News Desk

കണ്ണൂർ:നാട്ടുകാരുടെ പ്രതിഷേധം ഭയന്ന് അപകടത്തിൽപ്പെട്ട ബസ് ഉപേക്ഷിച്ച് ജീവനക്കാർ ഓടിരക്ഷപ്പെട്ടു.കണ്ണൂർ താണയിലാണ് സംഭവം.കോഴിക്കോട് നിന്നും വരികയായിരുന്ന സ്വകാര്യ ബസ് താണ ബസ്‌സ്റ്റോപ്പിന് സമീപത്തു വെച്ച് ബൈക്കിൽ ഇടിക്കുകയായിരുന്നു.ഇന്നലെ രാത്രി എട്ടുമണിയോട് കൂടിയാണ് അപകടം നടന്നത്. അപകടത്തിൽ ബൈക്ക് യാത്രക്കാരാണ് ഗുരുതരമായി പരിക്കേറ്റിട്ടുണ്ടാകും എന്ന് തെറ്റിദ്ധരിച്ച ബസ് ജീവനക്കാർ ആക്രമണത്തെ ഭയന്ന് പുറകെ വന്ന ബസിൽ കയറി രക്ഷപ്പെടുകയായിരുന്നു. ബസിലുണ്ടായിരുന്ന യാത്രക്കാരും നാട്ടുകാരും അപകടം കണ്ട് ഞെട്ടലിൽ നിൽക്കുമ്പോഴായിരുന്നു ജീവനക്കാരുടെ ഈ ഒളിച്ചോട്ടം.ബസ്സ് ഇടിച്ചതിന്റെ ശക്തി അനുസരിച്ച് ബൈക്ക് യാത്രക്കാരന് സാരമായ പരിക്കേൽക്കേണ്ടതായിരുന്നു.എന്നാൽ ഇടിച്ചയുടനെ പുറത്തേക്ക് തെറിച്ചു വീണതിനാൽ ഇയാൾക്ക് കാലിനു നിസ്സാര പരിക്ക് മാത്രമേ ഉണ്ടായിരുന്നുള്ളൂ.അപകടത്തിൽ പരിക്കേറ്റ പള്ളിക്കുന്ന് സ്വദേശി അതുൽ കണ്ണൂർ സ്പെഷ്യലിറ്റി ഹോസ്പിറ്റലിൽ ചികിത്സ തേടി.അമിത വേഗതയാണ് അപകടത്തിന് കാരണമെന്നാണ് നാട്ടുകാർ പറയുന്നത്.ട്രാഫിക്,ടൌൺ പോലീസ് സ്ഥലത്തെത്തി ബസ് കസ്റ്റഡിയിലെടുത്തിട്ടുണ്ട്.

കൊച്ചി:നടിയെ ആക്രമിച്ച കേസിൽ ജയിലിൽ നിന്നും പുറത്തിറങ്ങിയ ദിലീപ് സാക്ഷികളെ സ്വാധീനിക്കാൻ ശ്രമിച്ചതായി അന്വേഷണസംഘം .തന്റെ വ്യാപാര സ്ഥാപനമായ ദേ പുട്ടിന്റെ ദുബായ് ശാഖയുടെ ഉൽഘാടനത്തിനായി ദുബായിൽ പോകാൻ അനുമതി ആവശ്യപ്പെട്ട് ദിലീപ് കോടതിയിൽ ഹർജി സമർപ്പിച്ചിരുന്നു.ഈ വിഷയത്തിൽ കോടതിയിൽ സമർപ്പിക്കുന്ന റിപ്പോർട്ടിലാണ് ദിലീപ് സാക്ഷികളെ സ്വാധീനിക്കാൻ ശ്രമിച്ച കാര്യം പോലീസ് ഉൾപ്പെടുത്തുക.ഇതിനാൽ ദിലീപിനെ വിദേശത്തു പോകാൻ അനുവദിക്കരുതെന്ന് പോലീസ് കോടതിയിൽ ആവശ്യപ്പെടും.ദിലീപിന്റെ ഭാര്യയും നടിയുമായ കാവ്യാ മാധവന്റെ വ്യാപാര സ്ഥാപനമായ ലക്ഷ്യയിലെ ജീവനക്കാരൻ അന്വേഷസംഘത്തിനു അനുകൂലമായി മൊഴി നൽകിയിരുന്നെങ്കിലും പിന്നീട് മൊഴി മാറ്റുകയായിരുന്നു.ഇത് ദിലീപിന്റെ സ്വാധീനത്താലാണെന്നാണ് അന്വേഷണ സംഘം പറയുന്നത്.അതുപോലെ തന്നെ കേസിലെ മുഖ്യപ്രതിയായ പൾസർ സുനിക്കൊപ്പം ജയിലിലുണ്ടായിരുന്ന ചാർളിയുടെ രഹസ്യമൊഴി പോലീസ് രേഖപ്പെടുത്തിയിരുന്നു.ചാർളിയെ മാപ്പു സാക്ഷി ആക്കാനായിരുന്നു പോലീസിന്റെ നീക്കം.എന്നാൽ ചാർളി കോടതിയിൽ ഹാജരായില്ല.ഇതും ദിലീപിന്റെ സ്വാധീനം കൊണ്ടാണെന്നാണ് പോലീസ് പറയുന്നത്.കുറ്റപത്രത്തിലും ദിലീപ് സാക്ഷികളെ സ്വാധീനിക്കാൻ ശ്രമിച്ചെന്ന കാര്യം പോലീസ് ഉൾപ്പെടുത്തിയേക്കും.

വടകര:വടകര തോടന്നൂരിൽ മുസ്ലിം ലീഗ് ഓഫീസ് തീയിട്ടു നശിപ്പിച്ചു.ഓഫീസിലെ ഫർണിച്ചറുകളും മറ്റും കത്തിനശിച്ചിട്ടുണ്ട്.അക്രമികളെ തിരിച്ചറിഞ്ഞിട്ടില്ല.ഇവിടെ സിപിഎം-ലീഗ് സംഘർഷം നിലനിൽക്കുന്നുണ്ട്.സംഘർഷാവസ്ഥ ഒഴിവാക്കുന്നതിനായി സ്ഥലത്ത് പോലീസ് പിക്കറ്റ് ഏർപ്പെടുത്തിയിട്ടുണ്ട്.