ദോഹ:അനുവദനീയമായതിലും കൂടുതൽ രാസവസ്തുക്കൾ കണ്ടെത്തിയതിനെ തുടർന്ന് പതഞ്‌ജലി ഉത്പന്നങ്ങൾ ഖത്തറിൽ നിരോധിച്ചു.ഭക്ഷ്യ സുരക്ഷാ അതോറിറ്റിയുടെ ക്ലിയറൻസ് ലഭിക്കുന്നത് വരെ ഇനി പതഞ്‌ജലി ഉൽപ്പന്നങ്ങൾ വിൽക്കാനാകില്ല.നേരത്തെ ഗുണനിലവാരമില്ലെന്നു കണ്ടെത്തിയതിനെ തുടർന്ന് പതഞ്‌ജലി ഉൽപ്പനങ്ങൾ നേപ്പാൾ സർക്കാർ തിരിച്ചു വിളിച്ചിരുന്നു.ഇന്ത്യയിൽ വിൽക്കുന്ന പതഞ്‌ജലി ഉൽപ്പങ്ങൾക്കും ഗുണനിലവാരമില്ലെന്നു കണ്ടെത്തിയിരുന്നു.
കണ്ണൂർ:ലോകത്തിലെ ഏറ്റവും നീളം കൂടിയ സാലഡ് കണ്ണൂരിൽ തയ്യാറാക്കുന്നു.യൂണിവേഴ്‌സല്‍ വേള്‍ഡ് റെക്കോര്‍ഡ് ലക്ഷ്യമാക്കി റഷീദ് കളിനനറി ആര്‍ട്ട് മാസ്റ്റര്‍ ഷെഫ് റഷീദ് മുഹമ്മദിന്‍റെ നേതൃത്വത്തില്‍ പത്തോളം ഷെഫുമാരും നിര്‍മലഗിരി കോളജ് ഹോം സയൻസ് വിഭാഗം വിദ്യാര്‍ഥിനികളും എംആര്‍വിഎച്ച്എസ്എസ് പടന്നസ്‌കൂളിലെ ഫുഡ് ആൻഡ് റസ്റ്റോറന്‍റ് വിദ്യാര്‍ഥികളും അടങ്ങുന്ന 160 പേരാണ് “എക്‌സ്പ്രസോ’ എന്ന പേരിലുള്ള സാലഡ് തയ്യാറാക്കുക.27ന് രാവിലെ 9.30 മുതല്‍ മുണ്ടയാട് ഇന്‍ഡോര്‍ സ്‌റ്റേഡിയത്തില്‍ നടക്കുന്ന പരിപാടിയില്‍ 900 കിലോയോളം പച്ചക്കറികളും പഴങ്ങളും ഉപയോഗിച്ചു ഗ്രീന്‍ പ്രോട്ടോക്കോള്‍ പ്രാവര്‍ത്തികമാക്കി നാലര മണിക്കൂര്‍കൊണ്ടു 9.5 ഇഞ്ച് വീതിയില്‍ 1200 ഓളം അടി നീളമുള്ള സലാഡാണു തയാറാക്കുന്നത്.ഭക്ഷണത്തിലെ സീറോ വേസ്റ്റ് എന്ന തത്വം പൊതുജനങ്ങളിലേക്ക് എത്തിക്കുന്നതിനും വെജിറ്റബിള്‍ സാലഡിന്‍റെ പ്രാധാന്യം യുവതലമുറകളിലേക്കു പകര്‍ന്നുനല്‍കുന്നതിനും കൂടിയാണ് ഇത്തരത്തിലൊരു പരിപാടി സംഘടിപ്പിക്കുന്നത്.രാവിലെ 9.30 ന് ഉദ്ഘാടനം ചെയ്യുന്ന പരിപാടിയില്‍ യൂണിവേഴ്‌സല്‍ റെക്കോര്‍ഡ് ഫോറം ഏഷ്യന്‍ ജൂറി ഗിന്നസ് സത്താര്‍ ആദൂര്‍ മുഖ്യാതിഥി ആയിരിക്കും.കേരളത്തിലെ സോഷ്യല്‍ സര്‍വീസ് മേഖലകളില്‍ പ്രവര്‍ത്തിക്കുന്ന ഒരു കൂട്ടം യുവസംരംഭകരുടെ കൂട്ടായ്മയായ ഗ്രീന്‍ സോഴ്‌സ് കണ്‍സോര്‍ഷ്യമാണു ജില്ലയില്‍ ആദ്യമായി ഇത്തരത്തിലൊരു പരിപാടി നടത്തുന്നത്.
