News Desk

കണ്ണൂർ:പ്ലാസ്റ്റിക്ക് ക്യാരി ബാഗ് നിരോധനം കർശനമാക്കുന്നതിന്റെ ഭാഗമായി ജില്ലാ കളക്ടർ മിർ മുഹമ്മദലി നേരിട്ട് കടകളിലെത്തി പരിശോധന നടത്തി. കണ്ണൂർ നഗരത്തിൽ റെയിൽവേ സ്റ്റേഷൻ പരിസരം, ഹാജി റോഡ്, മുനീശ്വരൻ കോവിൽ റോഡ് എന്നിവിടങ്ങളിലെ ഏതാനും കടകളിലാണ് ജില്ലാ കളക്ടർ പരിശോധന നടത്തിയത്.പരിശോധനയിൽ വൻതോതിൽ പ്ലാസ്റ്റിക് സഞ്ചികൾ ഗോഡൗണിൽ സൂക്ഷിച്ച നമിത പ്ലാസ്റ്റിക്സ് എന്ന കടയും പ്ലാസ്റ്റിക് സഞ്ചികൾ സൂക്ഷിക്കാനുപയോഗിച്ച ഗോഡൗണുമാണ് അടച്ചുപൂട്ടി സീൽവച്ചത്. ഇവയുടെ ലൈസൻസ് റദ്ദ് ചെയ്തിട്ടുണ്ട്.ഇവിടെ നിന്ന് 50 മൈക്രോണിൽ കുറവുള്ള സഞ്ചികളടക്കം 236 കിലോഗ്രാം പ്ലാസ്റ്റിക്ക് കാരിബാഗുകളാണ് പിടിച്ചെടുത്തത്. പുതിയതെരുവിലെ അപ്പൂസ് ബേക്കറിയുടെയും ലൈസൻസ് റദ്ദ് ചെയ്തിട്ടുണ്ട്. കണ്ണൂർ നഗരത്തിലെ രണ്ട് കടകൾക്ക് നോട്ടീസും നൽകിയിട്ടുണ്ട്.

തൃശൂർ:മുഖ്യമന്ത്രി പിണറായി വിജയനെ വധിക്കുമെന്ന് ഭീഷണിപ്പെടുത്തിയ സംഭവത്തിൽ രണ്ടുപേരെ പോലീസ് അറസ്റ്റ് ചെയ്തു.ഇന്നലെയാണ് മുഖ്യമന്ത്രിയെ വധിക്കുമെന്ന സന്ദേശം തൃശൂർ ഈസ്റ്റ് പൊലീസിന് ലഭിച്ചത്.പാലക്കാട് സ്വദേശികളാണ് പിടിയിലായത്.ഇവരെ വിശദമായി ചോദ്യം ചെയ്തപ്പോൾ അയൽവാസിയോടുള്ള വിദ്വേഷം തീർക്കാൻ അയാളുടെ ഫോണെടുത്തു ഭീഷണി സന്ദേശം അയച്ചുവെന്നാണ് മൊഴി നൽകിയിരിക്കുന്നത്.എന്നാൽ ഇത് പോലീസ് കാര്യമായി എടുത്തിട്ടില്ല.പിന്നീട് ഇവരെ തൃശൂർ ഈസ്റ്റ് പൊലീസിന് കൈമാറി.ഈസ്റ്റ് പോലീസ് സ്റ്റേഷനിൽ എത്തിച്ച ഇവരെ വിശദമായി ചോദ്യം ചെയ്തുവരികയാണ്.വെള്ളിയാഴ്ച കുന്നംകുളം സ്വദേശി സജേഷ് കുമാറിന്റെ ഫോണിലാണ് ‘മുഖ്യമന്ത്രി ഇന്ന് കൊല്ലപ്പെടും’ എന്ന സന്ദേശമെത്തിയത്.ഉടൻ തന്നെ സജേഷ് കുമാർ ത്യശ്ശൂർ ഈസ്റ്റ് പോലീസിൽ വിവരം അറിയിക്കുകയായിരുന്നു.

