News Desk

മലപ്പുറം:തിരൂർ ഉണ്യാലിൽ സിപിഎം പ്രവർത്തകന് വെട്ടേറ്റു.ഉണ്യാൽ കമ്മുട്ടകത്ത് നിസാറിനാണ് പരിക്കേറ്റത്.ഇയാളെ കോഴിക്കോട്ടെ സ്വകാര്യ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാവിലെയാണ് സംഭവമുണ്ടായത്.അക്രമത്തിനു പിന്നിൽ മുസ്ലിം ലീഗ് പ്രവർത്തകരാണെന്ന് സിപിഎം ആരോപിച്ചു.ദിവസങ്ങൾക്ക് മുൻപും ഉണ്യാലിൽ സിപിഎം പ്രവർത്തകന് നേരെ ആക്രമണം ഉണ്ടായിരുന്നു.സ്ഥിരം സംഘർഷ മേഖലയായ ഉണ്യാൽ പ്രദേശത്ത് പോലീസ് പട്രോളിംഗ് ശക്തമാണെങ്കിലും ഒറ്റപ്പെട്ട അക്രമങ്ങൾ പ്രദേശവാസികളെ ആശങ്കപ്പെടുത്തുന്നുണ്ട്.

കൊച്ചി:മലയാളിക്ക് മനഃസാക്ഷി നഷ്ടപ്പെട്ടുകൊണ്ടിരിക്കുന്നതിന്‍റെ ഉത്തമ ഉദാഹരണമാണ് ശനിയാഴ്ച വൈകുന്നേരം 6.30ന് കൊച്ചി നഗരത്തിൽ നടന്നത്. മൂന്നുനിലകെട്ടിടത്തിന്‍റെ മുകളിൽ നിന്നും വീണ് രക്തം വാർന്ന് വഴിയിൽ കിടന്നയാളെ രക്ഷപെടുത്താതെ ജനക്കൂട്ടം കാഴ്ചക്കാരായി നോക്കി നിന്നു. തൃശൂർ തൃപ്രയാർ കല്ലുവെട്ടുകുഴി പാലയ്ക്കൽ ഷാജി (46) ആണ് പത്മജംഗ്ഷന് സമീപത്തെ ലോഡ്ജിൽ നിന്നും തലകറങ്ങി താഴെ വീണത്. കെട്ടിടത്തിന്‍റെ മൂന്നാം നിലയിൽ നിന്ന ഷാജി റോഡിൽ നിർത്തിയിട്ടിരുന്ന സ്കൂട്ടറിൽ തട്ടിയ ശേഷം ഫുട്പാത്തിലേക്കു വീഴുകയായിരുന്നു. ഏറെപ്പേർ കാഴ്ചക്കാരായി ഉണ്ടായിരുന്നിട്ടും ഇദ്ദേഹത്തെ ഒന്നു അനക്കി നോക്കാനോ ആശുപത്രിയിലേക്കു കൊണ്ടുപോകാനോ ആരും തയാറായില്ല. ചിലർ എത്തിനോക്കിയ ശേഷം സ്ഥലം വിടുകയും ചെയ്തു.ഒടുവിൽ ഒരു സ്ത്രീയുടെ ഇടപെടലിനെ തുടർന്നാണ് ഇയാളെ ഏറെനേരത്തിനു ശേഷം ആശുപത്രിയിലെത്തിച്ചത്.താഴെ വീണുകിടന്ന മനുഷ്യൻ ജീവനുവേണ്ടി പിടയുമ്പോൾ നോക്കി നിന്ന് ദൃശ്യങ്ങൾ പകർത്താൻ ശ്രമിക്കുന്നതല്ലാതെ ആ ജീവനെ രക്ഷിക്കാൻ വേണ്ടതൊന്നും ചെയ്യാത്ത സാഹചര്യത്തിലാണ് വഴിയാത്രക്കാരിയായ ഒരു സ്ത്രീ അയാളെ രക്ഷിക്കാൻ വേണ്ട കാര്യങ്ങൾ ചെയ്തത്.ആദ്യം ഒരു ഓട്ടോയിൽ ഇദ്ദേഹത്തെ കയറ്റിയെങ്കിലും പിന്നീട് താഴെയിറക്കി റോഡിൽ തന്നെ കിടത്തി. തുടർന്ന് ഓട്ടോ സ്ഥലം വിട്ടു.സഹികെട്ട വീട്ടമ്മ അതുവഴി വന്ന ഒരു കാർ തടഞ്ഞുനിർത്തിയാണ് അപകടത്തിൽപ്പെട്ടയാളെ ആശുപത്രിയിലേക്ക് മാറ്റിയത്. ആദ്യം എറണാകുളം ജനറൽ ആശുപത്രിയിലെത്തിച്ച് പ്രാഥമിക ചികിത്സ നൽകിയശേഷം ഇദ്ദേഹത്തെ കോട്ടയം മെഡിക്കൽ കോളജിലേക്ക് മാറ്റി.

