ന്യൂഡല്ഹി: നടിയെ ആക്രമിച്ച കേസില് ദൃശ്യങ്ങളുടെ പകര്പ്പ് ആവശ്യപ്പെട്ട് നടന് ദിലീപ് നല്കിയ ഹര്ജിയില് സുപ്രീംകോടതി ഇന്ന് വിധി പറയും. ദൃശ്യങ്ങള് കേസിലെ പ്രധാന രേഖയായതിനാല് അത് ലഭിക്കാന് തനിക്ക് അര്ഹതയുണ്ടെന്നായിരുന്നു ദിലീപിന്റെ വാദം. സ്വകാര്യത കണക്കിലെടുത്ത് ദൃശ്യങ്ങള് കൈമാറരുതെന്ന് സംസ്ഥാന സര്ക്കാരും ആക്രമണത്തിന് ഇരയായ നടിയും കോടതിയോട് ആവശ്യമുന്നയിച്ചിരുന്നു.നടിയെ ആക്രമിച്ച കേസിലെ പ്രധാന തെളിവായ ആക്രമണ ദൃശ്യങ്ങളുടെ പകര്പ്പ് ആവശ്യപ്പെട്ട് നടന് ദിലീപ് നല്കിയ ഹര്ജിയില് വാദം പൂര്ത്തിയാക്കി കഴിഞ്ഞ സെപ്റ്റംബര് 17നാണ് വിധി പറയാന് മാറ്റിവെച്ചത്. മെമ്മറി കാര്ഡിലെ ദൃശ്യങ്ങള് ലഭിച്ചെങ്കില് മാത്രമേ തന്റെ നിരപരാധിത്വം തെളിയിക്കാനാകൂ എന്നായിരുന്നു ദിലീപിന്റെ വാദം.വാട്ടര്മാര്ക്കിട്ടാണെങ്കിലും ദൃശ്യങ്ങൾ അനുവദിക്കണമെന്നായിരുന്നു ദിലീപിന്റെ ആവശ്യം. എന്നാല്, ദൃശ്യങ്ങള് ദിലീപിന് നല്കാന് കോടതി തീരുമാനിച്ചാല് മറ്റ് പ്രതികളും ഇതേ ആവശ്യവുമായി എത്താന് സാധ്യതയുള്ളതിനാല് കോടതി വിധി ഏറെ നിര്ണായകമാണ്.ജസ്റ്റിസുമാരായ എ.എം ഖാന്വില്ക്കര്, ദിനേഷ് മഹേഷ്വരി എന്നിവരടങ്ങുന്ന ബഞ്ച് ഇന്ന് രാവിലെ 10.30ന് വിധി പ്രഖ്യാപിക്കും.