കോഴിക്കോട്:സാക്ഷരതാ മിഷൻ സംസ്ഥാന തുടർവിദ്യാഭ്യാസ കലോത്സവത്തിൽ പങ്കെടുക്കാനെത്തിയ ട്രാന്സ്ജെന്ഡേഴ്സിനെ മർദിച്ചെന്ന പരാതിയിൽ അന്വേഷണം ആരംഭിച്ചു.സംസ്ഥാന പോലീസ് മേധാവി ലോക്നാഥ് ബെഹ്‌റയാണ് അന്വേഷണത്തിന് ഉത്തരവിട്ടത്.കസബ എസ്‌ഐക്കെതിരെ കേസെടുത്ത് അന്വേഷണമാരംഭിക്കാനും അദ്ദേഹം നിർദേശിച്ചിട്ടുണ്ട്.കോഴിക്കോട് ഡിസിപി മെറിൻ ജോസെഫിനാണ് അന്വേഷണ ചുമതല.ബുധനാഴ്ച രാത്രി കോഴിക്കോട് പിഎം താജ് റോഡിലാണ് സംഭവം.കണ്ടാലറിയാവുന്ന രണ്ടു പോലീസുകാരന് മർദിച്ചതെന്ന് പരാതിയിലുണ്ട്.എന്നാൽ മർദിച്ച കാര്യം കസബ,ടൌൺ പോലീസുകാർ നിഷേധിച്ചു.കലോത്സവത്തിൽ പങ്കെടുത്ത ശേഷം മടങ്ങുകയായിരുന്ന മമത ജാസ്മിൻ,സുസ്മി എന്നിവരെയാണ് മർദിച്ചത് .ഇവർ ഇപ്പോൾ ബീച്ച് ആശുപത്രിയിൽ ചികിത്സയിലാണ്.രാത്രി സമയത്തു റോഡിൽ കാണരുതെന്ന് പറഞ്ഞിട്ടില്ലേ എന്ന് പറഞ്ഞായിരുന്നു മർദനം.ജാസ്മിന്റെ മുതുകിൽ ലാത്തിയടിയേറ്റ് മുറിഞ്ഞ പാടുകളുണ്ട്.സുസ്മിയുടെ കൈക്കാണ് പരിക്ക്.

പത്തനംതിട്ട:മകരവിളക്ക് ഉത്സവത്തിനായി ശബരിമല നട ഇന്ന് തുറക്കും വൈകുന്നേരം അഞ്ചുമണിക്ക് മേൽശാന്തി ഉണികൃഷ്ണൻ നമ്പൂതിരി നടതുറന്ന് ശ്രീകോവിലിലെ ദീപങ്ങൾ തെളിയിച്ച ശേഷം പതിനെട്ടാംപടിയിറങ്ങി ആഴി തെളിക്കും.ഇതിനു ശേഷം മാത്രമാണ് ഭക്തർക്ക് പ്രവേശനം അനുവദിക്കുക. ഇതിനോടൊപ്പം മാളികപ്പുറത്തും നട തുറക്കും ജനുവരി 14 നാണ് മകരവിളക്ക്.മകരവിളക്കുത്സവത്തിനായി നടതുറക്കുന്ന ആദ്യ ദിവസം തന്നെ ശബരിമലയിലേക്ക് ഭക്തജന പ്രവാഹമാണ്.തിരക്ക് കണക്കിലെടുത്തു സന്നിധാനത്തും പമ്പയിലുമടക്കം കൂടുതൽ പോലീസിനെ വിന്യസിക്കും.സന്നിധാനത്തെ പുതിയ പോലീസ് സ്പെഷ്യൽ ഓഫീസറായി ദേബേഷ്‌കുമാർ ബെഹ്‌റ ചുമതലയേറ്റു.