ന്യൂഡൽഹി:കേന്ദ്ര കാര്‍ഷിക നിയമങ്ങള്‍ക്കെതിരായി നടത്താനിരുന്ന തന്റെ ഉപവാസം റദ്ദാക്കി മുതിര്‍ന്ന സാമൂഹിക പ്രവര്‍ത്തകന്‍ അന്ന ഹസാരെ. ബിജെപി മുതിര്‍ന്ന നേതാവും മഹാരാഷ്ട്ര മുന്‍ മുഖ്യമന്ത്രിയുമായ ദേവേന്ദ്ര ഫഡ്‌നാവിസിന്റെ സാന്നിധ്യത്തിലാണ് അദ്ദേഹം ഇന്നലെ തീരുമാനം പ്രഖ്യാപിച്ചത്.’ഞാന്‍ വളരെക്കാലമായി വിവിധ വിഷയങ്ങളില്‍ സമരം ചെയ്യുന്നു. സമാധാനപരമായി പ്രതിഷേധിക്കുന്നത് കുറ്റകരമല്ല. മൂന്ന് വര്‍ഷമായി ഞാന്‍ കര്‍ഷകരുടെ പ്രശ്‌നം ഉന്നയിക്കുന്നു. വിളകള്‍ക്ക് ശരിയായ വില ലഭിക്കാത്തതിനാല്‍ അവര്‍ ആത്മഹത്യ ചെയ്യുന്നു. എം‌എസ്‌പി (മിനിമം സപ്പോര്‍ട്ട് പ്രൈസ്) 50 ശതമാനം വര്‍ദ്ധിപ്പിക്കാന്‍ സര്‍ക്കാര്‍ തീരുമാനിച്ചു. ഇതുമായി ബന്ധപ്പെട്ട് എനിക്ക് കത്ത് ലഭിച്ചു,’ അന്ന ഹസാരെ മാധ്യമപ്രവര്‍ത്തകരോട് പറഞ്ഞു. കര്‍ഷകര്‍ക്കായുള്ള തന്റെ 15 ആവശ്യങ്ങള്‍ പരിഹരിക്കാന്‍ കേന്ദ്രം തീരുമാനിച്ചതിനാല്‍ ഇന്ന് മുതല്‍ നടത്താനിരുന്ന നിരാഹാര സമരം റദ്ദാക്കിയാതായി അന്ന ഹസാരെ വ്യക്തമാക്കി.