News Desk

കണ്ണൂർ:കണ്ണൂരിലെ പ്രമുഖ ജ്വല്ലറിയിൽ നിന്നും സ്വർണ്ണം വായ്പ്പയായി വാങ്ങി പണം നൽകാതെ മുങ്ങി നടന്ന സ്ത്രീ പോലീസ് പിടിയിലായി.അഴീക്കോട് മൂന്നുനിരത്ത് മുക്രി ഹൗസിൽ റീത്ത ശിവകുമാറിനെയാണ്(54) പിലാത്തറയിൽ നിന്നും വളപട്ടണം എസ്‌ഐ ശ്രീജിത്ത് കോടേരിയും സംഘവും അറസ്റ്റ് ചെയ്തത്.ആറു മാസം മുൻപ് മകളുടെ വിവാഹ ആവശ്യങ്ങൾക്കായി കണ്ണൂരിലെ പ്രമുഖ ജ്വല്ലറിയിൽ നിന്നും നാല് ലക്ഷത്തിലധികം രൂപയുടെ സ്വർണ്ണം കടമായി വാങ്ങി പണം നൽകാതെ മുങ്ങി നടക്കുകയായിരുന്നു ഇവർ.ബാങ്ക് വായ്‌പ്പാ കിട്ടിയാലുടൻ പണം നൽകാമെന്ന് പറഞ്ഞാണ് സ്വർണ്ണം വാങ്ങിയത്.ഇതിനു പുറമെ കാഞ്ഞങ്ങാട് സ്ഥലമുണ്ടെന്നു പറഞ്ഞ് സ്വത്തു തട്ടിപ്പും ഇവർ നടത്തിയിരുന്നു.നാലുപേരിൽ നിന്നായി 70 ലക്ഷം രൂപയാണ് ഇവർ ഇത്തരത്തിൽ തട്ടിയെടുത്തത്. തട്ടിപ്പ് നടത്തിയ ഇവർ മുംബൈയിലും ബെഗളൂരുവിലും ഒളിച്ചു താമസിക്കുന്നുണ്ടെന്ന രഹസ്യ വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് പിടിയിലാകുന്നത്.

കണ്ണൂർ:ആകാശത്ത് വിസ്മയം തീർത്ത് സൂപ്പർ ബ്ലൂ ബ്ലഡ് മൂൺ ദൃശ്യമായി.എന്നാൽ ആകാശം മേഘാവൃതമായതു കാരണം 152 വർഷങ്ങൾക്കു ശേഷം ദൃശ്യമായ ഈ പ്രതിഭാസം ജില്ലയിൽ ദൃശ്യമായത് ഭാഗികമായി മാത്രം.പലയിടത്തും ആകാശം  മേഘാവൃതമായതിനാൽ ചന്ദ്രന്റെ ഓറഞ്ച് ചന്തം പൂർണ്ണമായും കാണാനായില്ല. അപൂർവ പ്രതിഭാസം കാണുന്നതിനായി ജനങ്ങൾ വൈകിട്ടോടെ തന്നെ തുറസായ സ്ഥലങ്ങൾ,കടൽത്തീരം  എന്നിവിടങ്ങളിൽ സ്ഥാനം പിടിച്ചു.കണ്ണൂർ സയൻസ് പാർക്കിലെ ഒബ്‌സർവേറ്ററി ടവറിലെ ടെലിസ്കോപ്പിലൂടെയും അല്ലാതെയും കുട്ടികളടക്കം നിരവധി ആളുകൾ കാഴ്ച കണ്ടു.പയ്യാമ്പലം ബീച്ചിലും കാഴ്ച കാണാൻ നിരവധി ആളുകൾ എത്തിയിരുന്നു.വൈകുന്നേരം മുതൽ ആകാശത്തെ അപൂർവ ദൃശ്യം കാണാൻ എത്തിയവരുടെ മുൻപിൽ 7.10 ഓടെയാണ് ചുവന്ന നിറമുള്ള ചന്ദ്രൻ തെളിയാൻ തുടങ്ങിയത്.ഇടയ്ക്ക് കാർമേഘം ചന്ദ്രനെ മറച്ചെങ്കിലും കാത്തു നിന്നവരെ നിരാശരാക്കാതെ പൂർണ്ണചന്ദ്രൻ ഉദിച്ചു.എന്നാൽ അപ്പോഴേക്കും ഓറഞ്ച് രാശി മാഞ്ഞിരുന്നു.മൂന്നു അപൂർവതകളോടെ ആകാശത്തുദിച്ച ചന്ദ്രനെ കാണാൻ കഴിഞ്ഞതിന്റെ സന്തോഷത്തിലാണ് കാണികൾ മടങ്ങിയത്.

