കോട്ടയം: കൈക്കൂലി വാങ്ങുന്നതിനിടെ എം.ജി യൂണിവേഴ്‌സിറ്റി അസിസ്റ്റന്റ് പിടിയിൽ . അതിരമ്പുഴ യൂണിവേഴ്‌സിറ്റി ക്യാമ്പസിൽ നിന്നുമാണ് ആർപ്പൂക്കര സ്വദേശിനി എൽസിയെ വിജിലൻസ് സംഘം പിടികൂടിയത്.ഇന്ന് ഉച്ചയ്‌ക്ക് 12 മണിയോടെയായിരുന്നു സംഭവം. മാർക്ക് ലിസ്റ്റും പ്രഫഷണൽ സർട്ടിഫിക്കറ്റും നൽകുന്നതിനായി ഒന്നര ലക്ഷം രൂപയാണ് എം.ബിഎ വിദ്യാർത്ഥിയിൽ നിന്ന് എൽസി കൈക്കൂലിയായി ആവശ്യപ്പെട്ടത്. ഇതിന്റെ ആദ്യഘട്ടമായി ഇവർ 1.25 ലക്ഷം രൂപ കൈക്കൂലിയായി നൽകി.ബാക്കി തുകയായ 30000 രൂപ കൂടി നൽകണമെന്ന് എൽസി ആവശ്യപ്പെട്ടു. ഇതിൽ ആദ്യ ഗഡുവായ 15,000 രൂപ ശനിയാഴ്ച തന്നെ നൽകണമെന്ന് എൽസി വാശിപിടിക്കുകയായിരുന്നു. ഇതേ തുടർന്ന്, എം.ബി.എ വിദ്യാർത്ഥി വിജിലൻസ് എസ്.പി വി.ജി വിനോദ് കുമാറിന് പരാതി നൽകി.ഇതേതുടർന്ന് വിജിലൻസ് സംഘം എം.ബി.എ വിദ്യാർത്ഥിയുടെ കൈവശം ഫിനോഫ്തലിൻ പൗഡർ പുരട്ടിയ നോട്ട് നൽകി അയച്ചു. ഈ തുക യൂണിവേഴ്‌സിറ്റി ക്യാമ്പസിൽ വച്ച് വാങ്ങുന്നതിനിടെ ഇവരെ വിജിലൻസ് സംഘം പിടികൂടുകയായിരുന്നു. വിജിലൻസ് എസ്.പി വി.ജി വിനോദ് കുമാറിന്റെ നേതൃത്വത്തിലുള്ള വിജിലൻസ് സംഘമാണ് ഉദ്യോസ്ഥയെ പിടികൂടിയത്.