കോഴിക്കോട്:ഇലക്ട്രിക്ക് പോസ്റ്റ് ദേഹത്തു വീണ് വിദ്യാർത്ഥി മരിച്ചു.മാത്തറ എംജി നഗറിൽ പ്രവർത്തിക്കുന്ന കാലിക്കറ്റ് ഇസ്ലാമിക് റെസിഡൻഷ്യൽ ഹയർ സെക്കണ്ടറി സ്കൂളിലെ അഞ്ചാം ക്ലാസ് വിദ്യാർത്ഥി ആദിഷാണ് മരിച്ചത്.സ്കൂൾ ബസ് പിറകിലേക്ക് എടുത്തപ്പോൾ വൈദ്യുതി ബന്ധമില്ലാത്ത ഇലക്ട്രിക് പോസ്റ്റിൽ ഇടിക്കുകയും പോസ്റ്റ് മറിഞ്ഞ് കുട്ടിയുടെ ദേഹത്ത് പതിക്കുകയുമായിരുന്നു.എംജി നഗർ ഇരിങ്ങല്ലൂർ ചാലിൽ ഷാജിയുടെയും ധന്യയുടെയും മകനാണ് ആദിഷ്. സഹോദരൻ അശ്വിൻ ഇതേ സ്കൂളിലെ പ്ലസ് ടു വിദ്യാർത്ഥിയാണ്.
കണ്ണൂർ:സിപിഎം കണ്ണൂർ ജില്ലാ സമ്മേളനത്തിന് ഇന്ന് തുടക്കം.കൊടിമരം, പതാക, ദീപശിഖ എന്നിവ ഇന്നു സമ്മേളനനഗരിയായ കണ്ണൂരിലെത്തും. പതാക കരിവെള്ളൂർ രക്തസാക്ഷി നഗറിൽ നിന്നും കൊടിമരം തലശേരി ജവഹർഘട്ടിൽ നിന്നും ദീപശിഖ കാവുമ്പായി രക്തസാക്ഷി മണ്ഡപത്തിൽ നിന്നും റിലേയായാണ് സമ്മേളന നഗരിയിലെത്തിക്കുക.പതാക ജാഥയുടെ പര്യടനം ഇന്നു രാവിലെ ഒമ്പതുമണിക്ക് സിപിഎം സംസ്ഥാന കമ്മിറ്റിയംഗം എം.വി. ജയരാജൻ ഉൽഘാടനം ചെയ്തു.ഒ.വി. നാരായണനാണ് ജാഥാ ലീഡർ. എം. പ്രകാശൻ നയിക്കുന്ന കൊടിമര ജാഥയുടെ ഉദ്ഘാടനം ഉച്ചയ്ക്ക് 1.30ന് ടി.വി. രാജേഷ് എംഎൽഎ നിർവഹിച്ചു.കാവുമ്പായി രക്തസാക്ഷി മണ്ഡപത്തിൽനിന്നും കെ.എം. ജോസഫിന്‍റെ നേതൃത്വത്തിൽ കൊണ്ടുവരുന്ന ദീപശിഖാ റാലിയുടെ ഉദ്ഘാടനം രാവിലെ 9.30ന് ജയിംസ് മാത്യു എംഎൽഎ നിർവഹിച്ചു.വൈകുന്നേരത്തോടെ മൂന്നു ജാഥകളും കണ്ണൂർ കാൽടെക്സിൽ സംഗമിച്ചു പൊതുസമ്മേളന നഗരിയായ ജവഹർ സ്റ്റേഡിയത്തിൽ സമാപിക്കും.ഇതോടൊപ്പം ജില്ലയിലെ 162 പാർട്ടി രക്തസാക്ഷികളുടെ സ്മൃതി മണ്ഡപത്തിൽ നിന്നുമായി ദീപശിഖകൾ സമ്മേളന നഗരിയിലെത്തിക്കും.നാളെ പാട്യം ഗോപാലൻ പഠന ഗവേഷണ കേന്ദ്രത്തിൽ ആരംഭിക്കുന്ന മൂന്നു ദിവസം നീളുന്ന പ്രതിനിധി സമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.
