കണ്ണൂർ: തളിപ്പറമ്പിൽ കാറിൽ കടത്താൻ ശ്രമിച്ച കഞ്ചാവുമായി യുവാവ് പിടിയിൽ.പരിയാരം സ്വദേശി അശ്വിൻ രാജ് (23) ആണ് പിടിയിലായത്. പഴയങ്ങാടിയിൽ എക്‌സൈസ് സംഘം നടത്തിയ വാഹന പരിശോധനയിലാണ് കഞ്ചാവ് കണ്ടെത്തിയത്. കഞ്ചാവ് കടത്താനുപയോഗിച്ച മാരുതി ആൾട്ടോ കാറും കസ്റ്റഡിയിലെടുത്തു. എക്‌സൈസ് കമ്മീഷണർ സ്‌ക്വാഡ് അംഗം പിപി രജിരാഗിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ പഴയങ്ങാടി പോലീസ് സ്‌റ്റേഷനു സമീപത്ത് വെച്ചാണ് യുവാവിനെ പിടികൂടിയത്.കണ്ണൂരിലെ വിവിധയിടങ്ങളിൽ കഞ്ചാവ് വിതരണം ചെയ്യുന്ന സംഘത്തിലെ മുഖ്യകണ്ണിയാണ് ഇയാളെന്ന് പോലീസ് വ്യക്തമാക്കി. പിടിയിലായ പ്രതി കഞ്ചാവ് ചെറിയ പൊതികളിലാക്കി സ്‌കൂൾ- കോളേജ് വിദ്യാർത്ഥികൾക്ക് ഉൾപ്പടെ വിൽപ്പന നടത്തുകയും വിദ്യാർത്ഥികളെ ഉപയോഗപ്പെടുത്തി കഞ്ചാവ് വിൽപ്പന നടത്തുകയും ചെയ്തിരുന്നതായി പോലീസ് പറഞ്ഞു. പ്രതിയുടെ ഫോൺ പരിശോധിച്ചതിൽ നിന്നും കഞ്ചാവ് അന്വേഷിച്ച് വിദ്യാർത്ഥികൾ ഉൾപ്പടെ നിരവധിപേർ അശ്വിനെ സമീപിച്ചതായി കണ്ടെത്തി.