കൊല്ലം:ഒന്നരവയസുകാരന് പ്രതിരോധകുത്തിവെയ്‌പ്പെടുത്തതിൽ വൻ വീഴ്ച സംഭവിച്ചതായി പരാതി. തുടയിൽ എടുക്കേണ്ടിയിരുന്ന കുത്തിവെയ്പ്പ് കാൽമുട്ടിൽ എടുത്തു എന്നാണ് പരാതി ഉയർന്നിരിക്കുന്നത്.ഈ മാസം ഒന്നാം തീയതി തൃക്കോവിൽവട്ടം പ്രാഥമികാരോഗ്യ കേന്ദ്രത്തിൽ നിന്നാണ് മുഖത്തല സ്വദേശിയാണ് മുഹമ്മദ് ഹംദാൻ എന്ന ഒന്നരവയസ്സുകാരന് കുത്തിവെയ്‌പ്പെടുത്തത്.കുത്തിവെയ്‌പ്പെടുത്ത സ്ഥാനം മാറിയെന്ന് സംശയം തോന്നിയ കുട്ടിയുടെ മാതാവ് നഴ്‌സിനോട് സംശയം പ്രകടിപ്പിച്ചിരുന്നു.എന്നാൽ മാതാവിന്റെ സംശയം ഇവർ മുഖവിലയ്‌ക്കെടുത്തില്ല.വീട്ടിൽ തിരിച്ചെത്തിയ കുട്ടിക്ക് അസഹ്യമായ വേദന ഉണ്ടാവുകയും നടക്കാൻ ബുദ്ധിമുട്ട് അനുഭവപ്പെടുകയും ചെയ്തു. തുടർന്ന് കുട്ടിയെ കൊല്ലത്തെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. മാതാപിതാക്കളുടെ പരാതിയിൽ ഡി.എം.ഒ അന്വേഷണത്തിന് ഉത്തരവിട്ടു. കുത്തിവെയ്‌പ്പെടുത്തതിൽ വീഴ്ച സംഭവിച്ചിട്ടുണ്ട് എന്നാണ് പ്രാഥമിക വിലയിരുത്തൽ. എന്നാൽ കുത്തിവെയ്‌പ്പെടുത്ത സമയത്ത് കുട്ടി കാൽ വലിച്ചതാണ് സ്ഥാനം തെറ്റാൻ കാരണമെന്നാണ് പ്രഥമിക ആരോഗ്യ കേന്ദ്രം അധികൃതർ നൽകുന്ന വിശദീകരണം.