കണ്ണൂര്‍:വിദ്യാര്‍ഥിനിയെ മാനസികമായി പീഡിപ്പിച്ചുവെന്നാരോപിച്ച്‌ എസ്.എഫ്.ഐ.യുടെ നേതൃത്വത്തില്‍ ചിന്മയ വനിതാ കോളേജില്‍ അക്രമം. സംഘമായെത്തിയ പ്രവര്‍ത്തകര്‍ കോളേജിന്റെ ജനല്‍ച്ചില്ലുകള്‍ അടിച്ചു തകര്‍ത്തു. കാറും പൂച്ചട്ടികളും മറ്റും കേടുവരുത്തി. പോലീസെത്തിയശേഷമാണ് സംഘം പിരിഞ്ഞു പോയത്.സംഭവത്തില്‍ എസ്.എഫ്.ഐ. ജില്ലാ പ്രസിഡന്റ് സി.പി ഷിജു (26) സംസ്ഥാന കമ്മിറ്റിയംഗം മുഹമ്മദ് ഫാസിൽ(24), ജില്ലാ കമ്മിറ്റിയംഗം മുഹമ്മദ് ബഷീര്‍ (25) എന്നിവരെ പോലീസ് കസ്റ്റഡിയിലെടുത്തു. കോളേജിലെ നിയമാധ്യാപികയെ പിരിച്ചുവിടാനുള്ള മാനേജ്മെന്റ് നീക്കത്തിനെതിരെ വിദ്യാര്‍ഥിനികള്‍ നേരത്തെ സമരം ചെയ്തിരുന്നു. ഇതിന് നേതൃത്വം നല്‍കിയ പിജി വിദ്യാര്‍ഥിനിയെ അധ്യാപകര്‍ ഭീഷണിപ്പെടുത്തിയെന്നും തുടര്‍ന്ന് വിദ്യാര്‍ഥിനി കുഴഞ്ഞു വീണെന്നുമാണ് എസ്‌എഫ്‌ഐ ആരോപിക്കുന്നത്.അധ്യാപകരുടെ ഭീഷണിയെ തുടര്‍ന്ന് മകള്‍ക്ക് ദേഹാസ്വാസ്ഥമുണ്ടായതായി വിദ്യാര്‍ഥിനിയുടെ രക്ഷിതാവും വ്യക്തമാക്കി. സംഭവത്തില്‍ കണ്ണൂര്‍ ടൗണ്‍ പൊലീസില്‍ വിദ്യാര്‍ഥിനി പരാതി നല്‍കിയിട്ടുണ്ട്.വിദ്യാര്‍ഥിനിയെ ആരും ഭീഷണിപ്പെടുത്തിയിട്ടില്ലെന്ന് പ്രിന്‍സിപ്പല്‍ മഹേന്ദ്രന്‍ വ്യക്തമാക്കി.അതേസമയം മാനേജ്‌മെന്റില്‍നിന്ന് പരാതിയൊന്നും ലഭിച്ചിട്ടില്ലെന്ന് പോലീസ് പറഞ്ഞു.