പയ്യന്നൂർ: രാമന്തളിയിലെ ജനങ്ങളുടെകുടിവെള്ളം മുട്ടിച്ച നേവൽ അക്കാഡമിയുടെ ജനദ്രോഹ നടപടിക്കെതിരെ റോഡ് ഉപരോധ സമരം നടത്തിയ 54 പേർ അറസ്റ്റിൽ. 50 ദിവസമായി തുടരുന്ന അനിശ്ചിതകാല നിരാഹാര സമരത്തോട് അധികൃതർ കാണിക്കുന്ന അവഗണനയിൽ പ്രതിഷേധിച്ചു റോഡ് ഉപരോധിച്ചവരെയാണ് ഇന്നലെ രാവിലെ പതിനൊന്നരയോടെ പോലീസ് അറസ്റ്റു ചെയ്തു നീക്കിയത്. സമരം നടത്തുന്നവരെ കള്ളക്കേസിൽ കുടുക്കുന്ന പോലീസ് നടപടിയിൽ പ്രതിഷേധിച്ചു രാമന്തളി പഞ്ചായത്തിൽ ഇന്ന് ഹർത്താൽ പ്രഖ്യാപിച്ചിട്ടുണ്ട്. രാവിലെ ആറു മുതൽ വൈകുനേരം ആറുവരെയാണ് ഹർത്താൽ.