കണ്ണൂര്‍: 2020 – 21 അധ്യയന വര്‍ഷത്തിലേക്ക് കണ്ണൂര്‍ മെഡിക്കല്‍ കോളേജിന് അഫിലിയേഷന്‍ നല്‍കുന്ന കാര്യം പരിഗണിക്കണമെന്ന കേരള ഹൈക്കോടതിയുടെ ഉത്തരവ് സുപ്രീം കോടതി സ്റ്റേ ചെയ്തു.അഡ്മിഷന്‍ സൂപ്പര്‍വൈസറി കമ്മിറ്റിയും വിദ്യാര്‍ഥികളും നല്‍കിയ ഹര്‍ജിയിലാണ് ജസ്റ്റിസ് അരുണ്‍ മിശ്ര അധ്യക്ഷനായ ബഞ്ചിന്റെ നടപടി.കേസിലെ എതിര്‍ കക്ഷികളായ കണ്ണൂര്‍ മെഡിക്കല്‍ കോളേജ് ഉള്‍പ്പടെ ഉള്ളവര്‍ക്ക് സുപ്രീം കോടതി നോട്ടീസയക്കുകയും ചെയ്തു.2016-17 വര്‍ഷം പ്രവേശനം നേടിയ വിദ്യാര്‍ഥികള്‍ക്ക് ഫീസ് റീഫണ്ട് ചെയ്യുന്നതുമായി ബന്ധപ്പെട്ടുള്ള സുപ്രീം കോടതി ഉത്തരവ് കോളേജ് പൂര്‍ണമായും നടപ്പാക്കിയിട്ടില്ല എന്നായിരുന്നു അഡ്മിഷന്‍ സൂപ്പര്‍വൈസറി കമ്മിറ്റി കോടതിയില്‍ ചൂണ്ടിക്കാട്ടിയത്.കമ്മിറ്റിക്ക് വേണ്ടി സീനിയര്‍ അഭിഭാഷകന്‍ ജയ്ദീപ് ഗുപ്ത, സി കെ ശശി എന്നിവരും വിദ്യാര്‍ത്ഥികള്‍ക്ക് വേണ്ടി രാകേന്ദ് ബസന്തും ആണ് ഹാജരായത്.