കൊച്ചി: കളമശേരിയില്‍ കുസാറ്റ് ക്യാംപസിനുള്ളിലെ എസ്.ബി.ഐ എ.ടി.എം കത്തിക്കാന്‍ ശ്രമം. മെഷീനിന് തീയിടുന്ന യുവാവിന്റെ ദൃശ്യങ്ങള്‍ പൊലീസിന് ലഭിച്ചു.ഞായറാഴ്ച രാത്രിയാണ് സംഭവമുണ്ടായത്. എടിഎം കൗണ്ടറിനകത്ത് നിന്നും പുക ഉയരുന്നത് ശ്രദ്ധയില്‍പ്പെട്ടതോടെ അധികൃതരെത്തി പരിശോധിക്കുകയായിരുന്നു. ഷോര്‍ട്ട് സര്‍ക്യൂട്ട് ആണ് തീപിടുത്തത്തിന് കാരണമെന്നാണ് ആദ്യം കരുതിയിരുന്നത്. എന്നാല്‍ സിസിടിവി പരിശോധിച്ചപ്പോള്‍ പെട്രോള്‍ ഒഴിച്ച്‌ തീകൊളുത്തുകയായിരുന്നുവെന്ന് കണ്ടെത്തി. അതേസമയം, ആക്രമണത്തില്‍ എ.ടി.എമ്മിലെ പണം നഷ്ടപ്പെട്ടിട്ടില്ലെന്നും, മെഷീന്‍ കത്തി നശിച്ചിട്ടില്ലെന്നും പൊലീസ് വ്യക്തമാക്കി.കൗണ്ടറിലെത്തിയ പ്രതി ആദ്യം കാര്‍ഡുപയോഗിച്ച്‌ പണമെടുക്കാന്‍ നോക്കി. നടക്കാതെ വന്നതോടെ കാര്‍ഡ് പോക്കറ്റിലിട്ടു. പിന്നാലെ ബാഗില്‍ ഒരു കുപ്പിയില്‍ നിറയെ കരുതിയിരുന്ന പെട്രോള്‍ സമാനമായ ദ്രാവകം ഒഴിച്ചു മെഷീന്‍ തീയിടുകയായിരുന്നു. കുസാറ്റ് കോമണ്‍ ഫെസിലിറ്റി സെന്ററിലെ ബാങ്ക് ശാഖയോട് ചേര്‍ന്നുള്ള എ.ടി.എം കൗണ്ടറിലായിരുന്നു യുവാവിന്റെ അക്രമം. മെഷീനില്‍ നിന്ന് തീയും പുകയും വരുന്നത് സെക്യൂരിറ്റി ജീവനക്കാരുടെ ശ്രദ്ധയില്‍ പെടുകയായിരുന്നു. ഷോര്‍ട്ട് സര്‍ക്യൂട്ടാണെന്ന് സംശയിച്ചെങ്കിലും സി.സി.ടി.വി ദൃശ്യങ്ങള്‍ പരിശോധിച്ചതോടെയാണ് കത്തിച്ചതാണെന്ന് മനസിലായത്. കളമശേരി സി.ഐയുടെ നേതൃത്വത്തില്‍ അന്വേഷണം ആരംഭിച്ചു. ഫോറന്‍സിക് വിദഗ്ധരും സ്ഥലത്തെത്തി പരിശോധന നടത്തി.