News Desk

കൊച്ചി:ഉദയംപേരൂർ നീതു കൊലക്കേസ് പ്രതി ബിനു രാജിനെ തൂങ്ങിമരിച്ച നിലയിൽ കണ്ടെത്തി.കേസിൽ നാളെ വിചാരണ തുടങ്ങാനിരിക്കുകയായിരുന്നു. പ്രണയാഭ്യര്‍ഥന നിരസിച്ചതിനാണ് 2014 ഡിസംബര്‍ 18ന് ഉദയംപേരൂരിലെ വീട്ടില്‍ കയറി പ്രതി പെൺകുട്ടിയെ കൊലപ്പെടുത്തിയത്. ഉദയംപേരൂർ ഫിഷർമെൻ കോളനിക്കു സമീപം മീൻകടവിൽ പള്ളിപ്പറമ്പിൽ ബാബു, പുഷ്‌പ ദമ്പതികളുടെ ദത്തുപുത്രിയായിരുന്നു നീതു.വീടിന്റെ ടെറസ്സിൽ അലക്കിയ തുണി വിരിക്കുന്നതിനിടെ പിന്നാലെ കൊടുവാളുമായെത്തിയ ബിനുരാജ് നീതുവിനെ വെട്ടി കൊലപ്പെടുത്തുകയായിരുന്നു.തലയ്ക്കും കഴുത്തിനും കൈക്കുമായി പതിമൂന്നു മുറിവുകളുണ്ടായിരുന്നു.കഴുത്ത് അറ്റുപോകും വിധം മുറിഞ്ഞ നിലയിലായിരുന്നു. നീതുവിന്റെ ഉച്ചത്തിലുള്ള കരച്ചിൽ കേട്ട് ആളുകൾ ഓടിക്കൂടിയെങ്കിലും ആരും മുകളിലേക്ക് ചെല്ലാൻ ധൈര്യപ്പെട്ടില്ല.ആളുകൾ നോക്കി നിൽക്കെ ചോര പുരണ്ട കത്തിയുമായി ബിനുരാജ് വീട്ടിലേക്ക് നടന്നു പോയി.വാക്കത്തി വഴിയിൽ ഉപേക്ഷിക്കുകയും ചെയ്തു.വീട്ടിൽ നിന്നാണ് ഇയാളെ പോലീസ് അറസ്റ്റ് ചെയ്തത്.പ്രണയ നൈരാശ്യത്തെ തുടർന്നുള്ള പ്രതികാരമാണ് കൊലയിൽ കലാശിച്ചതെന്ന് പോലീസ് പറഞ്ഞു.

തിരുവനന്തപുരം:മുഖ്യമന്ത്രിയുടെ സാമ്പത്തിക ഉപദേഷ്ടാവായ ഡോ.ഗീതാഗോപിനാഥിന്റെ സാമ്പത്തിക ഉപദേശങ്ങളെ കരുതലോടെ കാണണമെന്ന് സിപിഐ മുഖപത്രമായ ജനയുഗം.ഗീത ഗോപിനാഥ് സംസ്ഥാനത്തിന്റെ സാമ്പത്തിക വളർച്ചയിലും വികാസത്തിലും പ്രകടിപ്പിക്കുന്ന താൽപ്പര്യവും വിദേശ നിക്ഷേപം കൊണ്ടുവരുന്നതിൽ കാണിക്കുന്ന ഉത്സാഹവും തികച്ചും ശ്ലാഘനീയമാണെങ്കിലും ചെലവ് ചുരുക്കൽ സംബന്ധിച്ച് പ്രകടിപ്പിക്കുന്ന ചില നിലപാടുകൾ അടക്കം സാമ്പത്തിക രംഗത്ത് നടപ്പാക്കേണ്ട പരിഷ്‌കാര നടപടികളെ മുഖ്യമന്ത്രിയും ഇടതുപക്ഷ ജനാധിപത്യ മുന്നണിയും കരുതലോടയെ സമീപിക്കൂ എന്നുവേണം കരുതാനെന്ന് സിപിഐ മുഖപത്രമായ ജനയുഗം മുഖപ്രസംഗത്തിൽ പറയുന്നു.ലോക കേരള സഭയിൽ പങ്കെടുക്കാനെത്തിയ ഗീത ഗോപിനാഥ് ചില മാധ്യമങ്ങൾക്ക് നൽകിയ അഭിമുഖത്തിൽ നൽകുന്ന സൂചനകൾ ഏതെങ്കിലും തരത്തിൽ സംസ്ഥാന സർക്കാരിന്റെ സാമ്പത്തിക നയങ്ങളിൽ സ്വാധീനം ചെലുത്തുന്നവയാണെങ്കിൽ അവ തികച്ചും ആശങ്കാജനകമാണെന്ന് ജനയുഗം പറയുന്നു.

