തിരുവനന്തപുരം: പ്രായപൂര്‍ത്തിയാകാത്ത പെണ്‍കുട്ടികള്‍ക്കെതിരെ വര്‍ധിച്ചു വരുന്ന ലൈംഗിക അതിക്രമങ്ങള്‍ തടുക്കാൻ സിപിഎം സംഘടനാ തലത്തിലും സംവിധാനമുണ്ടാക്കുന്നു. ഇത്തരം കേസുകളിലെ പ്രതികളെയും അവര്‍ക്ക് കൂട്ടു നില്‍ക്കുന്നവരെയും സാമൂഹികമായി ഒറ്റപ്പെടുത്താനും വേണ്ടിവന്നാല്‍ ജനകീയ വിചാരണ പോലുള്ള രീതികള്‍ സ്വീകരിക്കാനുമാണ് ആലോചിക്കുന്നത്. പാര്‍ട്ടിയുടെ യുവജന, വനിതാ സംഘടനകളായ ഡിവൈഎഫ്‌ഐയെയും ജനാധിപത്യ മഹിളാ അസോസിയേഷനെയുമാകും ഇതിന്റെ ചുമതല ഏല്‍പ്പിക്കുക.
ആണ്‍കുട്ടികള്‍ക്കും പെണ്‍കുട്ടികള്‍ക്കും ഇടയില്‍ ആരോഗ്യകരവും പരസ്പരം ബഹുമാനിക്കുന്നതുമായ സൗഹൃദങ്ങള്‍ ഉണ്ടാകേണ്ടതിന്റെ ആവശ്യകത ബോധ്യപ്പെടുത്തുക, ലൈംഗിക ദുരുദ്ദേശത്തോടെ പെരുമാറുന്നവരെക്കുറിച്ച് അപ്പോള്‍ത്തന്നെ വിവരം നല്‍കാന്‍ പെണ്‍കുട്ടികള്‍ക്ക് ധൈര്യം നൽകുക തുടങ്ങി യാതൊരു വിധ അതിക്രമവും ഉണ്ടാകാതിരിക്കാന്‍ ആവശ്യമായ ബോധവല്‍ക്കരണ ക്യാമ്പെയിന്‍ തുടര്‍ച്ചയായി നടത്തുക തുടങ്ങിയവ ഈ സംഘടനകളുടെ പ്രാദേശിക ഘടകങ്ങളുടെ പ്രധാന പരിപാടികളാക്കി മാറ്റും.