News Desk

തിരുവനന്തപുരം:സഹകരണമേഖലയിൽ കേരളാ ബാങ്ക് രൂപീകരിക്കുമെന്ന പ്രഖ്യാപനത്തിൽ നിന്നും സർക്കാർ പിന്മാറുന്നു.പകരം ജില്ലാ ബാങ്കുകളെ സംസ്ഥാന സഹകരണ ബാങ്കുകളിൽ ലയിപ്പിക്കും.ഇതിനായി സംസ്ഥാന സഹകരണ ബാങ്ക് മാനേജിങ് ഡയറക്റ്റർ നോഡൽ ഓഫീസറായി നിയമിച്ചു. കോഴിക്കോട്, തൃശൂർ,ഇടുക്കി തുടങ്ങിയ മിക്ക ജില്ലാബാങ്കുകളും എല്ലാ ആധുനിക സംവിധാനങ്ങളും ഉള്ളവയാണ്.സംസ്ഥാന ബാങ്കിൽ ലയിക്കുന്നതോടെ ഇവയുടെ ബാങ്കിങ് ലൈസൻസ് ഇല്ലാതാകും.ലയന ശേഷം റിസർവ് ബാങ്ക് സംസ്ഥാന ബാങ്കിന് ആധുനിക ബാങ്കിങ് സംവിധാനമൊരുക്കാൻ അനുമതി നൽകിയില്ലെങ്കിൽ അത് സഹകരണ മേഖലയ്ക്ക് ആകെ തിരിച്ചടിയാകും.നിഷ്ക്രിയ ആസ്തി അഞ്ചുശതമാനത്തിൽ കുറവായിരിക്കണം, മൂന്നുവർഷം തുടർച്ചയായി ലാഭത്തിലായിരിക്കണം,മൂലധന പര്യാപ്തത കുറഞ്ഞത് ഒൻപതുശതമാനമെങ്കിലും ഉണ്ടാകണം,റിസർവ് ബാങ്ക് അംഗീകരിച്ച കോർബാങ്കിങ് സംവിധാനം ഉണ്ടാകണം തുടങ്ങിയവയാണ് അനുമതി നകുന്നതിനായി റിസർവ് ബാങ്ക് മുന്നോട്ട് വെച്ചിരിക്കുന്ന മാനദണ്ഡങ്ങൾ. ഇവയൊന്നും സംസ്ഥാന സഹകരണ ബാങ്കിനില്ല.ജില്ലാ സഹകരണ ബാങ്കുകളുടെ ആകെ ലാഭത്തേക്കാൾ കൂടുതലാണ് സംസ്ഥാന സഹകരണ ബാങ്കിന്റെ നഷ്ട്ടം.നിഷ്ക്രിയ ആസ്തിയും റിസർവ് ബാങ്ക് നിർദേശിക്കുന്നതിനേക്കാൾ കൂടുതലാണ്.ഈ നിലയ്ക്ക് ഇന്റർനെറ്റ്-മൊബൈൽ ബാങ്കിങ്,എ ടി എം ഇവയൊന്നും സ്വന്തമായി നടത്താൻ സംസ്ഥാന ബാങ്കിന് അനുമതി കിട്ടാൻ ഇടയില്ല.അതേസമയം കേരളാ ബാങ്ക് രൂപീകരിക്കാനുള്ള സാധ്യതകളെ കുറിച്ച് പഠിക്കാൻ സർക്കാർ ബെംഗളൂരു ഐഐഎമ്മിലെ പ്രൊഫ.എം.എസ് ശ്രീറാമിന്റെ നേതൃത്വത്തിൽ വിദഗ്ദ്ധ സമിതിയെ നിയോഗിച്ചു.ഇന്റർനെറ്റ് ബാങ്കിങ്,മൊബൈൽ ബാങ്കിങ്,വിപുലമായ എ ടി എം ശൃംഖല എന്നിവയൊക്കെ കേരളബാങ്കിന് ഒരുക്കാനാകണമെന്ന് 2017 ഏപ്രിൽ 28 ന് ശ്രീറാം കമ്മിറ്റി നൽകിയ റിപ്പോർട്ടിൽ പറയുന്നു.ഇക്കാര്യങ്ങളൊക്കെ പ്രയോഗിക തലത്തിൽ കൊണ്ടുവരാൻ നബാർഡ് മുൻ ചീഫ് ജനറൽ മാനേജർ വി.ആർ രവീന്ദ്രനാഥ് ചെയർമാനായ കർമസേനയും രൂപീകരിച്ചു.പ്രാഥമിക അനുമതി തേടി നബാർഡിനും ആർബിഐക്കും അപേക്ഷ നൽകിയിട്ടുണ്ട്.

ഗുരുവായൂർ:ഗുരുവായൂർ ക്ഷേത്രത്തിൽ എഴുന്നള്ളിപ്പിനിടെ ഇടഞ്ഞ ആനയുടെ കുത്തേറ്റ പാപ്പാൻ മരിച്ചു.കോതച്ചിറ വെളുത്തേടത്ത് ബാലകൃഷ്ണൻ നായരുടെ മകൻ സുഭാഷാണ്(37) മരിച്ചത്.ഞായറാഴ്ച്ച രാവിലെ ശീവേലി എഴുന്നള്ളിപ്പിന്റെ രണ്ടാം പ്രദക്ഷിണത്തിനിടെയായിരുന്നു സംഭവം.ഇടഞ്ഞ ശ്രീകൃഷ്ണൻ എന്ന ആന രണ്ടാം പാപ്പനായി സുഭാഷിനെ തുമ്പിക്കൈകൊണ്ട് അടിച്ചു വീഴ്ത്തിയ ശേഷം വയറിനു കുത്തുകയായിരുന്നു. ഗുരുതരമായി പരിക്കേറ്റ സുഭാഷിനെ അമല ആശുപത്രിയിൽ എത്തിച്ചു അടിയന്തിര ശസ്ത്രക്രിയ നടത്തിയെങ്കിലും ജീവൻ രക്ഷിക്കാനായില്ല.ശ്രീകൃഷ്ണൻ ഇടഞ്ഞത് കണ്ട് തിടമ്പേറ്റിയിരുന്ന  ഗോപീകണ്ണൻ എന്ന ആനയും രവികൃഷ്‍ണൻ എന്ന ആനയും വിരണ്ടോടി.ഗോപീകണ്ണന്റെ പുറത്തുണ്ടായിരുന്ന കീഴ്‌ശാന്തി മേലേടം ശ്രീഹരി നമ്പൂതിരി തിടമ്പുമായി താഴെ വീണു.ആന വിരണ്ടത് കണ്ട് ഓടിരക്ഷപ്പെടാൻ ശ്രമിക്കുന്നതിനിടെ തിരക്കിൽപെട്ട് നിരവധി ഭക്തർക്കും പരിക്കേറ്റു.