കണ്ണൂർ:കന്റോൺമെന്റ് മേഖലയിലെ പൊതുസ്ഥലം പിടിച്ചെടുക്കാൻ വീണ്ടും പട്ടാളത്തിന്റെ ശ്രമം.ഇന്നലെ രാവിലെ ജില്ലാ ആശുപത്രി-കിലാശി റോഡിലേക്ക് മുള്ളുവേലി കെട്ടാനായിരുന്നു ശ്രമം. സംഭവം ശ്രദ്ധയിൽപ്പെട്ട സ്ത്രീകളും കുട്ടികളും ഉൾപ്പെടെയുള്ള നാട്ടുകാർ സംഘടിച്ച് നിർമാണപ്രവൃത്തികൾ തടസ്സപ്പെടുത്തി.പ്രതിഷേധവുമായി നാട്ടുകാർ എത്തിയതോടെ പട്ടാളക്കാർ പിൻവാങ്ങി.നേരത്തെ നാട്ടുകാർക്ക് അനുവദിച്ച അഞ്ചടി വീതിയും 130 മീറ്റർ നീളവുമുള്ള വഴിയാണ് ഇന്നലെ രാവിലെ എട്ടോടെ പിടിച്ചെടുക്കാൻ പട്ടാളം ശ്രമിച്ചത്. വേലികെട്ടുന്നതിനായി ഇരുമ്പ് തൂണും മറ്റും ഇവിടെ സ്ഥാപിക്കുകയും ചെയ്തിട്ടുണ്ട്. 27ന് ചേരുന്ന കന്റോൺമെന്റ് ബോർഡ് മീറ്റിംഗിൽ വഴി സംബന്ധിച്ച തർക്കം ചർച്ചചെയ്തു പരിഹരിക്കാമെന്ന് പട്ടാള അധികൃതർ നൽകിയ ഉറപ്പ് ലംഘിച്ചാണ് മുള്ളുവേലി കെട്ടാനുള്ള ശ്രമം നടന്നതെന്ന് നാട്ടുകാർ ആരോപിച്ചു.