കണ്ണൂര്‍: കണ്ണുര്‍ കോര്‍പറേഷന്‍ മേയര്‍ ടി.ഒ.മോഹനന്റെ പേരില്‍ വ്യാജ ഫെയ്‌സ് ബുക്ക് അക്കൗണ്ടുണ്ടാക്കി പണം തട്ടാന്‍ ശ്രമം. ആശുപത്രിയില്‍ അതിതീവ്രപരിചരണ വിഭാഗത്തില്‍ ചികിത്സയില്‍ കഴിയുന്ന ഒരു രോഗിയുടെ ചിത്രം പോസ്റ്റു ചെയ്തു കൊണ്ടാണ് തട്ടിപ്പ് നടത്താന്‍ ശ്രമിച്ചത്.ചിത്രത്തിലുള്ളയാള്‍ തന്റെ ബന്ധുവാണെന്നും അതീവ ഗുരുതരാവസ്ഥയില്‍ ചികിത്സയില്‍ കഴിയുന്ന ഇദ്ദേഹത്തിന്റെ ചികിത്സയ്ക്കായി ഒട്ടേറെ പണം ചെലവായെന്നും ഉദാരമതികള്‍ സഹായിക്കണമെന്നാവശ്യപ്പെട്ടുമാണ് മേയറുടെ അഭ്യര്‍ത്ഥന പോസ്റ്റു ചെയ്തിട്ടുള്ളത്.ഇതിനായി വ്യാജ അക്കൗണ്ട് നമ്പറും നല്‍കിയിട്ടുണ്ട്.ഈ സാഹചര്യത്തിലാണ് തന്റെ പേരിലുള്ള സാമ്പത്തിക അഭ്യര്‍ത്ഥന മേയറുടെ ശ്രദ്ധയില്‍പ്പെടുന്നത്.ഇതിനെതിരെ പൊലിസില്‍ പരാതി നല്‍കിയിട്ടുണ്ടെന്നും വ്യാജ അഭ്യര്‍ത്ഥനകളില്‍ ആരും വിശ്വസിക്കരുതെന്നും മേയര്‍ അറിയിച്ചു.