കണ്ണൂർ: ക്രമസമാധാനപാലനത്തിനുള്ള ഡിജിപിയുടെ സംസ്ഥാനതല ബാഡ്ജ് ഓഫ് ഓണർ പുരസ്കാരം കണ്ണൂർ ജില്ലാ പോലീസ് മേധാവി ജി. ശിവവിക്രമിന്.കേരള പോലീസിലെ 196 പേർക്ക് ഇത്തവണ ഡിജിപിയുടെ ബാഡ്ജ് പ്രഖ്യാപിച്ചതിൽ ക്രമസമാധാനപാലന വിഭാഗത്തിൽ ശിവ വിക്രം മാത്രമാണുള്ളത്.2016ൽ തിരുവനന്തപുരം സിറ്റി പോലീസിൽ ഡപ്യൂട്ടി കമ്മീഷണറായിരിക്കെ നിയമസഭാ തെരഞ്ഞെടുപ്പ്, സെക്രട്ടേറിയറ്റ് മാർച്ചുകൾ, തലസ്ഥാനത്തെ മറ്റ് സമരങ്ങൾ, വിവിഐപികളുടെ സന്ദർശനങ്ങൾ എന്നിവയുമായി ബന്ധപ്പെട്ട ക്രമസമാധാനപാലനം കുറ്റമറ്റ രീതിയിൽ നിർവഹിച്ചതാണ് ശിവ വിക്രമിനെ പുരസ്കാരത്തിന് അർഹനാക്കിയത്.
ബെംഗളൂരു:സഞ്ജയ് ലീല ബൻസാലിയുടെ വിവാദ ബോളിവുഡ് ചിത്രം ‘പത്മാവത്’ പ്രദർശിപ്പിച്ച തീയേറ്ററിന് നേരെ പെട്രോൾ ബോംബ് ആക്രമണം.കർണാടക ബലഗാവിയിലെ പ്രകാശ് തീയേറ്ററിന് നേരെയാണ് ആക്രമണം നടന്നത്.സെക്കൻഡ് ഷോ കഴിഞ്ഞ് ആളുകൾ പുറത്തിറങ്ങുന്നതിനിടെ ആയിരുന്നു ആക്രമണം. പരിഭ്രാന്തരായി ഓടിയ നിരവധിപേർക്ക് പരിക്കേറ്റിട്ടുണ്ട്.സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.പത്മാവത് സിനിമയ്‌ക്കെതിരെ കേരളത്തിലും ഉടൻ പ്രക്ഷോഭം സംഘടിപ്പിക്കുമെന്ന് കർണിസേന വ്യക്തമാക്കിയിട്ടുണ്ട്.
കണ്ണൂർ:വളപട്ടണം കീരിയാട് നടന്ന സ്‌ഫോടനത്തിൽ ഒരു അന്യസംസ്ഥാന തൊഴിലാളി മരിച്ചു.രണ്ടുപേർക്ക് പരിക്കേറ്റു.ഇതരസംസ്ഥാന തൊഴിലാളികൾ താമസിക്കുന്ന കെട്ടിടത്തിന്റെ മുകൾ നിലയിലാണ് സ്ഫോടനം നടന്നത്.ജിപ്സം ബോർഡ് പണിയെടുക്കുന്ന തൊഴിലാളികൾ കപ്പാസിറ്ററിന് മുകളിൽ സിൽവർ കോട്ടിംഗ് ചുറ്റുമ്പോഴാണ് സ്ഫോടനം നടന്നതെന്നാണ് സൂചന.യു പി സ്വദേശി ബർകത്താണ് മരിച്ചത്.
കണ്ണൂർ:കണ്ണൂർ പോലീസ് പരേഡ് ഗ്രൗണ്ടിൽ നടക്കുന്ന റിപ്പബ്ലിക്ക് ദിനാഘോഷ ചടങ്ങിൽ മന്ത്രി കെ.കെ ശൈലജ സല്യൂട്ട് സ്വീകരിക്കും.പരേഡിന്റെ ഭാഗമായി ദേശീയോഗ്രഥനം എന്ന വിഷയത്തിലുള്ള ഫ്ളോട്ടുകൾ ഉണ്ടാകും.ഇവയിൽ ആദ്യത്തെ മികച്ച മൂന്ന് എണ്ണത്തിന് യഥാക്രമം 10,000 രൂപ, 5,000 രൂപ, 3,000 രൂപ സമ്മാനം നല്‍കും.പൊതുജനങ്ങള്‍ക്ക് ചടങ്ങ് വീക്ഷിക്കാന്‍ പോലീസ് പരേഡ് ഗ്രൗണ്ടിൽ സൗകര്യം ഒരുക്കിയിട്ടുണ്ട്. ജില്ലയിലെ മുഴുവന്‍ സര്‍ക്കാര്‍ ജീവനക്കാരും കണ്ണൂര്‍ പൊലീസ് പരേഡ് ഗ്രൗണ്ടിലോ അവരവരുടെ ഓഫീസുകളിലോ നടക്കുന്ന റിപ്പബ്ലിക് ദിന പരിപാടികളില്‍ പങ്കെടുക്കണമെന്ന് ജില്ലാ കലക്ടര്‍ അറിയിച്ചു.
