കണ്ണൂർ:ഇന്നലെ അന്തരിച്ച നടന്‍ ഉണ്ണികൃഷ്ണന്‍ നമ്പൂതിരിക്ക് നാടിന്റെ അന്ത്യാഞ്ജലി.മൃതദേഹം ഔദ്യോഗിക ബഹുമതികളോടെ സംസ്കരിച്ചു.പൊതുദര്‍ശനത്തിന് ശേഷം രാവിലെ 11 മണിക്ക് പയ്യന്നൂരിലെ വീട്ടുവളപ്പിലായിരുന്നു സംസ്‌കാരം.കോവിഡ് ബാധിച്ച്‌ അദ്ദേഹം ഒരാഴ്ചയിലധികം കണ്ണൂരിലെ സ്വകാര്യ ആശുപത്രിയില്‍ ചികിത്സയിലായിരുന്നു. പിന്നീട് കോവിഡ് നെഗറ്റീവായി വീട്ടിലേക്ക് മടങ്ങിയിരുന്നു. ആരോഗ്യനില മോശമായതോടെ വീണ്ടും ആശുപത്രിയില്‍ പ്രവേശിപ്പിക്കുകയായിരുന്നു. ബുധനാഴ്ച വൈകീട്ട് അഞ്ചരയോടെയായിരുന്നു അന്ത്യം.ഗാനരചയിതാവ് കൈതപ്രം ദാമോദരൻ നമ്പൂതിരിയുടെ ഭാര്യാപിതാവാണ്. 76ാം വയസ്സിലാണ് അദ്ദേഹം സിനിമാരംഗത്തെത്തുന്നത്.ജയരാജ് സംവിധാനം ചെയ്ത ‘ദേശാടന’ത്തിലൂടെയാണ് സിനിമ പ്രവേശം.തുടർന്ന് നിരവധി സിനിമകളിൽ ശ്രദ്ധേയ വേഷങ്ങൾ ചെയ്തു.മലയാളത്തിനു പുറമെ, കമൽഹാസനോടൊപ്പം ‘പമ്മൽ കെ. സംബന്ധം’, രജനികാന്തിനൊപ്പം ചന്ദ്രമുഖി എന്നി ചിത്രങ്ങളിലും അഭിനയിച്ചു.