ആലപ്പുഴ:പാന്റ്സിന്റെ പോക്കറ്റില്‍ സൂക്ഷിച്ച മൊബൈല്‍ ഫോൺ ചൂടായി പൊട്ടിത്തെറിച്ച് വിദ്യാർത്ഥിക്ക് പരിക്കേറ്റു.അമ്പലപ്പുഴ സ്വദേശി അമൽ രാജുവിനാണ് പരിക്കേറ്റത്. ചേർത്തല പോളിടെക്‌നിക്കിലെ പരീക്ഷ കഴിഞ്ഞ് സ്‌കൂട്ടറിൽ മടങ്ങുമ്പോഴായിരുന്നു സംഭവം.പോക്കറ്റിൽ സൂക്ഷിച്ചിരുന്ന ഫോൺ പെട്ടെന്ന് ചൂടായി തീപിടിക്കുകയായിരുന്നു. അപകടത്തിൽ കൈയ്‌ക്കും, തുടയിലുമാണ് പരിക്കേറ്റത്. അമലിന്റെ പാന്റ്സിന്റെ ഒരു ഭാഗം കത്തിപ്പോയി. ഒരു വർഷമായി ഉപയോഗിച്ച് വന്ന റിയൽമി 6 പ്രോ എന്ന ഫോണാണ് പൊട്ടിത്തെറിച്ചത്.ചൂട് അനുഭവപ്പെട്ടതിനെത്തുടര്‍ന്ന് സ്‌കൂട്ടര്‍ നിര്‍ത്തി മൊബൈല്‍ ഫോണ്‍ പോക്കറ്റില്‍ നിന്ന് പുറത്തെടുത്ത് നിലത്തെറിയുകയായിരുന്നു. ഈ സമയത്താണ് അമലിന് പൊള്ളലേറ്റത്. തുടര്‍ന്ന് ഓട്ടോ ഡ്രൈവര്‍മാരും, നാട്ടുകാരും ചേര്‍ന്ന് അമലിനെ ചേര്‍ത്തല താലൂക്ക് ആശുപത്രിയിലെത്തിച്ചു.