തളിപ്പറമ്പ്:തളിപ്പറമ്പ്-കുപ്പം ദേശീയ പാതയിൽ നിർത്തിയിട്ടിരുന്ന പാർസൽ ലോറിയിൽ നിന്നും 3.85 ലക്ഷത്തിന്‍റെ സാധനങ്ങൾ കവർന്നു.മുംബൈയിലെ സ്മാർട്ട് പാർസൽ സർവീസിന്റെ നാഷണൽ പെർമിറ്റ് ലോറിയിൽ നിന്നുമാണ് വസ്ത്രങ്ങളും ഇലക്ട്രോണിക്സ് ഉപകരണങ്ങളും കവർന്നത്.കണ്ണൂരിലേയും കോഴിക്കോട്ടെയും വിവിധ ഷോറൂമുകളിലേക്ക് സാധനങ്ങളുമായി പോകുന്ന ലോറി കഴിഞ്ഞ ദിവസം രാത്രിയാണ് കുപ്പം ദേശീയപാതയില്‍ കൊള്ളയടിക്കപ്പെട്ടത്. കുപ്പം എയുപി സ്കൂളിന് സമീപമാണ് ലോറി നിർത്തിയിട്ടിരുന്നത്.ഡ്രൈവർമാരായ കോഴിക്കോട് സ്വദേശി അബ്ദുൽ റസാക്ക്,മാനന്തവാടി സ്വദേശി അനീഷ് മാത്യു എന്നിവർ ലോറിയിൽ ഉണ്ടായിരുന്നു.ക്ഷീണം കാരണം ഇവർ ക്യാബിനിൽ ഉറങ്ങിപോയിരുന്നു.രാവിലെ ഉറക്കമുണർന്നപ്പോഴാണ് മോഷണ വിവരം അറിയുന്നത്.ടാര്‍പോളിന്‍ കൊണ്ട് മൂടിയ ലോറിയുടെ ഷീറ്റ് കീറി പിറകില്‍ നിന്നും മുകളില്‍ നിന്നും സാധനങ്ങള്‍ അടങ്ങിയ പെട്ടികൾ എടുത്തുകൊണ്ടുപോകുകയായിരുന്നു.വിവരമറിഞ്ഞ് സ്ഥലത്തെത്തിയ തളിപ്പറമ്പ് എസ്എച്ച്ഒ പി.കെ.സുധാകരന്‍റെ നേതൃത്വത്തില്‍ പോലീസ് സംഘം അന്വേഷണം ആരംഭിച്ചു
പാലക്കാട്:വിലക്ക് ലംഘിച്ച് മോഹൻ ഭാഗവത് ഇത്തവണയും പാലക്കാട് സ്കൂളിൽ പതാകയുയർത്തി. പാലക്കാട് കല്ലേക്കാട് വ്യാസ വിദ്യാപീഠം സ്കൂളിലാണ് ഇത്തവണ മോഹൻ ഭാഗവത് പതാകയുയർത്തിയത്.സർക്കാർ-എയ്ഡഡ് സ്കൂളുകളിൽ സ്കൂൾ മേധാവിയെ ജനപ്രതിനിധികളോ മാത്രമേ ദേശീയ പാത ഉയർത്താവൂ എന്നാണ് നിയമം.ഇത് മറികടന്നാണ് മോഹൻ ഭാഗവത് പതാക ഉയർത്തിയത്.ചടങ്ങിന് വൻ പോലീസ് സുരക്ഷാ ഒരുക്കിയിരുന്നു. നേരത്തെ കഴിഞ്ഞ സ്വാതന്ത്രദിനത്തിൽ പാലക്കാട് കർണകിയമ്മൻ സ്കൂളിൽ വിലക്ക് ലംഘിച്ച് മോഹൻ ഭഗവത് പതാക ഉയർത്തിയത് വിവാദമായിരുന്നു.ഇതേത്തുടർന്ന് ഇത്തവണ സ്കൂളുകളിലും സർക്കാർ സ്ഥാപനങ്ങളിലും അതതു സ്ഥാപനങ്ങളിലെ മേധാവികൾ തന്നെ പതാക ഉയർത്തണമെന്ന് സർക്കാർ സർക്കുലർ ഇറക്കിയിരുന്നു. ഇതിനിടെയാണ് മോഹൻഭഗവത് വീണ്ടും സ്കൂളിൽ പതാക ഉയർത്തിയത്.