കണ്ണൂർ:കൊറോണ വ്യാപനം രൂക്ഷമായതോടെ ജില്ലയിൽ നിയന്ത്രണങ്ങൾ കർശനമാക്കി.കണ്ണൂർ ജില്ലയെ കൊറോണ നിയന്ത്രണങ്ങൾ കൂടുതലുള്ള ‘എ’ കാറ്റഗറിയിൽ ഉൾപ്പെടുത്തി. ആശുപത്രിയിൽ പ്രവേശിക്കപ്പെടുന്ന രോഗികളുടെ എണ്ണമുയരുന്ന സാഹചര്യത്തിലാണ് ജില്ലാ കളക്ടർ പുതിയ ഉത്തരവിറക്കിയത്.‘എ’ കാറ്റഗറിയിലെ നിയന്ത്രണങ്ങൾ പ്രകാരം പൊതുപരിപാടികൾ, രാഷ്‌ട്രീയ, സാമൂഹിക, സാംസ്‌കാരിക, മതപരമായ ചടങ്ങുകൾ, മരണ, വിവാഹ ചടങ്ങുകൾ എന്നിവയ്‌ക്ക് ഇനി 50 പേരെ മാത്രമേ അനുവദിക്കുകയുള്ളൂ. ആശുപത്രിയിലെ രോഗികളുടെ എണ്ണം കൂടിയതിനാൽ പരിയാരം സർക്കാർ മെഡിക്കൽ കോളേജുകളിൽ കൊറോണ ബാധിതരുടെ പ്രവേശനം ഇനി കൺട്രോൾ റൂം വഴിയാകുമെന്ന് ജില്ലാ കളക്ടർ അറിയിച്ചു.കൊറോണ വ്യാപനം രൂക്ഷമായ സാഹചര്യത്തിൽ കണ്ണൂർ സർക്കാർ മെഡിക്കൽ കോളേജ് ആശുപത്രിയിൽ സന്ദർശകർക്ക് നിയന്ത്രണം ഏർപ്പെടുത്തി. ഇന്ന് മുതൽ രാവിലെ 8 മണി മുതൽ 11 മണി വരെ മാത്രമേ ഒപി പ്രവർത്തിക്കൂ. പനി ബാധിച്ചെത്തുന്ന രോഗികൾക്കായി പ്രത്യേക ഫീവർ ക്ലിനിക്കും തയ്യാറാക്കിയിട്ടുണ്ട്.