തിരുവനന്തപുരം: സംസ്ഥാനത്തെ കൊറോണ സാഹചര്യം വിലയിരുത്താൻ മുഖ്യമന്ത്രിയുടെ യോഗത്തിൽ ഇന്ന് അവലോകന യോഗം ചേരും. വൈകീട്ട് മൂന്ന് മണിയ്‌ക്കാണ് യോഗം ചേരുക. പ്രതിദിന രോഗികളുടെ എണ്ണം കുറഞ്ഞ സാഹചര്യത്തിൽ സംസ്ഥാനത്ത് കൂടുതൽ ഇളവുകൾ നൽകിയേക്കും.തീയറ്ററുകൾ തുറക്കുന്നതുൾപ്പെടെയുള്ള കാര്യങ്ങളാണ് യോഗത്തിൽ ചർച്ചാ വിഷയമാകുക. ഇതിന് പുറമേ കല്യാണത്തിനും, മരണാനന്തര ചടങ്ങുകൾക്കും കൂടുതൽ ആളുകൾക്ക് പങ്കെടുക്കാൻ അനുമതി നൽകുന്ന കാര്യവും യോഗം പരിഗണിക്കും. സ്‌കൂളുകൾ തുറക്കുമ്പോൾ സ്വീകരിക്കേണ്ട മുൻകരുതൽ നടപടികളും യോഗം ചർച്ച ചെയ്യും. ആദ്യ ഡോസ് വാക്‌സിനേഷൻ പൂർത്തിയാക്കുന്നത് സംബന്ധിച്ച തീരുമാനങ്ങളും യോഗത്തിൽ ഉണ്ടാകുമെന്നാണ് വിവരം.കഴിഞ്ഞ അവലോകന യോഗത്തിൽ ഹോട്ടലുകൾ തുറക്കാനുള്ള അനുമതിയുൾപ്പെടെ കൂടുതൽ ഇളവുകൾ നൽകിയിരുന്നു. ഇതിന് ശേഷമുള്ള സംസ്ഥാനത്തെ സാഹചര്യവും ഇന്നത്തെ യോഗം വിലയിരുത്തും.