കണ്ണൂർ:കണ്ണൂരില്‍ ക്ഷേത്രംജീവനക്കാനായ ഡി വൈ എഫ് ഐ നേതാവിനെ ഓഫീസില്‍ കയറി വധിക്കാന്‍ ശ്രമം.പള്ളിക്കുന്ന് കാനത്തൂര്‍ ക്ഷേത്രം ക്ലാര്‍ക്ക് ആയ ആനന്ദിനെയാണ് ഞായറാഴ്ച വൈകിട്ട് ക്ഷേത്ര ഓഫീസില്‍ എത്തിയ ഒരു സംഘം ആളുകള്‍ കുത്തി പരിക്കേല്‍പിച്ചത്. പരിക്കേറ്റ ആനന്ദിനെ കണ്ണൂർ എ.കെ.ജി ആശുപത്രിയിൽ പ്രവേശിപ്പിച്ചു.തുടയെല്ലില്‍ മാരകമായ പരിക്കേറ്റ് എ കെ ജി ആശുപത്രിയില്‍ പ്രവേശിക്കപ്പെട്ട ആനന്ദിനെ അടിയന്തിര ചികിത്സയ്ക്ക് വിധേയമാക്കുകയുണ്ടായി. ഡി വൈ എഫ് ഐ പള്ളിക്കുന്ന് മേഖലാ നേതാവും സി പി എം പ്രവര്‍ത്തകനുമാണ് ആനന്ദ്. ആര്‍ എസ് എസ് പ്രവര്‍ത്തകരാണ് ആക്രമണത്തിന് പിന്നിലെന്ന് സി പി എം ആരോപിച്ചു.ആശുപത്രിയില്‍ ചികിത്സയില്‍ കഴിയുന്ന ആനന്ദിനെ സി പി എം ജില്ലാ സെക്രട്ടറി എം വി ജയരാജന്‍ സന്ദര്‍ശിച്ചു.ജില്ലയില്‍ സമാധാനഭംഗം വരുത്താനുള്ള ആര്‍ എസ് എസ് നീക്കത്തിന്റെ ഭാഗമാണ് അക്രമമെന്ന് ജയരാജൻ ആരോപിച്ചു.നിരവധി ക്രിമിനല്‍ കേസുകളില്‍ പ്രതിയും സേവാഭാരതി ആംബുലന്‍സ് ഡ്രൈവറുമാണ് ആനന്ദനെ വെട്ടിയത് എന്ന് തിരിച്ചറിഞ്ഞിട്ടുണ്ട്.സി സി ടിവി ദൃശ്യങ്ങളില്‍ തെളിവുകളുമുണ്ട്. കുറ്റവാളിയെ അറസ്റ്റുചെയ്ത് നിയമത്തിന് മുന്നിലെത്തിക്കാനുള്ള നടപടി പോലീസ് അടിയന്തിരമായി സ്വീകരിക്കണമെന്നും അദ്ദേഹം പറഞ്ഞു.