തിരുവനന്തപുരം: ക്രിമിനൽ കേസുകളിൽ പ്രതിയായ യുവാവിനെ ബൈക്ക് ഇടിച്ചുവീഴ്ത്തിയ ശേഷം തട്ടി കൊണ്ടുപോയി. നെയ്യാർ ഡാം സ്വദേശി ഷാജിയെയാണ് തട്ടികൊണ്ടുപോയത്. തിരുവനന്തപുരം മാറന്നല്ലൂരിൽ ഇന്നലെ വൈകീട്ടോടെയായിരുന്നു സംഭവം. സ്കൂട്ടർ ഇടിച്ചു വീഴ്‌ത്തിയ ശേഷം സംഘം ഷാജിയെ കാറിൽ കയറ്റി കൊണ്ടുപോവുകയായിരുന്നു. ഷാജി ഓടിച്ചിരുന്ന ആക്ടീവ സ്കൂട്ടർ പിന്തുടർന്ന് വന്നവർ ആദ്യം വാഹനം ഇടിച്ചിട്ടു. നിലത്തുവീണ ഷാജിയെ മർദ്ദിച്ച ശേഷമാണ് കാറിൽ കയറ്റികൊണ്ടുപോയത്. നാട്ടുകാർ നൽകിയ വിവരത്തിന്റെ അടിസ്ഥാനത്തിൽ പോലീസ് നടത്തിയ അന്വേഷണത്തിലാണ് വാഹനമോടിച്ചിരുന്നത് ഷാജിയാണെന്ന് കണ്ടെത്തിയത്.ഷാജി നിരവധിക്കേസിലെ പ്രതിയും പണം പലിശക്ക് കൊടുക്കുന്നയാളുമാണെന്ന് പോലീസ് പറയുന്നു. വാഹനത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചു. കാറിന്റെ നമ്പർ കേന്ദ്രീകരിച്ച് അന്വേഷണം പുരോഗമിക്കുകയാണ്.