കൊല്ലം: ലിഫ്റ്റ് ചോദിച്ചു ബൈക്കില്‍ കയറിയ വീട്ടമ്മയെ തട്ടികൊണ്ടു പോകാന്‍ ശ്രമിച്ചതായി പരാതി.രക്ഷപ്പെടാനായി ബൈക്കില്‍ നിന്ന് ചാടിയിറങ്ങിയ യുവതിയെ തലയിടിച്ച്‌ വീണ് പരിക്കേറ്റതിനെ തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയോടെ കൊല്ലം ജില്ലയിലെ ചിതറ അരിപ്പല്‍ യുപി സ്കൂളിന്സമീപത്തായാണ് സംഭവം നടന്നത്. സ്കൂളില്‍ നിന്ന് മകള്‍ക്കുളള പുസ്തകവും വാങ്ങി വീട്ടിലേക്ക് പോകാനായി റോഡില്‍ വാഹനം കാത്തുനിന്ന ചോഴിയക്കോട് സ്വദേശിനിയായ യുവതിക്ക് ഏറെ നേരം കാത്തു നിന്നിട്ടും വാഹനമൊന്നും ലഭിച്ചില്ല. തുടര്‍ന്ന് ഇതുവഴി വന്ന ബൈക്ക് യാത്രക്കാരനെ കൈ കാണിക്കുകയായിരുന്നു. ബൈക്കില്‍ കയറിയ ഉടനെ ബൈക്ക് ഓച്ചിരുന്നയാള്‍ യുവതിയെയും കൊണ്ട് സമീപമുളള വനത്തിലേക്ക് കൊണ്ടുപോകാന്‍ ശ്രമിച്ചെന്നാണ് പരാതി.തുടര്‍ന്ന് ബൈക്കില്‍ നിന്ന് എടുത്തുചാടിയപ്പോള്‍ റോഡില്‍ തലയിടിച്ചു വീണു പരിക്കേല്‍ക്കുകയായിരുന്നു. കടയ്ക്കല്‍ താലൂക്കാശുപത്രിയിലെ ചികില്‍സയ്ക്ക് ശേഷം യുവതിയെ തിരുവനന്തപുരം മെഡിക്കല്‍ കോളജിലേക്ക് മാറ്റി. സംഭവത്തില്‍ ചിതറ പൊലീസ് കേസെടുത്ത് അന്വേഷണം തുടങ്ങി. വനത്തിനുളളില്‍ പൊലീസ് പരിശോധന നടത്തി. സിസിടിവി ദൃശ്യങ്ങള്‍ പ്രകാരം പ്രതിയെ പിടികൂടാനുളള ശ്രമത്തിലാണ് പൊലീസ്.