തിരുവനന്തപുരം: മലയാളത്തിലെ സ്വകാര്യ വാർത്താ ചാനലായ മീഡിയവൺ സംപ്രേഷണം നിർത്തി. കേന്ദ്രസർക്കാർ ഏർപ്പെടുത്തിയ സംപ്രേക്ഷണ വിലക്കിനെതിരെ ഹൈക്കോടതിയിൽ നൽകിയ ഹർജി തള്ളിയതിന് പിന്നാലെയാണ് മീഡിയവൺ സംപ്രേക്ഷണം അവസാനിപ്പിച്ചത്. എഡിറ്റർ പ്രമോദ് രാമൻ ചാനലിൽ കൂടിയാണ് ഇക്കാര്യം അറിയിച്ചത്. കോടതി വിധി മാനിക്കുന്നുവെന്നും നിയമപോരാട്ടം തുടരുമെന്നും പ്രമോദ് രാമൻ പറഞ്ഞു.‘മീഡിയവണിന്റെ സംപ്രേഷണം തടഞ്ഞതിന് എതിരെ മാനേജ്‌മെന്റ് നൽകിയ ഹർജി ഹൈക്കോടതി തള്ളിയിരിക്കുകയാണ്. ബഹുമാനപ്പെട്ട കോടതി വിധി മാനിച്ച് സംപ്രേഷണം തൽക്കാലം നിർത്തുകയാണ്. കേന്ദ്ര സർക്കാരിന്റെ നടപടിക്ക് എതിരെ നിയമപോരാട്ടം തുടരും. ഉടൻ തന്നെ അപ്പീലുമായി ഡിവിഷൻ ബെഞ്ചിനെ സമീപിക്കും. നീതി പുലരും എന്ന വിശ്വാസം ആവർത്തിക്കട്ടെ. പ്രേക്ഷകർ നൽകുന്ന പിന്തുണയ്‌ക്ക് അകമഴിഞ്ഞ നന്ദി’ പ്രമോദ് രാമൻ പറഞ്ഞു.