വിലമതിക്കുന്ന മയക്കുമരുന്നുമായി എൻജിനീയറിങ് വിദ്യാർത്ഥി പോലീസ് പിടിയിലായി.യുവാക്കൾ കൂടുതലായും ഉപയോഗിക്കുന്ന എൽഎസ്‌ഡിയാണ് ഇയാളിൽ നിന്നും പിടികൂടിയത്.ഈറോഡ് മെക്കാനിക്കൽ എൻജിനീയറിങ് വിദ്യാർത്ഥിയായ കല്ലായി സ്വദേശി കുണ്ടുങ്ങൽ മനക്കാന്റകം വീട്ടിൽ ഷാനൂബാണ് പോലീസ് പിടിയിലായത്.ഗ്രാമിന് 10,000 രൂപ വിലവരുന്ന 165 ഗ്രാം എൽഎസ്‌ഡിയാണ് ഇയാളുടെ കൈയ്യിൽ നിന്നും കണ്ടെടുത്തത്. സംസ്ഥാനത്ത് ഇതാദ്യമായാണ് ഇത്രയും കൂടിയ അളവിൽ എൽഎസ്‌ഡി പിടികൂടുന്നതെന്ന് ഡിസിപി മെറിൻ ജോസഫ് പറഞ്ഞു.എട്ടു മുതൽ പതിനെട്ടു മണിക്കൂർ വരെ എൽഎസ്‌ഡിയുടെ ലഹരി നിലനിൽക്കും.ഹോളണ്ടിൽ നിന്നും ഓർഡർ ചെയ്തു വരുത്തിക്കുന്ന ഇവ നേപ്പാൾ വഴിയാണ് ഇന്ത്യയിലെത്തുന്നത്.കുറച്ചു നാളുകൾക്ക് മുൻപ് ലോഡ്ജ് മുറിയിൽ മയക്കുമരുന്ന് ഉപയോഗിച്ച് വിദ്യാർത്ഥി മരിച്ച സംഭവത്തെ തുടർന്ന് പോലീസ് നടത്തിയ അന്വേഷണത്തിലാണ് ഷാനൂബിനെ കുറിച്ച് വിവരം ലഭിക്കുന്നത്.പിന്നീട് കോഴിക്കോട് സിറ്റി പോലീസ് കമ്മീഷണർ എസ് കാളിരാജ് മഹേഷ്‌കുമാറിന്റെ നിർദേശപ്രകാരം യുവാവിനെ കേന്ദ്രീകരിച്ച് നടത്തിയ അന്വേഷണത്തിലാണ് എൽഎസ്‌ഡി പിടികൂടിയത്.