തിരുവനന്തപുരം:വ്യാജരേഖയുപയോഗിച്ച് പോണ്ടിച്ചേരിയിൽ ആഡംബര വാഹനം രജിസ്റ്റർ ചെയ്ത കേസിൽ നടനും എംപിയുമായ സുരേഷ് ഗോപിയെ ക്രൈം ബ്രാഞ്ച് അറസ്റ്റ് ചെയ്ത് വിട്ടയച്ചു.ഒരുലക്ഷം രൂപ ബോണ്ടും രണ്ട് ആൾജാമ്യത്തിലുമാണ് സുരേഷ് ഗോപിയെ വിട്ടയച്ചത്. വ്യാജരേഖയുണ്ടാക്കി രണ്ട് ആഡംബര വാഹനങ്ങൾ സുരേഷ് ഗോപി പുതുച്ചേരിയിൽ രജിസ്റ്റർ ചെയ്ത് നികുതി വെട്ടിപ്പ് നടത്തി എന്നാണ് കേസ്.അതേസമയം തൻ നികുതി വെട്ടിപ്പ് നടത്തിയിട്ടില്ലെന്നും പുതുച്ചേരിയിലെ വാടക വീടിന്റെ മേൽവിലാസത്തിലാണ് താൻ വാഹനം രജിസ്റ്റർ ചെയ്തതെന്നും ഈ വാഹനം കേരളത്തിൽ ഉപയോഗിക്കാറില്ലെന്നും സുരേഷ് ഗോപി വാദിച്ചു.എന്നാൽ സുരേഷ് ഗോപി ഹാജരാക്കിയ രേഖകളിൽ വ്യക്തതക്കുറവുണ്ടെന്നാണ് അന്വേഷണ സംഘത്തിന്റെ വിലയിരുത്തൽ.

കാസർകോഡ്:കാഞ്ഞങ്ങാട് വേലാശ്വരത്ത് വീട്ടമ്മയുടെ കഴുത്തിൽ കേബിൾ മുറുക്കി അബോധാവസ്ഥയിലാക്കി കവർച്ച നടത്തി.റിട്ടയേർഡ് നഴ്സിംഗ് സൂപ്രണ്ട് ജാനകിയുടെ വീട്ടിലാണ് മോഷണം നടന്നത്.രാവിലെ അഞ്ചരയോടെ വീടിനു പുറത്തിറങ്ങിയ ജാനകിയെ കഴുത്തിൽ കേബിൾ കുരുക്കി ബോധം കെടുത്തിയ ശേഷം മോഷ്ട്ടാവ് അകത്തു കടന്ന് മോഷണം നടത്തുകയായിരുന്നു.ആറര പവൻ മാല,രണ്ടര പവൻ വള,അരപ്പവൻ മോതിരം, 38000 രൂപ എന്നിവയാണ് നഷ്ടപ്പെട്ടത്.ഉറങ്ങിക്കിടക്കുകയായിരുന്ന ജാനകിയുടെ ഭർത്താവ് ഉണർന്നപ്പോഴാണ് സംഭവം പുറത്തറിയുന്നത്.