News Desk

കണ്ണൂർ:ആക്രിക്കച്ചവടക്കാരനായിരുന്ന തമിഴ്‌നാട് സ്വദേശി കണ്ണൂരിൽ കുത്തേറ്റ് മരിച്ചു.വളപട്ടണത്ത് താമസിക്കുന്ന തമിഴ്നാട് ചിന്നസേലം സ്വദേശി പെരിയസ്വാമി (49) യാണു മരിച്ചത്. ഞായറാഴ്ച വൈകുന്നേരം വളപട്ടണം ടൗണിൽ ഭക്ഷണം കഴിക്കാൻ എത്തിയതായിരുന്നു ഇയാൾ.ഇവിടെവെച്ച് പരിചയക്കാരായ രണ്ടുപേരുമായി വാക്കുതർക്കമുണ്ടാകുകയും റോഡിൽ വച്ച് ഉന്തുംതള്ളും നടക്കുകയും ചെയ്തു. തുടർന്ന് രണ്ടുപേരിൽ ഒരാൾ കമ്പി കൊണ്ട് തലയ്ക്കടിക്കുകയും മറ്റൊരാൾ കത്തികൊണ്ട് വയറിൽ കുത്തുകയുമായിരുന്നുവെന്ന് പോലീസ് പറഞ്ഞു.ബഹളംകേട്ട് ഓടിക്കൂടിയ നാട്ടുകാർ പെരിയസ്വാമിയെ ആശുപത്രിയിൽ എത്തിച്ചെങ്കിലും വഴിമധ്യേ മരിച്ചു. അക്രമികളെക്കുറിച്ച് വ്യക്തമായ സൂചന ലഭിച്ചതായും ഉടൻ പിടികൂടുമെന്നും പോലീസ് പറഞ്ഞു.

ഇരിട്ടി:തില്ലങ്കേരി ആലാച്ചിയിൽ നിന്നും ബോംബ് നിർമാണ സാമഗ്രികൾ കണ്ടെത്തി.ആലാച്ചി മുത്തപ്പൻ മടപ്പുരയ്ക്ക് സമീപത്തുള്ള ആളൊഴിഞ്ഞ പറമ്പിൽ നിന്നാണ് ഇവ കണ്ടെടുത്തത്. ഷുഹൈബ് വധക്കേസിലെ പ്രതികളെ തിരയുന്നതിനിടെ മുഴക്കുന്നു എസ്‌ഐ പി.രാജേഷും സംഘവുമാണ് ബോംബ് നിർമാണ സാമഗ്രികൾ പിടികൂടിയത്.വെടിമരുന്ന്,കയർ, ചാക്കുനൂൽ, പശ,ഇരുമ്പു ചീളുകൾ എന്നിവയാണ് ഇതിൽ ഉണ്ടായിരുന്നത്.

ഇരിട്ടി:ഉളിക്കൽ-പയ്യാവൂർ മലയോര ഹൈവെ നിർമാണത്തിനിടെ കോൺക്രീറ്റ് മിക്സർ മെഷീൻ മറിഞ്ഞ് ഏഴുപേർക്ക് പരിക്ക് .കോക്കാട്ട് പുതുതായി നിർമിക്കുന്ന പാലത്തിന്റെ കോൺക്രീറ്റ് പ്രവൃത്തിക്കിടെ മെഷീൻ തോട്ടിലേക്ക് മറിയുകയായിരുന്നു.തോട്ടിൽ കോൺക്രീറ്റ് ഉറപ്പിക്കുന്ന തൊഴിലാളികൾക്ക് മുകളിലേക്ക് മെഷീൻ വീഴുകയായിരുന്നു. അപകടത്തിൽ ഗുരുതരമായി പരിക്കേറ്റ പശ്ചിമ ബംഗാൾ സ്വദേശിയായ ഷമീം അൻസാരിയെ പരിയാരം മെഡിക്കൽ കോളേജിൽ പ്രവേശിപ്പിച്ചു.പരിക്കേറ്റ ബീഹാർ സ്വദേശികളായ ഗുർഷിത് ആലം,മജുബുൾ അൻസാരി,വടകര സ്വദേശികളായ മോഹനൻ കക്കട്ടിൽ,മിഥുൻ,സജീഷ് പയ്യോളി,അബ്ദുൽ മുത്തലീബ് എന്നിവരെ തലശ്ശേരി,ഇരിട്ടി എന്നിവിടങ്ങളിലെ സ്വകാര്യ ആശുപത്രികളിൽ പ്രവേശിപ്പിച്ചു. ഊരാളുങ്കൽ ലേബർ കോൺട്രാക്ടർസ് സൊസൈറ്റിയുടെ തൊഴിലാളികളാണ് ഇവർ.ഇരിട്ടിയിൽ നിന്നെത്തിയ അഗ്‌നിശമനസേനയും ഉളിക്കൽ പോലീസും നാട്ടുകാരും ചേർന്ന് നടത്തിയ രണ്ടുമണിക്കൂറോളം നീണ്ടു നിന്ന രക്ഷാപ്രവർത്തനത്തിനൊടുവിലാണ് ഇവരെ രക്ഷപ്പെടുത്തിയത്.ഇതിനിടെ പരിക്കേറ്റവരെ രക്ഷിക്കുന്നതിനിടെ ഒരു പോലീസുകാരനും പരിക്കേറ്റു.

കണ്ണൂർ:ശുഹൈബ് വധക്കേസിൽ നിർണായക വഴിത്തിരിവ്.കൊലയാളികൾ സഞ്ചരിച്ച വാഹനം കണ്ടെത്തി.അരോളി പാലോട്ടുകാവിനു സമീപം യു. പ്രശോഭിന്‍റെ ഉടമസ്ഥതയിലുള്ള വെളുത്ത വാഗണ്‍ ആർ കാറാണു പ്രതികൾ കൊലയ്ക്ക് ഉപയോഗിച്ചത്.ശനിയാഴ്ച പോലീസ് പിടിയിലായ അഖിലാണു കാർ വാടകയ്ക്കെടുത്തത്.കൊല നടത്തിയ ശേഷം കാർ 14നു തിരികെ നൽകുകയും ചെയ്തു.വാഗൺആർ കാറിലെത്തിയ പ്രതികളാണ് ബോംബെറിഞ്ഞ ശേഷം ശുഹൈബിനെ വെട്ടിക്കൊലപ്പെടുത്തിയതെന്ന് ശുഹൈബിനൊപ്പമുണ്ടായിരുന്ന സുഹൃത്തുക്കൾ വ്യക്തമാക്കിയിരുന്നു.ശുഹൈബ് വധക്കേസിൽ അഞ്ചുപ്രതികളെ കൂടി അറസ്റ്റ് ചെയ്തതായി അറിയിച്ച കണ്ണൂർ എസ്പി ശിവവിക്രം പ്രതികൾ ഉപയോഗിച്ച കാറും കസ്റ്റഡിയിലെടുത്തതായി പറഞ്ഞിരുന്നു.ഈ കാറിനെ കുറിച്ച് നടത്തിയ അന്വേഷണത്തിലാണ് ഇത് പാപ്പിനിശ്ശേരി അരോളി സ്വദേശിയുടേതാണെന്ന് കണ്ടെത്തിയത്.അതേസമയം കേസിൽ നേരത്തെ അറസ്റ്റിലായ ആകാശ് തില്ലങ്കേരിയെയും റിജിൻ രാജിനെയും നാല് ദിവസത്തേക്ക് പോലീസ് കസ്റ്റഡിയിൽ വിട്ടിരിക്കുകയാണ്.