തിരുവനന്തപുരം:തിരുവനന്തപുരം എം.ജി കോളേജിൽ എസ്.എഫ്.ഐ-എ.ബി.വി.പി സംഘർഷം.യുണിറ്റ് രൂപീകരണവുമായി ബന്ധപ്പെട്ട തർക്കമാണ് സംഘർഷത്തിലേക്ക് നയിച്ചത്.എ.ബി.വി.പി കോട്ടയായ എം.ജി കോളേജിൽ യുണിറ്റ് രൂപീകരിക്കുമെന്ന് പ്രഖ്യാപിച്ച് എസ്.എഫ്.ഐ പ്രവർത്തകർ നടത്തിയ മാർച്ചിലാണ്‌ സംഘർഷമുണ്ടായത്.എ.ബി.വി.പി പ്രവർത്തകരാണ് ആദ്യം കല്ലെറിഞ്ഞത്.ഇരു വിഭാഗങ്ങളും തമ്മിൽ കല്ലേറും കുപ്പിയേറുമുണ്ടായി.പിന്നീട് ഇരു വിഭാഗങ്ങളും തമ്മിൽ ഏറ്റുമുട്ടി.സംഘർഷം രൂക്ഷമായതോടെ പോലീസ് ലാത്തി വീശുകയും ഗ്രനേഡ് പ്രയോഗിക്കുകയും ചെയ്തു.സംഘർഷത്തിൽ ജില്ലാ സെക്രട്ടറി പ്രജിൻ ഷാജി അടക്കമുള്ള എസ്.എഫ്.ഐ പ്രവർത്തകർക്ക് പരിക്കേറ്റിട്ടുണ്ട്.ഗ്രനേഡ് പ്രയോഗിച്ചിട്ടും എസ്.എഫ്.ഐ പ്രവർത്തകർ കോളേജിന് മുൻപിൽ നിന്നും പിരിഞ്ഞുപോകാതെ ഗേറ്റിനു മുൻപിൽ കുത്തിയിരുന്ന് മുദ്രാവാക്യം വിളിക്കുകയാണ്.കോളേജിനകത്ത് എ.ബി.വി.പി പ്രവർത്തകർ തമ്പടിച്ചിരിക്കുകയാണ്.സ്ഥലത്ത് സംഘർഷാവസ്ഥ നിലനിൽക്കുകയാണ്. സംഘർഷം രൂക്ഷമായതോടെ ജില്ലയുടെ വിവിധ സ്റ്റേഷനുകളിൽ നിന്നും പോലീസ് ഇവിടേക്കെത്തിയിട്ടുണ്ട്.