News Desk

തോട്ടട:തോട്ടടയിൽ വീട്ടിൽ മോഷണം.അഞ്ചരപ്പവനും 70,000 രൂപയും കവർന്നു.കോമത്ത് വത്സലന്റെ വീട്ടിൽ കയറിയ കള്ളൻ അലമാരയിൽ സൂക്ഷിച്ചിരുന്ന ഒന്നരപവന്റെ രണ്ട് മാല,ഒരു പവന്റെ രണ്ടു വള,അരപ്പവന്റെ ഒരു ജോഡി കമ്മൽ എന്നിവയും 70,000 രൂപയും മോഷ്ടിച്ചു.ഞായറഴ്ച രാവിലെയാണ് വീട്ടമ്മ വനജ അടുക്കളഭാഗത്തെ വാതിൽ തുറന്നിട്ട നിലയിൽ കണ്ടെത്തിയത്.ഗ്യാസ് പൈപ്പ് കടത്തിവിടുന്നതിനായി അടുക്കഭാഗത്തെ ജനൽ ലോക്ക് ചെയ്യാറില്ലായിരുന്നു. ഇതിലൂടെ കയ്യിട്ട് വാതിൽ തുറന്നാകാം കള്ളൻ അകത്തുകയറിയതെന്നാണ് നിഗമനം.അടുക്കളപ്പുറത്തെ ഗ്രിൽസും തുറന്ന നിലയിലായിരുന്നു.എടക്കാട് പോലീസും കണ്ണൂരിൽ നിന്നെത്തിയ ഡോഗ് സ്ക്വാർഡും ഫോറൻസിക് വിദഗ്ദ്ധരും സ്ഥലത്തെത്തി പരിശോധന നടത്തി.

പാനൂർ:പാനൂർ കല്ലുവളപ്പിൽ ആറ് ബോംബുകൾ കണ്ടെടുത്തു.കല്ലുവളപ്പ് മോഹനഗിരി എസ്റ്റേറ്റിന് സമീപത്തെ സ്വകാര്യ വ്യക്തിയുടെ കശുമാവിൻ തോട്ടം വൃത്തിയാക്കുന്നതിനിടെയാണ് ബോംബുകൾ കണ്ടെടുത്തത്.തോട്ടത്തിൽ പ്ലാസ്റ്റിക് ബക്കറ്റിൽ സൂക്ഷിച്ച നിലയിലായിരുന്നു ബോംബുകൾ.ഇതിൽ മൂന്നെണ്ണം സ്റ്റീൽ ബോംബുകളും മൂന്നെണ്ണം കുപ്പി ബോംബുകളുമാണ്.തൊഴിലാളികൾ വിവരമറിയിച്ചതിനെ തുടർന്ന് സ്ഥലത്തെത്തിയ കൊളവല്ലൂർ എസ്‌ഐ എം.വി ബിജുവിന്റെ നേതൃത്വത്തിലുള്ള സംഘം ബോംബ് കസ്റ്റഡിയിലെടുത്തു.പിന്നീട് ബോംബ് സ്‌ക്വാഡ് എത്തി ബോംബ് നിർവീര്യമാക്കി.

തിരുവനന്തപുരം: നെയ്യാറ്റിൻകര സ്വദേശി ശ്രീജിവിന്‍റെ മരണം കസ്റ്റഡി മരണം തന്നെയെന്ന് പോലീസ് കംപ്ലെയൻസ് അതോറിറ്റി മുൻ ചെയർമാൻ ജസ്റ്റീസ് നാരായണക്കുറുപ്പ്. കൊലപാതകം മറച്ചുവയ്ക്കാൻ പോലീസ് കള്ളത്തെളിവുണ്ടാക്കിയെന്നും നടപടി ആവശ്യപ്പെട്ടുള്ള ശിപാർശ പോലീസ് മേധാവി അവഗണിച്ചെന്നും ജസ്റ്റീസ് നാരായണക്കുറുപ്പ് വെളിപ്പെടുത്തി.ശ്രീജിവിന്‍റെ കസ്റ്റഡി മരണം സംബന്ധിച്ച് പോലീസിനെതിരേ ലഭിച്ചിരുന്ന പരാതിയുടെ അടിസ്ഥാനത്തിലാണ് ജസ്റ്റീസ് നാരായണക്കുറുപ്പിന്‍റെ വെളിപ്പെടുത്തൽ.തന്റെ ഉത്തരവ് സ്റ്റേ ചെയ്ത ഹൈക്കോടതി ഉത്തരവിൽ വ്യക്തതയില്ലെന്നും അദ്ദേഹം കൂട്ടിച്ചേർത്തു.2014 ഇൽആണ് ശ്രീജിത്തിന്‍റെ സഹോദരൻ പോലീസ് കസ്റ്റഡിയിൽ മരിച്ചത്. കഴിഞ്ഞ സർക്കാർ ഇക്കാര്യത്തിൽ നടപടി ഒന്നും സ്വീകരിക്കാതിരുന്നതിനാൽ ശ്രീജിത്ത് പോലീസ് കംപ്ലെയൻസ് അതോറിറ്റിയെ സമീപിക്കുകയായിരുന്നു. അതേസമയം ശ്രീജിവിന്റെ മരണത്തിൽ സിബിഐ അന്വേഷണം ആവശ്യപ്പെട്ട് വീണ്ടും കേന്ദ്രസർക്കാരിന് കത്ത് നൽകുമെന്ന് മുഖ്യമന്ത്രി വ്യക്തമാക്കി.കസ്റ്റഡിമരണത്തിൽ കുറ്റവാളികളായ ഉദ്യോഗസ്ഥർക്കെതിരായ ശിക്ഷാനടപടികൾ ഹൈക്കോടതി സ്റ്റേ ചെയ്തത് നീക്കാൻ ആവശ്യമായ നടപടികൾ സ്വീകരിക്കാൻ അഡ്വ.ജനറലിന് നിർദേശം നൽകിയതായും മുഖ്യമന്ത്രിയുടെ ഓഫീസ് അറിയിച്ചു.