തിരുവനന്തപുരം:ഉത്തരേന്ത്യയിൽ നിന്ന് യുവതികളെ തിരുവനന്തപുരത്തേക്ക് കടത്തി പെൺവാണിഭം നടത്തിയ സംഘത്തെ അറസ്റ്റ് ചെയ്ത് അസം പോലീസ്.പതിനെട്ടു പേര്‍ അടങ്ങിയ റാക്കറ്റിനെയാണ് പോലീസ് പിടികൂടിയത്. നടത്തിപ്പുകാരായ മുസാഹുൾ ഹഖ്, റബുൾ ഹുസൈൻ എന്നിവരും പിടിയിലായി.സംഘത്തെ ഇന്ന് അസമിലേക്ക് കൊണ്ടു പോകും.കഴിഞ്ഞ ദിവസം തിരുവനന്തപുരത്ത് എത്തിയ അസം പോലീസ് ഉദ്യോഗസ്ഥർ സിറ്റി പോലീസ് കമ്മീഷണർ ബല്‍റാം ഉപാധ്യായയെ സന്ദർശിച്ച് കാര്യങ്ങൾ വിശദമാക്കി.തുടർന്ന് ഷാഡോ പോലീസിന്റെ സഹായത്തോടെ സംഘത്തെ കുടുക്കുകയായിരുന്നു.അസം സ്വദേശികളായ 9 സ്ത്രീകളും 9 പുരുഷന്മാരുമാണ് പിടിയിലായത്. പ്രായപൂർത്തിയാകാത്ത പെൺകുട്ടിയും സംഘത്തിലുണ്ടായിരുന്നു.തിരുവനന്തപുരം മെഡിക്കല്‍ കോളേജ്, തമ്പാനൂര്‍ പോലീസ് സ്റ്റേഷന്‍ എന്നിവയ്ക്ക് സമീപമുള്ള ഹോട്ടലുകളില്‍ നിന്നാണ് ഇവരെ പിടികൂടിയത്. കെട്ടിട നിർമ്മാണത്തിനെന്ന പേരിലാണ് ഇവർ അസമിൽ നിന്ന് യുവതികളെ എത്തിച്ചതെന്ന് പോലീസ് പറഞ്ഞു.യുവതികളുടെ ബന്ധുക്കള്‍ നല്‍കിയ പരാതിയെ തുടർന്ന് അസം പോലീസ് ഫോൺ നമ്പർ കേന്ദ്രീകരിച്ച് നടത്തിയ അന്വേഷണമാണ് കേരളത്തിലെത്തിയത്.