കൊച്ചി: മഹാരാജാസ് കോളജിലെ എസ്.എഫ്.ഐ പ്രവര്‍ത്തകന്‍ അഭിമന്യുവിനെ കൊലപ്പെടുത്തിയ കേസില്‍ ഇന്ന് നാലു പേര്‍ കൂടി അറസ്റ്റില്‍. പാലാരിവട്ടം സ്വദേശി അനൂപ്, കരുവേലിപ്പടി സ്വദേശി നിസാര്‍, എസ്.ഡി.പി.ഐ പ്രവര്‍ത്തകരും ആലപ്പുഴ സ്വദേശികളുമായ ഷാജഹാന്‍, ഷിയാസ് സലീം ഇന്ന് അറസ്റ്റു ചെയ്തത്. ഇവരില്‍ നിസാറിന് കൊലപാതകത്തിന്റെ ഗൂഢാലോചനയില്‍ പങ്കുണ്ടെന്നും അനൂപ് കൊലയാളികള്‍ക്ക് സഹായം ചെയ്തുവെന്നും പോലീസ് പറയുന്നു. കൊലപാതകത്തിനു ശേഷം പ്രതികള്‍ രക്ഷപ്പെടാന്‍ ഉപയോഗിച്ച കാറും കണ്ടെടുത്തു. ചേര്‍ത്തല സ്വദേശിയുടെ ഉടമസ്ഥതയിലുള്ളതാണ് കാര്‍.ഇവരില്‍ നിന്ന് പിടിച്ചെടുത്ത ലാപ്‌ടോപും മൊബൈല്‍ ഫോണുകളും പരിശോധിച്ചതില്‍ നിന്ന് മതസ്പര്‍ധ വളര്‍ത്തുന്ന പല രേഖകളും കണ്ടെടുത്തിട്ടുണ്ട്. അതേസമയം, കൊലയാളികള്‍ അടക്കം കേസിലെ പ്രധാന പ്രതികള്‍ എല്ലാം ഇപ്പോഴും ഒളിവിലാണ്. കൊലപാതകം നടന്ന് പത്ത് ദിവസം പിന്നിടുമ്ബോഴും പ്രധാന പ്രതികളെ കുറിച്ച്‌ പോലീസിന് സൂചന ലഭിച്ചിട്ടില്ല. ഇവര്‍ സംസ്ഥാനം വിട്ടുവെന്നും ബംഗലൂരു വഴി വിദേശത്തേക്ക് കടക്കാന്‍ സാധ്യതയുണ്ടെന്നുമാണ് പോലീസ് പറയുന്നത്.