News Desk

നെടുമ്പാശ്ശേരി:നെടുമ്പാശ്ശേരി വിമാനത്താവളത്തിൽ വിദേശിയുടെ വയറ്റിൽ നിന്നും കോടിക്കണക്കിന് രൂപയുടെ മയക്കുമരുന്ന് കണ്ടെത്തി.നാർക്കോട്ടിക് കൺട്രോൾ ബ്യുറോയ്ക്ക് ലഭിച്ച രഹസ്യ വിവരത്തെ തുടർന്ന് നടത്തിയ പരിശോധനയിലാണ് വിദേശി പിടിയിലാകുന്നത്. വ്യാഴാഴ്ച രാവിലെ എമിരേറ്റ്സ് വിമാനത്തിൽ സാവോപോളോയിൽ നിന്നും ദുബായ് വഴി നെടുമ്പാശ്ശേരിയിലെത്തിയ വെനിസ്വെല സ്വദേശി ഹാർലി ഗബ്രിയേൽ കാസ്ട്രോ കരീനോ ആണ് പിടിയിലായത്. ബാഗ്ഗജ് പരോശോധനയിൽ മയക്കുമരുന്ന് കണ്ടെത്താനായില്ലെങ്കിലും ആവർത്തിച്ചുള്ള ചോദ്യം ചെയ്യലിൽ ഇയാൾ മയക്കുമരുന്ന് വിഴുങ്ങിയതായി സമ്മതിക്കുകയായിരുന്നു.തുടർന്ന് ഇയാളെ എറണാകുളം ഗവ.മെഡിക്കൽ കോളേജിൽ പ്രവേശിപ്പിച്ച് മരുന്നും പഴങ്ങളും നൽകി പ്രത്യേക ക്ലോസറ്റ് ക്രമീകരിച്ച് ഒന്നര ദിവസത്തെ കാത്തിരിപ്പിനൊടുവിലാണ് രാജ്യാന്തര വിപണിയിൽ അഞ്ചുകോടി രൂപ വിലവരുന്ന 101 കൊക്കൈൻ ക്യാപ്സൂളുകൾ ഇയാളുടെ വയറ്റിൽ  നിന്നും പുറത്തെടുത്തത്.ദഹിച്ചു പോകാതിരിക്കാൻ പ്രത്യേക കോട്ടിങ് ഉള്ള ക്യാപ്‌സൂളിനുള്ളിലാണ് കൊക്കൈനുകൾ സൂക്ഷിച്ചിരുന്നത്.ദ്വിഭാഷിയുടെ സഹായത്തോടെ ഇയാളെ ചോദ്യം ചെയ്യുമെന്ന് അധികൃതർ അറിയിച്ചു.

കൊച്ചി:നടിയെ ആക്രമിച്ച കേസുമായി ബന്ധപ്പെട്ട് ദിലീപിനെതിരായി സമർപ്പിച്ച കുറ്റപത്രത്തിലെ വിവരങ്ങൾ മാധ്യമങ്ങൾക്ക് ചോർത്തി നൽകി എന്നാരോപിച്ച് നടൻ ദിലീപ് നൽകിയ ഹർജിയിൽ ഇന്ന് കോടതിയിൽ വാദം പൂർത്തിയായി.കേസ് വിധിപറയാനായി ഈ മാസം 23 ലേക്ക് മാറ്റി.മാധ്യമങ്ങൾക്ക് കുറ്റപത്രം ചോർത്തി നൽകിയത് പോലീസ് തന്നെയാണെന്ന് ദിലീപിന്റെ അഭിഭാഷകൻ കോടതിയിൽ ആരോപിച്ചു.മറ്റു മാർഗങ്ങളിൽ കൂടി കുറ്റപത്രം ചോരുന്നതിന് പോലീസ് ക്ലബ്ബിന്റെ സമീപത്ത് ഒരു ഫോട്ടോസ്റ്റാറ്റ് കട പോലും ഇല്ലെന്നും പോലീസിന്റെ അറിവോടെ ക്ലബ്ബിൽ നടന്ന നീക്കങ്ങളുടെ ഭാഗമായാണ് കുറ്റപത്രം ചോർന്നതെന്നും അഭിഭാഷകൻ കോടതിയിൽ പറഞ്ഞു.എന്നാൽ ദിലീപ് ഹരിചന്ദ്രനൊന്നുമല്ലെന്നു പ്രോസിക്യൂഷൻ പരാമർശിച്ചു.ഫോൺ രേഖകൾ അടക്കമുള്ള പ്രധാന തെളിവുകൾ ദിലീപ് കോടതിയിൽ നിന്നും അപേക്ഷ നൽകി വാങ്ങിയിരുന്നു.ഇത് ദിലീപ് മാധ്യമങ്ങൾക്ക് നൽകിയിരുന്നു.ഇത്തരത്തിലുള്ള ദിലീപ് ഹരിശ്ചന്ദ്രൻ ചമയേണ്ടെന്നും പ്രോസിക്യൂഷൻ വാദിച്ചു.