കൊച്ചി:നടിയെ ആക്രമിച്ച കേസിൽ മുഖ്യപ്രതിയായ പൾസർ സുനിയെ സഹായിച്ച പോലീസുകാരനെ സസ്‌പെൻഡ് ചെയ്തു.സിവിൽ പോലീസ് ഓഫീസർ അനീഷിനെയാണ് സസ്‌പെൻഡ് ചെയ്തത്.പൾസർ സുനിയെ ഫോൺ വിളിക്കാൻ സഹായിച്ചെന്നും തെളിവുകൾ നശിപ്പിച്ചെന്നുമാണ് അനീഷിനെതിരെ കണ്ടെത്തിയിരിക്കുന്ന കുറ്റം.കേസിൽ ദിലീപിന്റെ പങ്ക് പുറത്തുകൊണ്ടുവരാൻ അന്വേഷണ സംഘം നിയോഗിച്ച ആളാണ് അനീഷ് എന്ന ആക്ഷേപം ഉയർന്നിരുന്നു.ഇതുകൂടി പരിഗണിച്ചാണ് അനീഷിനെതിരെ നടപടി സ്വീകരിക്കാൻ ഉന്നത ഉദ്യോഗസ്ഥർ തീരുമാനിച്ചത്.പൾസർ സുനിയുടെ ശബ്ദം റെക്കോർഡ് ചെയ്ത് ദിലീപിന് അയച്ചുകൊടുക്കുകയും കാവ്യാമാധവന്റെ വസ്ത്ര വ്യാപാര സ്ഥാപനമായ ലക്ഷ്യയിലേക്ക് മൂന്നു തവണ വിളിച്ച് പൾസർ സുനി പിടിയിലായ വിവരം അനീഷ് അറിയിക്കുകയും ചെയ്തെന്നു പോലീസ് കണ്ടെത്തിയിരുന്നു.പിന്നീട് അനീഷ് മാപ്പ് എഴുതി നൽകിയിരുന്നെങ്കിലും അന്വേഷണ സംഘം ഇയാളെ പ്രതിചേർക്കുകയായിരുന്നു.