News Desk

കണ്ണൂർ:അഴീക്കോട് ഡിവൈഎഫ്ഐ പ്രവർത്തകൻ മീൻകുന്നിലെ പുളിക്കാമ്പ്രത്ത് ധനേഷിനെ വെട്ടിക്കൊലപ്പെടുത്തിയ കേസിൽ പ്രതികളായ 2 ബി.ജെ.പി പ്രവർത്തകർക്ക് ജീവപര്യന്തം തടവും 30,000 രൂപ പിഴയും.തലശ്ശേരി അഡീഷണൽസെഷൻസ്കോടതിയാണ് ശിക്ഷ വിധിച്ചത്.ബിജെപി പ്രവർത്തകരായ മുടത്തിപ്പാറയിൽ എം.പി പ്രജിൻ ,മുണ്ടച്ചാലിൽ എം .വിജിത്ത് എന്നിവരെയാണ് കോടതി ശിക്ഷിച്ചത് .പിഴ അടച്ചില്ലെങ്കിൽ പ്രതികൾ 1 വർഷം കൂടി തടവ് അനുഭവിക്കണം .പിഴ തുക ധനേഷിന്റെ പിതാവിന് നൽകാനും കോടതി ഉത്തരവിട്ടു .കേസിലെ മറ്റ് പ്രതികളായ 7 ബി.ജെ.പി പ്രവർത്തകരെ കുറ്റക്കാരല്ലെന്ന് കണ്ട് കോടതി വെറുതെ വിട്ടു .2008 ജനുവരി 12 നാണ് ധനേഷ് കൊല്ലപ്പെട്ടത്.

കണ്ണൂർ:2017 ലെ ഇന്ത്യയിലെ മികച്ച പത്ത് ഐഎഎസ് ഓഫീസർമാരിൽ ഒരാൾ കണ്ണൂർ ജില്ലാ കലക്റ്റർ മിർ മുഹമ്മദലി.ദ ബെറ്റർ ഇന്ത്യ ഓൺലൈൻ ആണ് പ്ലാസ്റ്റിക് ഫ്രീ കണ്ണൂർ പദ്ധതി നടപ്പിലാക്കിയതിന് അദ്ദേഹത്തിനു ഈ അംഗീകാരം നല്‍കിയത്.2017 ഏപ്രിലിൽ കണ്ണൂർ ആദ്യത്തെ പ്ലാസ്റ്റിക്-സ്വതന്ത്ര ജില്ലയായി മാറി.കണ്ണൂർ ജില്ലാ കലക്റ്റർ മിർ മുഹമ്മദലിയാണ് ഇതിൽ പ്രധാന പങ്ക് വഹിച്ചത്.പ്ലാസ്റ്റിക് ക്യാരി ബാഗുകൾ വിൽപ്പന നടത്തുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കാൻ തദ്ദേശീയ സംഘടനകൾക്കും മേധാവികൾക്കും അദ്ദേഹം നിർദേശം നൽകിയിരുന്നു.

തിരുവനന്തപുരം:ഓഖി ചുഴലിക്കാറ്റിൽപ്പെട്ട് കാണാതായവർക്കായുള്ള തിരച്ചിലിന് പോയ ബോട്ടുകൾ ഇന്ന് മടങ്ങിയെത്തും.നൂറോളം ബോട്ടുകളാണ് തിരച്ചിലിനായി കടലിലേക്ക് പോയിരിക്കുന്നത്.സര്‍ക്കാര്‍ നിര്‍ദേശം വരുന്ന മുറക്കായിരിക്കും ഇനി  തിരച്ചില്‍ പുനരാരംഭിക്കുക.ബേപ്പൂര്‍ വിഴിഞ്ഞം വൈപ്പിന്‍ എന്നിവിടങ്ങളില്‍ നിന്നായി തിരച്ചിലിനായി 100 ഓളം ബോട്ടുകള്‍ നാല് ദിവസം മുന്‍പാണ് പുറപ്പെട്ടത്. മംഗലാപുരം വരെ നടത്തിയ തിരച്ചില്‍ അവസാനിപ്പിച്ച് ബോട്ടുകള്‍ മടക്കയാത്രയിലാണ്. ഇന്ന് രാത്രി 10 മണിയോടെ തിരച്ചില്‍ അവസാനിപ്പിക്കും. തീരക്കടല്‍ മുതല്‍ 100 നോട്ടിക്കല്‍ മൈല്‍ അകലെ വരെ നാല് ദിവസങ്ങളിലായി നടത്തിയ തിരച്ചിലില്‍ 5 മൃതദേഹങ്ങളാണ് സംഘം കണ്ടെത്തിയത്.ഇതോടെ ഓഖി ദുരന്തത്തിൽപ്പെട്ട മരിച്ചവരുടെ എണ്ണം 75 ആയി.ഇനിയും 131 പേരെ കൂടി കണ്ടെത്താനുണ്ട്.കിട്ടിയ മൃതദേഹങ്ങളിൽ 44 എണ്ണം ഇനിയും തിരിച്ചറിയാനുണ്ട്.

കൊച്ചി: ഓഖി ചുഴലിക്കാറ്റിനെ തുടർന്ന് കടലിൽ കാണാതായ ഒരു മത്സ്യബന്ധന ബോട്ടുകൂടി തോപ്പുംപടി തീരത്ത് തിരിച്ചെത്തി. പത്ത് പേരാണ് തിരിച്ചെത്തിയ ബോട്ടിലുണ്ടായിരുന്നത്. തമിഴ്നാട്, ആസാം സ്വദേശികളാണ് ഈ ബോട്ടിൽ ഉണ്ടായിരുന്നത്.45 ദിവസം മുൻപ് ഓഷ്യൻ ഹണ്ടർ എന്ന ബോട്ടിലാണ് ഇവർ തീരത്തുനിന്ന് കടലിൽ പോയത്. ചുഴലിക്കാറ്റിൽ ദിശതെറ്റിയ ബോട്ടിന് കേടുപാടുകളും സംഭവിച്ചു. അതിനാലാണ് ഇവർക്ക് ദിവസങ്ങളോളം കടലിൽ കഴിയേണ്ടി വന്നത്. തിരിച്ചെത്തിയവർക്ക് കടുത്ത ആരോഗ്യപ്രശ്നങ്ങളില്ലെന്നും ഇവർക്ക് വേണ്ട സഹായങ്ങൾ നൽകുമെന്നും അധികൃതർ അറിയിച്ചു.