കണ്ണൂർ:മദ്യപിച്ച് വാഹനമോടിച്ച് നിരവധി വാഹനങ്ങളിൽ ഇടിച്ച് അപകടമുണ്ടാക്കിയയാളെ പിടികൂടി.ചൊവ്വ സ്വദേശി സുരഭ്(26) ആണ് പിടിയിലായത്.ഇന്നലെ വൈകിട്ടാണ് സംഭവം. ഇയാൾ ഓടിച്ചിരുന്ന കാർ നിർത്തിയിട്ടിരുന്നതും ഓടിക്കൊണ്ടിരുന്നതുമായ അഞ്ചു ബൈക്കുകളും ഒരു കാറും ഇടിച്ചുതെറിപ്പിച്ചാണ് പോയതെന്ന് ട്രാഫിക് പോലീസ് പറഞ്ഞു. ഒടുവിൽ കക്കാട് ചേനോളി ബസാറിൽ റോഡരികിലെ തൂണിലിടിച്ചാണ് കാർ നിന്നത്. വിവരമറിഞ്ഞ് സ്ഥലത്തെത്തിയ പോലീസ് മദ്യപിച്ച് വാഹനമോടിച്ച് അപകടം വരുത്തിയതിന് ഇയാളുടെ പേരിൽ കേസെടുക്കുകയായിരുന്നു.

കണ്ണൂർ:സിപിഐഎം കണ്ണൂർ ജില്ലാ സമ്മേളനത്തിന് ഇന്ന് സമാപനം.സമാപന സമ്മേളനം ജവഹർ സ്റ്റേഡിയത്തിലെ ഇ.കെ നായനാർ നഗറിൽ പോളിറ്റ് ബ്യുറോ അംഗവും മുഖ്യമന്ത്രിയുമായ പിണറായി വിജയൻ ഉൽഘാടനം ചെയ്യും.ഉച്ചയ്ക്ക് രണ്ടുമണിയോടുകൂടി സെന്റ് മൈക്കിൾസ് സ്കൂൾ മൈതാനത്തു നിന്നും ആരംഭിക്കുന്ന റെഡ് വോളന്റിയർ മാർച്ചിൽ കാൽലക്ഷത്തോളം പുരുഷ-വനിതാ വോളന്റിയർമാർ പങ്കെടുക്കും.നാടിൻറെ നാനാഭാഗത്തു നിന്നും സമ്മേളനത്തിൽ പങ്കെടുക്കാനെത്തുന്ന ജനങ്ങൾ താണയിലും എ കെ ജി ആശുപത്രിക്ക് സമീപവും ബസ്സിറങ്ങി ചെറു പ്രകടനങ്ങളായി സമ്മേളന നഗരിയിൽ എത്തിച്ചേരും. സ്റ്റേഡിയത്തിൽ പിണറായി വിജയനും കോടിയേരി ബാലകൃഷ്ണനും ചുവപ്പുസേനയുടെ ഗാർഡ് ഓഫ് ഓണർ സ്വീകരിക്കും.വൈകുന്നേരം നടക്കുന്ന പൊതു സമ്മേളനത്തിൽ സിപിഎം സംസ്ഥാന സെക്രെട്ടറി കോടിയേരി ബാലകൃഷ്ണൻ,കേന്ദ്ര കമ്മിറ്റി അംഗങ്ങളായ ഇ.പി ജയരാജൻ,പി.കെ ശ്രീമതി,കെ.കെ ശൈലജ,എ.കെ ബാലൻ,സംസ്ഥാന സെക്രെട്ടെറിയേറ്റ് അംഗം എം.വി ഗോവിന്ദൻ എന്നിവർ പങ്കെടുക്കും.അഴീക്കോട് ‘ചെന്താരക’ത്തിന്റെ ഗാനമേളയും നടക്കും.

