അബുദാബി: അബുദാബി ബിഗ് ടിക്കറ്റ് നറുക്കെടുപ്പിൽ 30 കോടി രൂപ സ്വന്തമാക്കി ഖത്തറില്‍ താമസിക്കുന്ന കണ്ണൂര്‍ സ്വദേശിനി തസ്ലീന പുതിയപുരയിൽ.29.74 കോടി രൂപ(1.5 കോടി ദിര്‍ഹം) യാണ് സമ്മാനത്തുക.ഖത്തറില്‍ റസ്റ്റോറന്റ് നടത്തുന്ന അബ്ദുല്‍ ഖദ്ദാഫിയുടെ ഭാര്യയാണ് തസ്ലീന. മൂന്നു മക്കളുണ്ട്. ആദ്യമായാണ് ടികെറ്റെടുക്കുന്നതെന്നും സമ്മാനമടിച്ചത് വിശ്വസിക്കാനായില്ലെന്നും അവര്‍ പറഞ്ഞു. നേരത്തെ 10 വര്‍ഷത്തോളം ദുബൈയില്‍ പ്രവാസിയായിരുന്ന തസ്ലീന ജനുവരി 26നായിരുന്നു ഓണ്‍ലൈനിലൂടെ 291310 നമ്പർ ടിക്കറ്റെടുത്തത്. ഒരു സുഹൃത്ത് പറഞ്ഞതനുസരിച്ചാണ് ബിഗ് ടികെറ്റ് നറുക്കെടുപ്പിനെക്കുറിച്ച്‌ അറിഞ്ഞത്. ആദ്യ പരീക്ഷണം തന്നെ ഭാഗ്യം കൊണ്ടുവന്നതില്‍ അതിയായ സന്തോഷമുണ്ട്. ബുധനാഴ്ച നടന്ന നറുക്കെടുപ്പ് തത്സമയം കണ്ടിരുന്നില്ല. സമ്മാനത്തുകയില്‍ നിന്ന് മക്കളുടെ വിദ്യാഭ്യാസത്തിന് വേണ്ടി ഉപയോഗിക്കും. മറ്റു കാര്യങ്ങള്‍ തീരുമാനിച്ചിട്ടില്ലെന്നും തസ്ലീന പറഞ്ഞു.വ്യാഴാഴ്ച നടന്ന ദുബൈ ഡ്യൂട്ടി ഫ്രീ നറുക്കെടുപ്പില്‍ എറണാകുളം മുളന്തുരുത്തി സ്വദേശി സൂരജ് അനീദ് ഏഴു കോടിയിലേറെ രൂപ സമ്മാനം നേടിയിരുന്നു.