കൊച്ചി:മണ്ണെണ്ണ ഉള്ളിൽച്ചെന്ന് ഒന്നര വയസ്സുകാരൻ മരിച്ചു.പാറക്കടവ് കടവിൽ വീട്ടിൽ വിഷ്ണുലാലിന്റെ മകൻ അഭിനവ്(ഒന്നര)ആണ് മരിച്ചത്.മണ്ണെണ്ണ ഉള്ളിൽച്ചെന്നതിനെ തുടർന്ന് കൊച്ചിയിലെ ആശുപത്രിയിൽ ചികിത്സയിലായിരുന്നു കുട്ടി.ചൊവ്വാഴ്ച വൈകിട്ടാണ് സംഭവം.മുറിയിൽ നിലത്തുവീണ നെയിൽ പോളിഷ് തുടയ്ക്കുന്നതിനായി അമ്മ എടുത്തു വെച്ച മണ്ണെണ്ണ കുഞ്ഞ് കുടിക്കുകയായിരുന്നു.മണ്ണെണ്ണ എടുത്തു വെച്ചപ്പോൾ ഫോൺ അടിച്ചതിനെത്തുടർന്ന് കുട്ടിയുടെ അമ്മ അതെടുക്കാൻ പോയപ്പോൾ മുറിയിൽ കട്ടിലിൽ കിടക്കുകയായിരുന്ന കുഞ്ഞ് മണ്ണെണ്ണ കുടിക്കുകയായിരുന്നു.വായിലും മൂക്കിലും മണ്ണെണ്ണ പോയി അബോധാവസ്ഥയിലായ കുഞ്ഞിനെ ഉടൻതന്നെ ആശുപത്രിയിലെത്തിച്ചെങ്കിലും ബുധനാഴ്ച പുലർച്ചയോടെ കുഞ്ഞ് മരിക്കുകയായിരുന്നു.

കൊച്ചി:കൊച്ചിയിൽ ഒരു കോടി രൂപയുടെ മയക്കുമരുന്ന് പിടികൂടി.ഹോങ്കോങ്ങിൽ നിന്നും കൊച്ചി സ്വദേശിയുടെ പേരിൽ പാർസലായി എത്തിയതാണ് മയക്കുമരുന്ന്.പാർസൽ കണ്ട് സംശയം തോന്നിയ കസ്റ്റംസ് നടത്തിയ പരിശോധനയിലാണ് മയക്കുമരുന്ന് കണ്ടെത്തിയത്. പാഴ്‌സലിൽ പേരുള്ള കൊച്ചി സ്വദേശിയെ കണ്ടെത്താനായിട്ടില്ല. ഇയാൾക്കായുള്ള തിരച്ചിൽ തുടരുകയാണ്. നിശാപാർട്ടികൾക്കും മറ്റും ഉപയോഗിക്കുന്ന മയക്കുമരുന്നായ ആംഫിറ്റമിൻ എന്ന മയക്കുമരുന്നാണ് പിടികൂടിയത്.വിദേശത്ത് ഒരു കിലോയ്ക്ക് രണ്ടു കോടി രൂപയോളം വിലവരുന്ന മയക്കുമരുന്നാണിത്.അരക്കിലോ മയക്കുമരുന്നാണ് പാഴ്‌സലിൽ ഉണ്ടായിരുന്നത്.