തൃശൂർ:പ്രശസ്ത ഓട്ടൻതുള്ളൽ കലാകാരൻ കലാമണ്ഡലം ഗീതാനന്ദൻ ഓട്ടൻതുള്ളൽ വേദിയിൽ കുഴഞ്ഞുവീണു മരിച്ചു.ഇരിങ്ങാലക്കുട അവട്ടത്തൂരിൽ ക്ഷേത്രത്തിൽ ഓട്ടൻതുള്ളൽ അവതരിപ്പിക്കുന്നതിനിടെ കുഴഞ്ഞുവീണ് മരിക്കുകയായിരുന്നു.ഉത്സവത്തിന്‍റെ പള്ളിവേട്ട ദിനമായിരുന്ന ഞായറാഴ്ച രാത്രി എട്ടോടെ കലാപരിപാടി അവതരിപ്പിക്കുന്നതിനിടയിൽ കുഴഞ്ഞുവീഴുകയായിരുന്നു. ഉടനെ സമീപത്തുള്ള പുല്ലൂർ മിഷൻ ആശു പതിയിൽ എത്തിച്ചെക്കിലും ഡോക്ടർമാർ മരണം സ്ഥിരീകരിച്ചു.ഹൃദയാഘാതമാണു മരണകാരണം.1974ൽ കലാമണ്ഡലത്തിൽ തുള്ളൽ പഠിക്കാനെത്തിയ ഗീതാനന്ദൻ 1983 മുതൽ ഇവിടെ അധ്യാപകനായി. ഇരുപതുവർഷത്തോളം കലാമണ്ഡലത്തിൽ വകുപ്പ് മേധാവിയായും സേവനം അനുഷ്ടിച്ചു.കഴിഞ്ഞ മാർച്ചിലാണ് ഔദ്യോഗിക ജീവിതത്തിൽനിന്നും വിരമിച്ചത്.രാജ്യത്തിനകത്തും പുറത്തുമായി അയ്യാരത്തിലധികം വേദികളിൽ അദ്ദേഹം ഓട്ടൻതുള്ളൽ അവതരിപ്പിച്ചിട്ടുണ്ട്.തൂവൽ കൊട്ടാരം,കമലദളം,മനസിനക്കരെ,നരേന്ദ്രൻ മകൻ ജയകാന്തൻ വക തുടങ്ങി നിരവധി ചിത്രങ്ങളിലും അദ്ദേഹം അഭിനയിച്ചിട്ടുണ്ട്. സിനിമയിൽ നൃത്തസംവിധായികയായ ശോഭയാണ് ഭാര്യ.മക്കൾ:സനൽ കുമാർ,ശ്രീലക്ഷ്മി.പ്രശസ്തനായ തുള്ളൽ കലാകാരൻ മഠത്തിൽ പുഷ്പവത്ത് കേശവൻ നമ്പീശനാണ് പിതാവ്.