മട്ടന്നൂര്‍: വ്യാഴാഴ്ച മട്ടന്നൂരില്‍ പകര്‍ച്ചപ്പനി ബാധിച്ച് രണ്ടുപേരെക്കൂടി ആസ്പത്രിയില്‍ പ്രവേശിപ്പിച്ചു. മട്ടന്നൂരില്‍ വീണ്ടും ഡെങ്കിപ്പനി പരത്തുന്ന കൊതുകുലാര്‍വകളെ കണ്ടെത്തി. മട്ടന്നൂരിലെ കനാല്‍ക്കര കുഞ്ഞിപ്പള്ളിക്ക് സമീപം പണിതുകൊണ്ടിരിക്കുന്ന ഇരു നിലക്കെട്ടിടത്തിന്റെ ഉടമയ്‌ക്കെതിരേ ആരോഗ്യവിഭാഗം ക്രിമിനല്‍ കെസെടുത്തു. വ്യാഴാഴ്ച രാവിലെ മട്ടന്നൂരിലെ ആരോഗ്യവിഭാഗം നടത്തിയ പരിശോധനയിലാണ് കെട്ടിടത്തിനകത്തെ നിര്‍മാണത്തിലിരിക്കുന്ന സെപ്റ്റിക് ടാങ്കും ശുചിമുറിയുടെ നിര്‍മാണത്തിനായി ഒരുക്കിയ പത്തോളം കോണ്‍ക്രീറ്റ് കുഴികളും പരിശോധിച്ചപ്പോള്‍ നിരവധി ഈഡിസ് കൊതുക് ലാര്‍വകളെ കണ്ടെത്തുകയായിരുന്നു. ഇതിനെത്തുടര്‍ന്ന് ഉടമയ്‌ക്കെതിരേ ക്രിമിനല്‍ കേസെടുക്കാന്‍ ആരോഗ്യവിഭാഗം തീരുമാനിക്കുകയായിരുന്നു.